මා දුටු ඔස්ට්‍රේලියාව

 මා දුටු ඔස්ට්‍රේලියාව

➖➖➖➖➖➖❤️➖

ශ්‍රී ලංකාවේ දුරබැහැර ගම්මානයක, අඩක් කැඩීගිය මැටි බිත්ති සහිත පුංචි පැලක ඉපදුණු මට, අහසින් යන අහස්යානයක් දෙස බලා සිටීම හැර වෙනත් ලෝකයක් ගැන ලොකු හීන තිබුණේ නැතිය. මගේ පාසල් බෑගයේ පැත්තක් ඉරී තිබුණි; පාවහන් යුවළ හිල් වී තිබුණි. බැනියම් හා යට ඇඳුම් වැලේ වනනුයේ බොහෝ ලැජ්ජාවෙනි.

නමුත්, විදේශගතව සිටින මගේ ඥාති මාමා කෙනෙකුගේ උපකාරයෙන් මට හදිසියේම ඔස්ට්‍රේලියාවේ සතියක සංචාරයක් සඳහා එක්වීමට අවස්ථාව ලැබුණි. 

අහස්යානයට ගොඩවී පැය ගණනාවකට පසු මා පා තැබුවේ මගේ පුංචි මොළයට අදහගන්නටත් බැරි තරම් ආශ්චර්යමත්, අමුතුම ලෝකයකටය. එය මට බිග් කුච්චන් එකක්ම වුනේය.

මා මුලින්ම පය තැබුවේ සිඩ්නි නගරයටය. ගුවන් තොටුපළෙන් එළියට බසිනවාත් සමඟම මා දුටුවේ වීදුරුවලින් සෑදූ අහස උසට විහිදුණු දැවැන්ත ගොඩනැගිලිය. ඒ කිසිදු තැනක අපේ ගමේ මෙන් පාර පුරා විසිවුණු ප්ලාස්ටික් කොළ, දූවිලි හෝ කුණු රොඩක් දැකගන්නට ලැබුණේ නැතිය. 

පාර පිරිසිඳු කිරීම සඳහා වෙනම සේවකයින් උන් අතර, අපේ ගමේ මාලිමා මාමා මෙන්, සතියක් ගානේ මාන කපන කානු ශුද්ධ පවිත්‍ර කරන  ජනතා නියෝජිතයෝ එහි නැති බව අපට දැනගන්නට ලැබුනේය.

මාර්ග ඉතා පළල්ය, පිරිසිදුය. තදබදය තිබුණත් වාහන සියල්ලම ඉතා පිළිවෙළකට, නීතිගරුකව ගමන් කළේය. පාර පනින තැනදී පදිකයන්ට ප්‍රමුඛතාව දෙමින් වාහන නතර කරන අයුරු දැක මම පුදුම වූයෙමි. මගේ ගමේදී පාර පැනීමට පවා අප බියෙන් ගැහෙන්නෙමු. අපේ ගමේ ටැපික් සාජන් මාමා මෙන් පඳුරු අස්සේ සිට පාරට පනින පොලිස් හාවෝ එහේ දැක්කේ නැතිය. නමුත් දම් රැජින වාගේ බස් නැති එක කණගාටුවක් විය.

දිනක් මාමා මාව කැඳවාගෙන ගියේ "සිඩ්නි ඔපෙරා හවුස්" (Opera House) සහ "හාබර් බ්‍රිජ්" (Harbour Bridge) නැරඹීමටයි. මුහුද මැද රදවා ඇති සුදු පැහැති විශාල නැවක රදවා ඇති රුවල් වැනි ඒ ගොඩනැගිල්ල දෙස මම පැයක් විතර මුළුමනින්ම ගල්වී බලා සිටියෙමි.

මගේ මාමා කියූ පරිදි එම රටේ කොමියුනිස්ට් පක්ෂයක ලේකම් ධූරය දැරූ කෙනෙකු එහි වහලය මතට නැග පැනලා මැරී තිබුනේය.

සන්ද්‍යාවේ ඒ අහස යටින් විදුලි බුබුළු දැල්වෙද්දී මුහුදු දිය මත ඇඳුණු ආලෝකය මට ගෙන දුන්නේ පාසලෙන් අප රැගෙන ගිය පෝර්ට් සිටි චාරිකාවය. අපේ මාමා නම් කිව්වේ, මෙව්වා මේ මැදමුලන පැත්තේ එකෙක් ඇවිත් කළ පිස්සු වැඩ කියලාය.

තවත් දිනක අපි වනජීවී උද්‍යානයකට ගියෙමු. එහිදී මට ඔස්ට්‍රේලියාවටම ආවේණික ක kangaroo (කැන්ගරූ) සහ Koala (කොආලා) සතුන් දැකබලා ගැනීමට ලැබුණි. තමන්ගේ බඩේ ඇති මල්ලේ පැටවා තබාගෙන පැන පැන යන කැන්ගරූවන් දැක මට සිහි වූයේ පවුල් පිටින් එහෙ මෙහෙ පනිනා අපේ රටේ පොලිටිකල් මාමලාය.

නමුත් මගේ සිත වඩාත්ම සංවේදී වූයේ එහෙ පාසලක් සහ එහෙ ළමයින් ජීවත් වන ආකාරය දුටු විටයි. එහි ළමයින්ට අවශ්‍ය තරම් පොත්පත්, පරිගණක සහ සෙල්ලම් කිරීමට විශාල ක්‍රීඩාංගණ තිබුණි. කිසිම දරුවෙකුගේ ඇඳුම් ඉරී තිබුණේ නැත. හැමෝම තමන්ට හිමි නිදහස සහ පහසුකම් විඳිමින් සතුටින් සිටියහ. 

මට එකපාරටම මතක් වූයේ මගේ ගමේ පාසලේ පියස්සෙන් වතුර වටෙන පන්ති කාමරයයි, පොත් ගන්න සල්ලි නැතුව අඬන මගේ යාළුවන්වයි.

පොත් ටික හා පාසල් උපකරණ වැට් නැතිව ගන්න බලා සිටිනා මාගේ දුප්පත් දෙමාපියන්‍ය.

ඔස්ට්‍රේලියාව කියන්නේ තාක්ෂණයෙන්, පිරිසිදුකමෙන් සහ ස්වාභාවික සෞන්දර්යයෙන් පිරුණු අතිවිශිෂ්ට රටකි. එහෙ මිනිසුන් ඉතා සුහදශීලීය; පාරේදී හමු වූ විට පවා එකිනෙකාට සිනාසී සුබ පතති. ඒ අය අප මෙන් කුහක නැත. බොරු කියන්නේ නැත. හොරා කන්නේ නැත.

මගේ සංචාරයේදි ඔවුන්ගේ උක් වගාවක් නැරඹීමට ගිය අතර, අපිටත් උක් කන්නේ නැතිව උක් වවා රට ස්වයංපෝෂිත කළ නොහැක්කේ මන්දයි සිහිවිය. රට කොතරම් සංවර්ධිතද යත්, සීනී සඳහාම පමණක් වෙන්වූ වෙළඳ සල් රටපුරාම තිබුනේය. ඒවා දුඹුරු සීනී, සුදු සීනී, සීනී මුරුක්කු හා සීනී කරිඤ්ඤා ලෙස දියර වශයෙන්ද තිබුනේය.

සතියක මනරම් සංචාරයකින් පසු නැවත මගේ පුංචි පැලට පැමිණි මට, මගේ රටේ ඇති දුප්පත්කම ගැන ලොකු කණගාටුවක් ඇති විය. 

නමුත් ඔස්ට්‍රේලියාව මට දුන්නේ හිස් සිහිනයක් පමණක් නොවේ; ලොකු අභියෝගයකි.

"මමත් හොඳට ඉගෙනගෙන, කවදාහරි මගේ රටත් අන්න ඒ වගේ ලස්සන, දියුණු රටක් කරන්න උත්සාහ කරනවා" යන දැඩි අභිලාෂය මා තුළ පැළපදියම් කිරීමට ඒ පුදුමාකාර ඔස්ට්‍රේලියානු සංචාරයට හැකි විය.

එපමණක් නොව එරටට ගොස් අපේ රට වෙනුවෙන් තම ලේ දහදිය හා කඳුළු වක්කරමින්, සම්මාදම් එකතු කරමින් කවී ගී කෙටිකතා නිසඳැස් ස්ත්‍රෝත නාට්‍ය චිත්‍රපට මෙන්ම රේඩියෝ චැනල් හා පොඩ් කාස්ට් මෙහෙයවන මාමලා හා නැන්දලාද බෝට්ටු මගින් මෙරටට ගෙන ඒමට කටයුතු කරනා බවටත් දැඩි තීරණයකට එළඹ අවසානය.

අපේ රටේ මී හරකුන්ට පවා පොහොසක් රටක් හා ලස්සන ජීවිතයක් ලබා දීම මාගේ අනාගත බලාපොරොත්තුව වන්නේය.

ලංකාවට අත නොතබනු !!!!

#මාතලන්