මොහාන් සැලා ගොඩ ගනීද..? - To Rupavahini's New Chairman

මොහාන් සමරනායක කියන්නෙ මගේ ප්‍රියතම නිවේදකයන් කිහීපදෙනාගෙන් කෙනක්. ඒ වගේම ගෞරවාදරයට පාත්‍ර වූ ප්‍රවීන මාධ්‍යවේදියෙක්. ඔහුව අප හඳුනන්නේ විදේශ විත්ති විචාරකයෙක් විදියට. ඉතාමත්ව සමබර විදියට එම ප්‍රවෘත්ති අපට ලබා දෙන්නෙක් විදියට. මොකද අද ඉන්න සමහර විදේශ විත්ති විචාරය කරන අය කරන්නේ, ඒක ලංකාවට ගැලපෙන විදියට හදාගෙන අමු කෙප්ප කෙලින එක. (උදා: ලලිත් ද සිල්වා.) නියම ප්‍රවෘත්තිය බැලුවහම වෙලා තියෙන්නේ වෙන එකක්.

දැන් එතුමට, කාටත් එපාවෙලා තියෙන රූපවාහිනිය බාරදිල තියෙනව. රූපවාහිනීය කියන්නෙ සාඩම්බර ඉතිහාසයක් තියෙන තැනක්. මේකේ කොච්චර වැදගත්, ලස්සන, වටිනා වැඩ සටහන් ප්‍රචාරය උනාද.? කොතරම් ප්‍රතිරූප ගොඩනැගුවද.? නමුත් පසු කාළිනව මොකද උනේ.? අන්තිමේදී ප්‍රවෘත්ති විකාශනයත් අච්චාරු ගොඩක් කරා. දැන් රූපවාහිනිය මගින් ප්‍රතිරූප ගොඩනගනව වෙනුවට, අනෙකුත් ආයතන වල ඉන්න කාලකන්නිගෙන් ඒක පුරවනව. ඇයි මෙහෙම උනේ.? විය යුත්තේ එයද.?

ඉරිදා උදැසන ආයුබොවන් වැඩසටහන කොතරම් වින්දද.? ප්‍රෙමකීර්ති ද අල්විස්, කේ.ඩී.කේ. ධර්මවර්ධන වැනි ප්‍රවීනයො මෙන්ම, හේම නලීන් කෙතරම් අපූරුවට ඒව ඉදිරිපත් කළාද..? සමාජය කොතරම් දැනුවත් කළාද..? සාමන්‍ය ජනතාව පවා උසස් වින්දනයක් ඇති අය බවට පත් කළාද..? අද මොනවද කරන්නේ..? පෞද්ගලික නාලිකාවලින් ගත්ත නිවේදිකාවෝ කැබරේ දානව හිපියෝ වගේ සංගීත කන්ඩායම් එක්ක. මහරැ වැඩිහිටියෝ විතරක් බලපු එළිමහන් සංගීත බයිල උදේ පාන්දර දාල පොඩි එවූන්ගේ මොළ කුනු කරනව.

සිනමාවට අභියෝගයක් වන තරමේ සාර්තක ටෙලි නාට්‍ය බිහිවුනේ මෙතනින්. ඒවල රඟපාපු නළු නිළියෝ සිනමා තරුවලටත් වඩා ජනප්‍රිය වුනා. අද මොනවද පෙන්නන්නෙ..? පෞද්ගලික නාලිකාවල තහනම් කරපු, ඉන්දියාවේ කුණු ගොඩවල් වලටත් අන්ත කෝලම්.

ඉස්සර ප්‍රචාරය වුනු සංගීත වැඩසටහන් කොච්චර විඳින්න පුලුවන්ද. කොතරම් සුන්දර සංගීත වැඩසටහන් විකාශය කලාද.? අද මොනවද කරන්නෙ. පෞද්ගලික නාලිකාවල කරනව වගේම, ගිරව් වගේ කෙල්ලො දාගෙන වැඩසටහන් කන එක නේද.? කඩේ යන කලා කාරයො ටික දාගෙනවත් නැවතත් රසාස්වාදයෙන් උසස් නිර්මාන කරන්න බැරිද.? පෞද්ගලික නාලිකාවලට ආදර්ශයක් විය යුතු රූපවාහිනිය එසේ නොකොට ඒව කොපිකරනව විතරක් නෙමෙයි. අඩුගානේ ඒකවත් හරියට කරන්න බෑ කියල ඔප්පු කරපු වැඩසටහනක් තමයි රණවිරු සුපර් ස්ටාර්. මුකුන්ද හිටියේ ඒ නිවේදක නිවේදිකාවොද. මොන්ටිසෝරි ළමයි ඊට වඩා හොඳයි.

සාර්ථක නිවේදකයෙක් කියන්නේ හරියට හිටිවන කවියෙක් වගේ. චතුර වගේ වචන ගලාගෙන එන පුද්ගලයෙක් වෙන්න ඕන. ඒවගේ අය නිශ්පාදනය කලේ මුතුහර වැඩසටහනෙන්. අද ඒක තියෙනවද දන්නෙ නෑ. නමුත් පෞද්ගලික නාලිකාවල වැඩ කාරයො වෙලා ඉන්නෙ එතනින් ආපු අය.

කෙටියෙන් කියන්නෙ පුලුවන්නම්, රූපවාහිනිය ඔය තත්වෙන් වෙනස් කරල, වැඩක් තියෙන තැනක් කරන්න. රූපවාහිනය කියන්නෙ සල්ලි නැති තැනක් නොවෙයිනේ. ප්‍රවෘත්ති විකාශයෙන් පටන් ගන්න. වැඩි මුදලක් අරන් දැන්වීම් දෙක තුනක් දැම්මම හොඳටම ඇති. හෙඩ් ලයින් කියල ඉවරවෙල, ප්‍රවෘත්ති පටන් ගන්න කලින් නිවේදන දාන්නේ ඒකේ විතරයි මගේ හිතේ. එහෙම කරන්න තරම් අහෙනියක් නෑනේ. ඓශ්චර්යය කරා යන ගමනට රූපවාහිනියේ සතියේ දිනවල උදේ වරුව යොදාගන්න, අපි වවමු වැඩ සටහන, ස්වයං රැකියා (රූපලාවන්‍ය නොවේ)වලට උපකාර කරන, සමාජය දැනුවත් කරන වැඩසටහන් ප්‍රචාරය කරන්න.

නක්ෂශ්ත්‍ර කාරයොයි. කුක්ලයි, පතොරොම් කපන එවූනුයි, මේක් අප් දාන එවුනුයි ගේන එක නවත්තන්න. හැමදාම දොස්තරල ගේන්න මුලු ලංකාවම ලෙඩවෙලා නෑ තාම. මේ වටිනා කාළය, එවැනි කාළකන්නින්ගෙන් පුරවන්නේ නැතුව. වැදගත් වැඩසටහන් ප්‍රචාරය කරන්න.

බොරු උත්සව නැතුව චාම් ලෙස වැඩ බාරගත් ඔබට,රූපවාහිනිය රටටත්, ආන්ඩුවේ වැඩපිලිවෙලටත්, සමාජයටත්, දරුවන්ටත් වැඩක් ඇති සත්‍යවාහිනියක් කිරීමට සියළු ශක්තිය ධෛර්යය ලැබේවායි අවංකව ප්‍රාර්ථනා කරමි.

සුභ අනාගතයක්....!!!