මණ්ඩලේ කචල් - Kachal Board

ඉස්සර වල කක්කුස්සි කියල කක්කුස්සි වර්ගයක් තිබුනේය, කක්ක කතාවක් නිසා වැඩි දුර විස්තර කරන්නට අපහසුය. ඒවා අතුරුදහන් කලේ, අතුරුදහන් වැඩි කාළයක රටේ රජතුමා වූ පොඩි මිනිහගේ නායකයා වූ දුවන ලයන් ලව් සර්වන්ට් තුමා බව තිසරණී ගුණසේකර පත්තර වලට ලියා තිබුනි. කතාව සහතික ඇත්තය. එතුමා ගැන පොතක් උනත් හොඳ නරක දෙකම ලිවිය හැකිය. එතුමා ඒවා නැතිකලේ ඇමති කාළයේය. ජනාධිපති වීමට පෙරය. මේව හදල තියෙන්නේ මැතිනිගේ කාළේ ඉතින් ඒව නැතිකරන එක මගේ වැඩක් නොවේ කියා එතුමා අත පිහිදා ගත්තේ නැත. එහෙමනම් මාලිගාවත්තේ ෆ්ලැට් හැදෙන්නෙ නැත ලැට් හැදෙන්නේත් නැත. මැරෙනකම්. මැතිනිට බැන බැන ඉන්න තිබුනේය.

මේ කතාව කියන්නට හිතුනේ විදුලි බිල ගෙවන්නට ගිය වෙලාවේ මල පොඩ්ඩක් පැන්න නිසාය. කරන්ට් මණ්ඩලේ උන් යුද්දෙට කැප කරපු පඩිය ඉල්ලල කෑම වෙලාවේ කෑ ගහලා දැන් අසනීප වෙලාය. මේ දේශද්‍රෝහින්ට, කරන්ට් හතක්ම වදින්න ඕනෑය. යුද්දෙට දීපූ පඩි ඉල්ලන්නේ මුන්ගේ ෆියුස් එකක් ගිහිල්ලාද කියා තේරේන්නේ නැත. විදුලි බලය ඇන හිටියොත් ඇන හිටියාමය. මේ ඇන ලෙඩ වෙලාය. නිවාඩූ දාලාය. පඩි දෙන්න කියා දැන් ඉන්න ඇමතිට කරදර කරනවාය. මුන්ට නම් පිස්සුය. මුන් ඉස්ටයික් කොරන්න ඔනා ජෝන් සෙනෙවිරත්න ගරු ඇමතිතුමාගේ ගේ ඉස්සරහය. පුළුවන්නම් එතුමා උසාවී ගෙනා යුතුය. හැබයි නඩු කාරයාත් පරණ කෙනාම විය යුතුය, එම නිසා සරත් සිල්වා අළුත් කඩේට ගෙනා යුතුය. නැතිනම් එතුමාගේ ගෙදර නඩු බලවන්න හැකිය.

මුන් නම් දේශ ද්‍රෝහීන්ය, මුන් රටට ආදරය කර නැත. බලෙන් කපා ගත්තා මිස කැමැත්තෙන් දී නොමැත. ඒ කියන්නේ පාළකයෝ මුන්ගේ දේශ ප්‍රේමය දූෂනය කරලාය. එම නිසා මුන් දැන් වන්දි ඉල්ලනවාය. එහෙමමත් නෙමේය. කපපු එක ඉල්ලනවාය. මුන්ගේ ආප්ප ගෞරවය කෑළි කඩා බල්ලන්ට දමලාය. දැන් හදන්නේ ඇමති තුමාගේ ආප්පයද බල්ලන්ට දමන්නය. ඒ කියන්නෙ මුන් හොඳ ඒවූන් නොවේය. ඔය වගේම උස හාදයෙක් මුළු රටම ඉල්ලුවේය, බඩුත් හාමුදුරුවන්ගේ උසාවියෙන් උන්නැහේ වසර දෙකක් කූරූ ගනින්නට යැවුවේය. දැන් සිරසේ 7 ට යන ටෙලි නාට්ටියේ ප්‍රධාන චරිතයකට පන පොවන්නෙය.

මේවාට වැරදි 94 ට පෙර සිටි උන්ගේ නෑදයින්ගේ පාටිය බව, මැති ඇමතිවරු, මන්ත්‍රිවරු, පලා බබාවරු, මන්ත්‍රිවරු, අර සභා මේ සභා මන්ත්‍රිවරු, ඇමතිවරු, පමනක් නොව, සභාපතිවරු, පබා පමණක් නොව, මාධ්‍ය ඔස්තාර් වරු සහ බුද්ධිමත් ජනතාව, ප්‍රවෘත්ති වල, රාත්‍රී වාද බයිලා වල නිතර කියයි. එම නිසා උන්ට දඬුවම් කළ යුතුය. ආන්ඩුව කෙසේ වෙතත්, ආන්ඩුව එය ඉටු කරන බවක් නොපෙනන නිසා, බුද්ධිමත් ජනතාව එය අකුරටම ඉටු කරනවාය. දැන් ඇත්තේ 22 කි. තුන වත් ඉතුරු වේදයි කිව නොහැක. ජනතාව මදිවාට, උන් උන් ම දඬුවම් පමුනුවා ගන්නවාය. මෙයට කියන්නේ හරාකිරී කියාය, කරා කිරි ගේනවා නෙමේය. තමන්ගේ බඩ තමන්ම කපා ගන්නවාය. කපන්නට පෙර බයටම බඩ යනවාය. බඩ ගියාම ගඳය. මට නිකන් පිස්සු වගේය..

අපේ හිටපු බොසා, මට ප්‍රොජෙක්ට් රිපෝට් එකක් හදන්න කීවේය. ඒ යකාගෙන් වැඩක් නෑ කියා, චෙයාමන් ඌ වෙන කොම්පැනියකට දමා, අපිට ප්‍රොෆෙසනල් බොසෙක් දුන්නේය. මම පොජෙක්ට් රිපෝට් එකත් අරන් අලුත් බොසා හම්බවෙන්න ගියේය. "කවුද තමුසෙට ප්‍රොජෙක්ට් රිපෝට් හදන්න කිව්වේ.....*&###$* B-((....???"  කියා එතුමා මගෙන් ඇසුවේය. මම කිව්වේ කලින් බොස් කියාය. "එහෙනම් ඒක ගිහින් ඌට දෙන" ලෙස අලුත් බොස් කීවේය. මම වහාම පරණ බොස් හම්බ වෙන්න ඒ ඔෆීස් එකට ගියේය. ප්‍රොජෙක්ට් රිපොට් එක පරණ බොසාට දුනිමි. එතුමා එය විසිකර මගේ කනට ගැසුවේය. මම රිපොට් එකත් රැගෙන එළියට පැමිනියේය. සිකියුරිටි එකෙන්ද මට දෙක තුනක් ඇන්නේය. මම චෙයාමන්ව අමාරුවෙන් ඇපොයිමන්ට් එකක් දමා හම්බවුනේය. එතුමා සිඳුවූ දේ අසා මාව ගරු මුතුහෙට්ටිගම මන්ත්‍රි තුමාගේ දොස්තර වෙත යොමු කළේය. එතුමා මගේ මොළේ හොඳ බව කියා සහතිකයක් දුන්නේය. සහතියකත් කරේ එල්ලගෙන මම ඔෆීස් එක බලා යන්නේය......

ප: ලි:
ඔයාලටත් නිකන් අප්සට් වගේනම් සහතිකයක් ගන්නා එක වඩා හොඳය. ඔබ මඤ්ඤං නොවන බව ඔබටම වැටහෙන නිසාය.