ආන්ඩුවට සල්ලි නෑලූ... පව්....!!! - No Money No Honey

කාටූනය - ඉන්දික දිසානායක

ආර්ථිකේ හොඳ නිසා, ගමේ කෙල්ලොත් ජීන්ස් වල බැහැලා යනවයි කියපු අමුණුගම ඇමතිතුමා, ඒ කියපු කටෙන්ම දැන් කියන්නේ ආර්ථිකය යන්නේ හොම්බෙන් කියලාය. ඒ නිසා, ඉස්සර බැංකුවලට ණය දීපූ ඒයාලාට, දැන් බැංකු වලින් ණය හිඟාකන්න වෙලා තියෙනවාය. ලොක්කා මෙහේ නැති වෙලාවක කිව්ව නිසා හොඳය. ඒ උනාට ලොක්කා ආපු ගමන් මේක කවුරු හරි කනේ තියනවා සිකුරුය. නියෝජ්‍ය එක කෙසේ වෙතත්, ජේශ්ඨ එකක්වත් නැති වෙලා යන්න පුළුවන්ය. ආන්ඩුවේ ඇතුලේ ඉන්න, බටහිර කුමන්ත්‍රණ කාරයෙක්දැයි කියන්න වෙන්නේ, විමල් ඇමතිගෙන අහලාය. ඒත් එයාගෙන් අහන්න මේ දවස්වල බැරිය. එයා මේ දවස්වල බඩුවක් නලවනවාය. සමාවන්න නඩුවක් බලවනවාය.

මුතුහෙට්ටිගම මැතිතුමාට සැටිපිකට් දීපූ දොසතර මහත්තයා ගාවට, අමුණුගම මහත්තයාත් යවන්න වෙන පාටය. මොළේ වැක් කොරගන්න වෙනවාමය. පුංචි බන්ඩා ජයසුන්දර මහත්තයා කියන්නේ සල්ලි ඕන තරම් තියෙනවා කට්ටිය ඉල්ලන්නේ නෑ, වැඩ කරන්නේ නෑ කියලාය. කබරාල් මහත්තයා, සල්ලි වැඩිවෙලා ළොකේ ආර්ථික බලවතා වන ග්‍රීසියේ ඉන්වෙස්ට් කොරනවාය, අද ආරංචි උනේ නිව් යෝක් වල බ්‍රාන්ච් එකක් දාන්නද කොහෙද එහේ බිල්ඩිමකුත් අරගෙන කියලාය. ඒ ඇමරිකාවට ණය දෙන්නය.

අනික අපේ රට සංවර්ධිත රටක්ය, ඒක පුග්ගල ආදායමද ඇමරිකන් අග්ගලාම දේදාහක්ය. 2015 දී හාරදාහක් කොරනවාය. හම්බන්තොට නැව් පෝලිම ඔට්ටේලියාව ගාවට කිට්ටුය. බඩු බාන්න සෙනග නැති නිසා නාමල් බේබිත් යනවාය. ඒ එහේ ඉන්කම්ය. රට පුරා නයිට් රේස්ය. කොච්චර සල්ලි තියෙනවාද කියනවානම් සැටලයිටුත් යවනවාය. කොඩිය අලවලා තියෙන කෑල්ල අභ්‍යාවකාසෙට ඇතුල් වෙන කොට ගැලවිලා විසි උනාට බඩු අපේය. අපේ ඒවාට සේවය කොරන්නේ චීන්නුන්ය. එහෙම අම්බ පඩි ගෙවන්න කොච්චර සල්ලි තියෙනවා ඇතිදය.

ලෝකේ පැන්සොන් ගෙවන එකම පාර්ලිමේන්තුව තියෙන්නේ අපේ රටේය, පැන්සොන් විතරක් නෙමෙය. රජයේ සේවකයෝ ඉන්දෙද්දි, පවුලේ අය සේවයට අරගෙන ගෑණිටයි, පුතාටයි, දුවටයි, දුවගේ දුවටයි, බල්ලටයි ඉතරක් නොව හත්මුතු පරම්පරාවටම ගෙවනවාය. රටට ජාතියට විශාල සේවයක් කොරන ජනාධිපති උපසේනලාටයි, අමාත්‍යංශ උපසේනලාටයි ගෙවනවාය, පෙන්ෂන් යන එකාටත් ගෙදර යන්න දෙන්නේ නැතුව, වී අයි පී ජොබක් දෙනවාය, එහෙම ගෙවන්නේ සල්ලි තිබෙන නිසාය.

ඒ ඇරෙන්න, විදුලි බල මන්ඩලේ අම්බ ප්‍රොෆිට්ය, තෙල් සංස්ථාවේ ප්‍රොෆිට් වැඩිවෙලා නල පුපුරලා සමහර උන් මැරෙනවාය, පාරේ යන උනුත් බැරල් වලට එක්කාසු කරනවාය, අපේ රටේ අභීමානෙද මොකක්ද එක පෙන්නන, ඒයාර් ලංකා, මිහින් ලංකා සල්ලි වැඩෙවෙලා බෝනසුත් ගෙවනවාය, හෙට අනිද්දාට බ්‍රිටිෂ් එයාවේස් උනත් ගන්න පුළුවන් සයිස් එකක් තියෙනවාය, දුම්රිය සේවය වගේම, සිලෝන් ටකරන් බස් සේවේත් එසේමය. ඉඩී අමීන් ගේ මල්ලිට, ටැක්නිකල් කොලේජ් හදලා දෙනවාය, හිඟ නොකා හිඟ කන රටක් වන, මාල දිවයිනේ මග නැගුම කරනවාය, එහෙම කොරන්නේ අහවල් එකෙන්ද කියා අමුණුගම මහත්තයාගෙන අහන්න වෙනවාය.

ඔහොම බැලුවාම, මේ උන්නැහේ කොරලා තියෙන්නේ, ආන්ඩුවට විරුද්ධ අදහස් ප්‍රොකාෂ කිරීමක්ය, බලවත් විපස්සෙට තවත් කරුනු කාරනා සපයා දීමය. මේ වගේ අයට විරුද්ධව දෝසබියෝග ගේන්න ඕනාය. කස්ටියක් අගවිනිසුරු තුමීගේ නඩුව බලවන නිසා. මේකට අස්වරුයි, මර්වින් සිල්වා මහත්තයයි, කළුතර රත්තරන් පුතයි දැම්මා නම් හරිය, විපස්සේ නියෝජනේ කොරන්න, මේ දවස්වල අනාථ වෙලා ඉන්න කරූ මහත්තයා දාන්න පුළුවන්ය. තව ඕනම නම් ඊයේ පෙරේදා සුවාදීන උන, අදීන දේශපාලක, අජිත් කුමාර සහෝදරයාද දාන්න පුළුවන්ය.

බලාගෙන ගියාම කුමන්ත්‍රණකාරයෝ ඉන්නේ ඇතුලෙමයි කියන කතාව සහතික ඇත්තය...

ඔබ සැමට සුබ අනාගතයක්ය....!!!