කැකිල්ලේ තීන්දූ හා මෝඩ ජනතාව - Are we Fools...?

ග්‍රෑන්ඩ්පාස්වල පොඩි වලියක් ගියේය. එදා මම උන්නේ කැලේය. හැමදාම කැලේ උන්නා නම් හොඳයි කියන උනුත් ඉන්නවාය. වැඩියෙන්ම ඉන්නේ එහෙම උන්ය. අද කතා කරන්න යන්නේ ඒ ගැනය. කෙසේ හෝ නිමල් සිරිපාලට අනුව ග්‍රෑන්ඩ්පාස් සිද්ධිය බටහිර කුමන්ත්‍රනයක්ය. එය සනාථ කිරීමටදෝ ඇමරිකන් ඇම්බැසිඩර් නෝනාත් මක්ඛදෝ දෙඩෙව්වාය. එයාලා තමිබියන්ගේ මානව අයිතිවාසිකම් රකින ආකාරය අපි එයාලාගෙම චැනල් වලින් නරඹනවාය. ඒ නිසා අවුලක් ඇත්තේම නැතිය.

මේ ප්‍රශ්නයේ මුල, ෆයිසර් මුස්තාපාය, එයා කොළඹ එකෙක් නෙමේය. කොළඹ තම්බි සලකන්නේ ෆවුසිලාටය. ලොක්කාට ෆවුසිලා දිරවන්නේ නැතිය. ඒ ෆවුසිලා සැටලයිට් නෝනාගේ හාදයෝ නිසාය. ඒ නිසා ලොක්කා ලොක්කාගේ සැට් එකක් හදාගෙන යනවාය. සැටලයිට් ගේ ගෝලයන්ට අල්ලා හා බුදුන්ගේ පිහිටමය. ඉතින් මේ අලුතෙන් ආපු එකාත් මක්කා හරි කොරන්න ඕනාය. ඒ නිසා අලුතෙන් පල්ලි හදනවාය.

එතකොට හංදියක් හංදියක් ගානේ, බුදුපිළිම වඩා හිඳුවන අයගේ සර්වාංගයම බුදු රැස් වලින් නැහැවී යනවාය. ඊට පස්සේ සැදැහැවත් බෞද්ධ ගිහි පරපුර, පල්ලියට ගල් මුල් පොලු මුගුරු වඩම්මනවාය. ඒ තරම් ශ්‍රද්ධා භක්තියක්ය. බුදු හාමුදුරුවෝ දෙසා තියෙන්නේ අම්මා මරා හෝ සාසනේ රැක ගනින් යකෝ කියාය. ඒ නිසා ඕන එකෙකුට පොරි හැලෙන්නම දෙනවාය. ආණ්ඩුවත්, බුද්ධගම රකින්න ව්‍යවස්ථාවෙන්ම බැඳි සිටිනා නිසා, පොලීසියේ ආරක්ෂාවත් අර පින්වත් දායකයින්ට ලබා දෙනවාය.

අන්තීමට බුද්ධිමත් දේශපාලඥයෝ කැකිල්ලේ තීන්දුවකට එනවාය. අවුරුදු සිය ගණනක් තිස්සේ තිබු ඇසටු ගස කපා ඉවත් කරනවාය. අළුත් පල්ලියේ යාඥා වානාය. ඒ උණාට අලුතෙන් අසපු හැදුවාට අවුලක් නැතිය. එකම එක තම්බියෙක් නියම කියුමක් කියා තිබුණේය. එනම් උන් යාඥා කරන තැනත්, බෞද්ධයන්ට අයත් නම් අවුලක් නැත කියාය.ෆයිසර් මුස්තාපාගේ ජීවීතේ දුකම දිනය එයයි කියා කියන්නේ, පල්ලියට ගහපු නිසා නෙමේය. කොළඹ තම්බි ටික එක්කාසු වෙලා පිටින් ආපු තම්බියාට කෙලපු නිසාය.

රතුපස්වලටත්, කැකිල්ලේ තීන්දුවක්ම දී තිබේ. ඒ පස් අප්සට් නම් ෆැක්ටරිය වසා දමනවා කියාය. ඔය පස් හා වතුර "අප්සට්" කියා වාර්තා ආවොත් නම්, අඟහරුගේ පස් චැක් කොරන්නත් "නාසා" එක අපේ උන් තෝරාගන්නවාමය. පස් වලට වඩා, රුපියා වටිනවාය. කෙසේ හෝ, මින් මත්තටවත් මේ වගේ ෆැක්ටරි නිදහස් වෙළඳ කලාපවල පමණක් ඉඳිකරන්න කියා, පැසසිය යුතු මට්ටමේ යෝජනාවක් ඇවිත් තියෙනවාය.

කරුමේ කියන්නේ අපේ එකෙක් පටන් ගත්තෝතින් මිස බටහිර කුමන්ත්‍රණකාරයෝ එන්නේ නැති එකය. අපේ එකෙක් කියන්නේ ඉතින් ලොක්කාගේම එකෙක් විය යුතුය. නැත්නම් ඉතින් කප්පම් ගෙව්වායින් පසු ඉතිරි වන්නේ ආයෝජකයාගේ ඇට දෙක විතරක් නිසාය.

ඒ කතන්දරේ එතනින් හමාරය. කෙනෙක් කියලා තිබුණේ අපි දේශපාලනය කතා කරනවා කියාය. දේශපාලනය කතා කරන අයත් ඉන්නවාය. නමුත් අපිට එහෙම ඇජෙණ්ඩා එකක් ඇත්තේ නැතිය. අපි කතා කරන්නේ සමාජ සාධාරණත්වය වෙනුවෙන්ය. ඒ නිසා අපට පක්ෂ පාට භේදයක් නැතිය. කොයි එකාගේත් වැරැද්ද "හැකි පමණින්" ලියා දමනවාය.

අපත් සමහර විට, "මේ මෝඩ ජනතාව..." කියා ඇදලා අරිනවාය. ඒක නිකන් අපි දෙවියෝ බුදුන් අදහන්නේ නැති උණත්, "බුදු සරණයි" කියනවා වාගේය. එහෙම කීමේ අවුලකුත් මම දකින්නේ නැතිය. මොකෝ බුදු සරණයි ලොරියේ හරක් මසුත් අදින නිසාය.

ඇත්තටම ජනතාව නොදැනුවත්ද?, එසේ නොමැතිනම් දැනුවත් විමේ ආශාවක් නැතිද? කියා ගැටලුවක් මට තිබෙනවාය. හොඳම දේ, පුරවැසි මාධ්‍යයක් කියා දෙයක් මේ ලෝකේ තිබෙනවා කියා දන්නේ අපේ රටේ ඉතා සුළු පිරිසක් වීමය. මේ පුරවැසි මාධ්‍යකරනය කියන්නේ වෙන කිසිවක් නොවේය, ඉස්සර අපේ ගමේ තිබූ, "කට කතා" හා "කැලෑ පත්තර" කලාවමය.

ඒවා බොරු නොවේ, නමුත් සත්‍ය සිද්ධියක් වටා ගෙතුන, ආරළු බූරළු, ඇඹුල් තියාල්, ආටෝප සාටෝපයන්ගෙන් පිරි, සමහර විට සාහිත්‍ය රසයෙන්ද පිරි නිර්මාණයන්ය. මේවා ගද්‍යයෙන් මෙන්ම ඉතාම රසවත් පද්‍යයෙන්ද සමහර විට කියවන්ට ලැබෙනවාය.

දවසක් මම දෙණියායේ ඉඳන් බස් එකේ එනකොට, හුරුබුහුටි කෙළි පැටියෙක්. අයි පෝන් එකෙන් ඇම් පී ෆෝ එන්ජෝයි කරමින් ආවෙය. ටික දුරක් ආ පසු ලැපා එළියට ගත්තේය. පස්සෙ දැනගත් ආකාරයට ටැබ් එකක්ද ඇය සතුය. නමුත් බුකිය පෙරලගෙන බලන්නට පටන් ගත් පසු මමත් ටිකක් හොට දමා බැලුවේය. එයා මම බලනවාට අකමැත්තක් පෙන්නුවේත් නැතිය.

මේ අයිපොඩ්, ටැබ්, ලැප්, පාවිච්චි කරන්නේ, දැනුවත් වීමට නොවේය සෝබනේටය. ඇය රතුපස්වල සිද්ධියක් වූ බව දැන සිටියාය. නමුත්, ඒ රූප පෙට්ටියෙ කියපු ඒවා හා බුකියේ තිබූ දෑ පමණය. නමුත් දෙහිවලින් බසයෙන් බසින් විට, ඇය ප්‍රොක්ෂි වලින් නිව්ස් කියවීම හා බ්ලොග් පිළිබඳවත් දැනුවත් වෙලා සිටියේය.

නමුත්, ඇය දිගටම වෙබ් නිව්ස් කියවාවිදැයි කියා මට ගැරන්ටි නම් දෙන්නට බැරිය. මොකෝ ඒ ඔක්කෝම එයාට තාත්තා අරගෙන දුන් දේ නිසාය. එහෙත් ඊ මේල් මගින් හෝ සමාජ වෙබ් අඩවි මගින් හෝ අප කළ යුත්තේ, ජනතාව තව තවත් මේ නිව්ස් වෙබ් අඩවි වෙත යොමු කිරීමයි. එහිදි පැපරාසි අඩවි වුවද ප්‍රශ්නයක් නැත. මන්ද ඒවා කියවීමෙන්ම, කියවීමේ රුචිය ඇතිවි. පසුව දැනුවත්වීමද, ඉට්ටයිල් එකක් බවට පත්වන නිසාය.

"අපෝ.... ඕක ඔයා දැන්ද දන්නේ.... අපි නම් ජාලේ තීලා කියෙව්වනේ... මෙන්න ඇඩ්‍රස් එක... ඕන නම් ගිහින් බලගන්නකෝ...." කියන එකත් ඉට්ටයිල් එකක් බවට පත් කල හැකිය. අද බොහෝ දෙනෙක් ළඟ මේ තාක්ෂණ උපකරණ ඇති නිසා, මේ පණිවිඩය ජනතාව වෙත ලබාදීමේ වගකීම ඇත්තේ ඔබ අතේය. එවිට ලංකාව කියන්නේ ලෝකය නොව, විශවයේ වැලි ඇටයක් තරමේ මෙලෝ රහක් නැති තැනක් කියා මෙන්ම, තමන්ද නිකංම නිකං ජීවීයෙක් කියනා දේ බණ කියනවාටත් වඩා පහසුවෙන් තේරුම් ගනු ඇත. හින්ගල පමණක් නොව ඉන්ගිරිසි වෙබ් අඩවියන්ද, නොරට පුවත් අඩවියන්ද පරිශීලනය කිරීම වැදගත්වේ. එවිට බ්ලොග් කලාවටත් යහපත් කලක් උදාවනු ඇත.