අධිකාරියට නොපෙනෙන ළමා අපචාර - Increasing incidents of child abuse in Sri Lanka

 
ජනාධිපතිතුමා, දෙමළ භාෂාව ප්‍රගුණ කළ, ආණ්ඩුවේ නිලධාරීන් පිරිසකට සහතික පත් ප්‍රදානය කරමින් අපූරූ කතාවක් කළේය. එනම්, රජයේ කාර්යාලවලට පිරිස් පැමිණෙනුයේ කඳුළු පිරි දෑසින් බවත්, ඔවුනගේ වත් පොහොසත් කම, ජාතිය, ආගම, කුල මල, ගෝත්‍රය නොසොයා, ඉක්මනින් ඔවුන්ගේ ගැටලු වලට විසඳුම් ලබා දෙන ලෙසයි. එවිට සභාවෙන් අත් පොළසන් නාදයක්ද මතු විය. ඇත්ත වශයෙන්ම නායකයා ප්‍රදර්ශනයට හෝ හොටු පෙරෙන පොඩි උන් වඩා ගත්තද, වැද්දන් සමග එකට ඉඳගත්තද, නිලධාරින් නම් වැජබෙන්නේ තමන් වෙනත් ග්‍රහලෝකයකින් රත්නද්වීපයට වැඩම කළ පිරිසක් ලෙසයි.

වැදි නායකයාට ලබා දීමට නියමිත පරිත්‍යාගයක් ලෙස ජපන් රජයෙන් ලැබුණ කැබ් පොජ්ජ පවා වැදි හූරට මන්දො නොකර යටි මඩි ගහනා ඇමතිවරු හා කුරුණෑගලින් තෑගී වශයෙන් දුන් බුලත් පුවක් ටිකෙනුත් ලක්ෂ හතරක් කෙළිනා කාලකණ්ණින් සිටිනා බව, සමහර විට ජනාධිපති තුමා නොදන්නවා විය හැක. ජනාධිපති තුමා එසේ කීවද, රජයේ කාර්යාලයකට යන පුද්ගලයා විඳිනා මානසික අසහනය දන්නේ කුමන හෝ කරුණකට රජයේ ආයතනයකට ගොඩවු පුද්ගලයාම පමණි.

රජයේ නිලධාරීන්ගේ නිරුවත පෙනෙනා, සිත පාරන ප්‍රවෘත්තියකින් අද දින "හිරු" නිව්ස් බැලු මසිත දුකකට වඩා වේදනාවෙන් බර වූයේ, තම කාර්යය නිසි ලෙස ඉටු නොකරනවා පමණක් නොව, සත්‍ය ලොවට හෙළි කරනා ආයතන වලට දෝෂාරෝපණය කරමින්, එම වාර්තා සම්පූර්ණ අසත්‍ය වාර්තා ලෙස අර්ථකථනය කිරීමයි.

පුද්ගලයා වෙන කිසිවකු නොව, රටේ දරුවන්ගේ ආරක්ෂාව සඳහා රජය විසින් පඩි නඩි ගෙවා පවත්වාගෙන යනු ලබන, ප්‍රධානම ආයතනය හෙවත්, ළමා රක්ෂණ අධිකාරියේ "අනෝමා දිසානායක" නම් ස්ත්‍රියයි. මොවුනට මහත්මිය ලෙස ඇමතිම, මහත්මා ගති ගුණ ඇති පිරිසට කරනා අපරාධයකි. ඇය මෙසේ නිෂ්ප්‍රභා කරනුයේ, රටේ දුෂ්කර පළාත් පදනම් කොට ගෙන "යුනෙසෙෆ්" ආයතනය මගින් කරන ලද සමීක්ෂණයක තොරතුරු ඇතුළත් වාර්තාවකි. එම වාර්තාව අවශ්‍ය කෙනෙක් වේ නම් මෙතනින් බලන්න.

මේ වාර්තාව මගින් හෙළි කරනුයේ, අළුත් ප්‍රවෘත්තියක් හෝ අප නොදන්නා යමක් නොවේ. මහ පොළොවේ පය ගසා ජීවත් වන, පුවත් පත් වෙබ් අඩවි පරිශීලනය කරනා සියලු දෙනාම දන්නා. නමුත්, කොළඹ ශීත කාමරවලට වී, මේකප් පුරවාගෙන තම සාරි ප්‍රදර්ශනය සඳහා වොයිස් කට් ලබා දෙන පඩත්තල නෝනා මහතුන්ට නොපෙනන තිත්ත නමුත් ඇත්තම ඇත්ත වූ පරම සත්‍යයයි.

රටේ ග්‍රාමිය පෙදෙස් තුළ අඩු වයසේ විවාහයන් සිඳු වන බව රහසක් නොවේ, ගොවි ජනපදවල, වතු කම්කරු පවුල් තුළ, නැගෙනහිර මුස්ලිම් ගම්මාන හා උතුරේ අවතැන් දෙමළ ජනතාව අතර, බාල වයස් විවාහ බහුලව සිඳු වන බව, එම ප්‍රදේශ වල ජීවත් වන්න වුන් මෙන්ම, එම ප්‍රදේශ ගැන කිසියම් හෝ දැනීමක් ඇති අය නොදන්නා දෙයක් නොවේ. අනෝමා දිසානායක ඒවා නොදන්නවා යයි කියන්නේ, ඇය ජීවත් වන්නේ කොළඹ නිසාද? නො එසේ නම් ඇයට මේ රැකියාව ගැන දැනීමක් නොමැතිද?

පුවත් පතක් අතට ගත් විට ළමා අපචාර, ළමා දූෂණ නොමැති පිටුවක් සොයා ගැනීමට නොහැකිය. දැන් දැන් වාර්තා වනුයේ අත දරුවන් පවා දූෂණයට, අපචාරයට ලක් වන බවයි. වාර්තාව මගින් පෙන්වා දී ඇති පරිදිම වයස 4-5 මල් වන් කුඩා දරුවන් දූෂණයට ලක්වු අවස්ථා අනන්තවත් මා කියවා ඇත. විශේෂයෙන් ගොසිප් නිව්ස් අඩවි වල, රස කර කර නැව නැවතත් දූෂණයට ලක් කරන්නේ මෙවන් වාර්තාමය. අවම වශයෙන් ළමා රක්ෂණ අධිකාරියට "ලංකාදීප" පුවත් පත වත් මිලදී ගන්නේ නැතිද? ඇයගේ පසෙකින් තිබෙනා ඔය පරිගණකයේ අන්තර්ජාල පහසුකම් නොමැතිද?

මේ වෙන කිසිවක් නොව තම රාජකාරිය නිසි ලෙස ඉටු කිරීමට නොහැකිව, තම අසමත් භාවය වසාගැනීමට දෙශනා මුසාවාද හැර වෙන කුමක්ද? කනගාටුවට කරුණ නම්, මෙවන් අධම තත්වයකට පත්ව තිබෙනුයේ, කලක් ශ්‍රේෂ්ඨ මිනිසකු වූ "මහාචාර්ය හරේන්ද්‍ර ද සිල්වා" යටතේ, විශාල කාර්ය භාරයක් ඉටු කල ආයතනයක් වීමයි.

යුන්සෙෆ් ආයතනය පෙන්වා දෙන කරුණු හැර, නූරීවත්තේ සිඳුවූ ළමා අපචාර, සාරුවා සුනිල් නැමැති ජඩ දේශපාලඥයා විසින් කළ, මහ පොළොව නුහුලන අපරාධ, ගරුතර ස්වාමීන් වහන්සේලා තෙල් බෙහෙත් උලනා මුවාවෙන් සිඳුකරනා ළමා අපචාර මෙන්ම දහම් පාසලේ සිසුවියන් නීල් චිත්‍රපට සඳහා යොදාගැනීම වැනි කිසිවක්, අනෝමා දිසානායක නොදන්නේද?

අවසාන වශයෙන් අපට කීමට ඇත්තේ කරුණාකර තම නොහැකියාව ලොවට පෙන්වා තනතුරට නිගා නොකර, වාචාල කටට මුකවාඩමක් දමාගෙන සේවයේ යෙදෙන්නේ නම් මැනවි යයි කියාය. රටේ දරුවන්ගේ තාත්තා දරුවන් වඩාගෙන හුරතල් කළද, ළමා අධිකාරියේ අම්මා පිස්සු ගැහැනියක් නම්, ඒ රටේ ළමා පරපුරට, ළමා රක්ෂණ අධිකාරියේ රක්ෂණය කෙසේ වෙතත්, තිස්තුන් කෝටියක් දෙවිවරුන්ගේ පිහිට ආරක්ෂාවම රැකවරණයම ලැබේවා..!

"ශ්‍රී ලංකාව සෑම විනාඩි 90 කට වරක් ළමා අපරාධයක් සිඳුවන රාජ්‍යයකි."