හරක් මස්, හරක්, චීවර හා චීන අඩී - Beef and Bulls

සුපියල් පන්දාහක බඩු ගත්තාම, සුපියල් පහේ සිලි සිලි බෑග් එක පිරෙන්නෙත් නෑ කියා, කරූ කියලා තියෙනවාය. ඒකට හරියන්නේ අපේ ඕල්වේස් ෆනී, ජොනී ඇමතිතුමා පෝර උරේක 5000 ක බඩු දාගෙන ඇවිල්ලා පෙන්නනවාය. ඒ බඩු අතරේ බීෆ්, චිකන්, ෆිෂ් එහෙම තිබුනාද කියා නම්, හරියට දැක්කේ නැතිය. ඒ කෙසේ වෙතත්, බීෆ් කන්න එපෝ කියා, චීවරධාරියෝ සැට් එකක් පිටකොටුවේ ඉට්ටේසොන් එක ඉස්සරහා ගිනි තියාගෙන බා බේ කිව් එකක් දාන්න සැට් වෙනවාය.

ඔයිට කලිනුත්, දළදා මාලිගාව ඉස්සරහම එක්කෙනෙක් බා බේ කිව් (BBQ) එකක් දාගත්තේය, සම හරක් නම් කිව්වේ, ඒක උත්තම පූජාවක්ය කියලාය. නිවන් දකින්නට ඒකම ඇති කියලාය. ඇත්තටම ඒක එහෙම සීන් එකක් නම්, බා බේ කිව් දාන, බීෆ්, පෝක්, ෆිෂ්, මටන්, චිකන් අයිති කස්ටියත් ඔක්කෝම නිවන් යනවාම ඇතිය.

මොකෝ එහෙම ගිනි ගොඩකට කැමැත්තෙන්ම පැනලා, බා බේ කිව් උන හාවෙකුට උපහාර පිණිස, සක්කරයා හරි, එයාගේ ආටිස්ට් කෙන්ක් හරි, හඳේ හාවෙක් ඇන්දා කියා, හතර පෝයටම සිල් ගත්තු අපේ ආච්චි කියා දීලා තියෙනවාය. එහෙම බැලුවාම නිවන් දකින්න හොඳම කොරමේ, කුකුලෙක් වෙලා ඉපදෙන එකය.

ලංකාවේ තම්බි සැට් එක, 10% විතර ජනම් එකක් ඉන්නවාය. ඊළඟට ක්‍රිස්මස් සෑට් එකත් ඔක්කෝම 9% විතර ඉන්නවාය. ඒ දෙගොල්ලා ගත්තාම විතරක් 20% විතරය. ඒ ඇරෙන්න, කුකුලා, කලුකුමා, තාරාවා, ඌරා, එළුවා, බැටලුවා, වල් ඌරා, මී හරකා, මී මින්නා, කබැල්ලාවා, ඉත්තෑවා, තලගොයා, වඳුරා, ගෝනා, මුවා, හාවා, ආදී එකි මෙකි නොකී සියළු සතුන් මරා ගෙන කන, බුදුන් වැඩි දේශයේ, සැදැහැවත් බොදු ගොවි, කරා, වහුම්පුර, දේව, බෙරව, අරව, මේව, ඔක්කෝම කුළ ගෝත්තර වලට අයිති, නිවන් දකින්නට පෙරුම් පුරනා බෞද්ධයෝ, හරකාටත් ගේම දෙනවාය.

"හුනා නොකන්නේ රෑටය..." කිව්වා වාගේ, අපේ උන් තාමත් නොකන්නේ, බල්ලොයි, සරුපයොයි, කැරපොත්තොයි, විතරමය. අනේ ඉතින් මේ හරකාට මාර ආදරේ කරනා සම හරක්ට, තල්මස් පැටව් සයිස් කෙලවල්ලෝ, බලයෝ එහෙම මැරෙණා එකට මෙලෝ හෙනයක් නැත්තේය. දවසකට නිවන් දකිනා ලක්ෂයක් විතර කුකුලන්ගේ පණ, පණ නෙමේය. සමහර විට අනෙක් සත්තුන්ගේ පණ, කොයි පණ වෙන්නට ඇතිය.

ඔය කොටුවේ ඉස්සරහා ඉන්නා සැට් එක, නුවර ඉඳලා එනවා මගේ ඇස් දෙකටම දැක්කේය. මුළු නුවර පාරම අහුරාගෙන, ඩිමෝ බට්ටෙක් ඉස්සරකර ගෙන, වැඩිම උනොත් 50ක් විතර එන්නට ඇතිය. ඔය අස්සේ, සිවුරු පොරවා ගත්තා කරාලා 18-20 කුත් විතර උන්නේය. සාමාන්නියෙන් අපි හාමුදුරුවරු කියන්නේත්, ළෝකයා බෞද්ධ භික්ෂුවක් ලෙසින් හඳුනන්නේත් චීවරය නියමාකාරයෙන් දරා ගත්, ඉතා ශාන්ත දාන්ත ගමනින් බිම බලාගෙන සන්සුන්ව වඩිනා පූජකයෙක්ය.

ඒත් මේ ආපු 18 දෙනාම ආවේ, සිවුර පෙරවාගෙන, අර ඇමතිලාගේ උණටත් වඩා දරුණු ගනයේ, මැලේරියා උණ හැදුනු බොඩිගාඩ්ලා වාගේ, එහෙම නැත්නම්, වලියට යන චොප්පේ අයියලා වාගේය. ඒ කියන්නේ ඕනම වෙලාවක ගේමට රෙඩි වෙලාය. තිබුනේ පුදුම උණක් කියා තහවුරු වෙන්නේත්, කාට හරි කෙලිනකන් බලාගෙන ඉන්නා සෙට් එකක් කියලාත් තේරෙන්නේත්, කොහේදෝ යන කොල්ලෙකුට, බුදු බණ වලින් නෙලූ ආකාරය දුටු විටය.

සමහර විට ඒ කොල්ලා බොහෝ පින් කරපු කොල්ලෙක් වන්නට පුළුවන්ය. මොකෝ, උතුම් වූ සංඝරත්නයෙන් කනවා කියන්නේ, ආයේ ඉතින්.... බුදු හාමුදුරුවන්ගේම කෑවා වගේ නිසාය. මක් නිසාද යත්, බුදු සාධු රෙස්ප්‍රසොන්ටේටිව් කොරන්නේ, මෙවන් උතුම් ශ්‍රද්ධාසම්පන්න බෞද්ධ පුත්තරයන් නිසාය.

මේ පිස්සු යක්කු ටික, මේ විනාෂ කොරන්නේ, බුද්ධාගමේ ගෞරවයය. බීෆ් කන්න එපා කියන්න උපවාස කොරන්න ඕනා නැතිය. ඔය පාර්ලිමේන්තුවේ ඉන්නා හරක් සෙට් එකක් අල්ලාගෙන, හරක් මරන එක ගැසට් පත්තරේකින් නවත්තලා දැම්මාම වැඩේ ඉවරය. ඒත් එහෙම කෙලි එයාලාට කොරන්න බෑ කියලා එයාල හොඳින් දන්නවාය.

ඒ මොකෝ, පාර්ලීමේන්තුවෙත්, පෝක් තහනම් කොරලා, බීෆ් කන හලාල් සැට් එක, එයාලාට වඩා බලවත් නිසාය. අනික ජිනීවා වල දැන් යන්නේ, යුද්ධ අපරාධවලටත් වඩා, ඊට පස්සේ අන්‍ය ආගමිකයින්ට කරනා අකටයුතුකම් හා අසාධරණකම් ගැන කේස් නිසාය. පල්ලි ගිනි තියා, කුරුස කඩා, ගේම් අදින ඒවා, මේ ගොන් හරක් දන්නේ නැති උනාට, මුළු ළෝකෙටම යනවාය. ඒවා මිනිසුන්ගේ නිදහස හසුරා දැමීම්ය.

එයාලා නොකෑවාට, ලංකාවේ අවම වශයෙන් 25% ක් වත් කන කෑමක් නවත්තන්න කියලා ඉල්ලන්න එයාලාට කිසිම අයිතියක් නැත්තේය. අනික පැස්ටෝල් දාගෙන ගිනි තියාගෙන ගිනි පූජා කොරන්න ඕනා නම් කොරන්න තියෙන්නේ පැස්ටෝල් බුලි අත් අඩංගුවට ගන්නා එක නොව, වක්කර ගත්ත ගමන් ගිනි කූරක් ගහනා එකය. මොකෝ ඒක මහා පුන්‍ය කර්මයකට අත ගැසීමක් වන නිසාය.

බුදුන් වහන්සේ දේශණා කලේ මේ හරක් වැඩ කරන්නට කියා නෙමේය. උන් වහන්සෙගේ නමත් කන, මේ හරක් රැල අල්ලා බැඳ දැම්මේ නැත්නම්, ජිනීවා වල කෙසේ වෙතත්, මේ රටේම මහා විනාශයක් සිඳු කරනා බව නම් බුදු ෂුවර්ය. පක්ෂ විපක්ෂ හැම එකාටම පිරිත් නූල් බඳිනා මහ නා යකා හමුදුරුවන්ට මේවා නොපෙනෙන්නේ, සාසනේ කරුමයකටද, ජාතියේ කරුමයකටද, රටේ කරුමයකට කියා දන්නේත් හරකුන්ම වෙන්න ඕනාය.