දඹුලුගලේ...දඹුලුගලේ.. - Dambulla Cave Temple

දඹුලුගල කිව්වහම මතක් වෙන්නේ, දඹුල්ලේ තියෙන රන් ගිරි දඹුලු විහාරේ. ඒක අපි පොඩි කාළේ ගියපු විහාරෙ නෙමෙයි දැන්. නිකන් වෙනින් රටක පන්සලකට ගියා වගේ. පර්වතෙටත් වඩා විශාල සමාධි බුදු පිළිමයක් ඉස්සරහම තියෙන, පිට රට පන්සලක් වගේ විහාරයක්. දඹුල්ල ළෝකෙම පරසිද්ධ ගල මුදුනේ තියෙන ලෙන් විහාර පහ නිසා.

මේ ගැන නම්, පුංචි පොතක් උනත් ලියන්න පුළුවන්. හේතුව, මේක පොඩි කාළේ ඉඳන්ම මගේ ෆේවරිට් සබ්ජෙක්ට් එකක් නිසා. අනිත් එක, වත්මනේ මගේ ජීවෝනපාය නිසා. ඒත් අද ලියන්න යන්නේ ලෙන් විහාර ගැන නෙමෙයි. ගොඩක් දෙනා අහලා නැති දඹුලුගලේ කියන සුන්දර ගීතය ගැන ලියන්න.

අපි පොඩි කාළේ ට්‍රිප් යනකොට, අපේ අම්මලා තාත්තලා කියපු ගීත, අපි අද කියන ඒවා නෙමෙයි. එයාලගේ වෙනම සින්දු සෙට් එකක් තිබුනා. ඒ අතරින් මේ චිත්‍රා සෝමපාල හා පී ඇල් ඒ සෝමපාල යුවලගේ ගීත බොහෝම ජනප්‍රියයි. "ඉසුරුමුණියෙහී පැතලි ගලක ඒ..", "දුන්හිඳ හැලෙනා...", "ලලිත කළා ඔප කරනා... සීගිරි ළඳුනේ..", "යමුනා යමුනා සෝභන ගංගා...", "උඩරට කඳුකර සිරියා පරදන.." "දකුණු ළකේ අග නඟරේ ගාළු පුරේ සිරි..." කියන ගීත ඒ අතරින් කීපයක්.

ඒ වගේම ජනප්‍රිය ගීතයක් තමයි මේ, "දඹුලුගලේ.....//" කියන ගීතයත්.. මේ ඔරිජිනල් ගීතය ගායනා කරන චිත්‍රා හා පී ඇල් ඒ සෝමපාලයන්මයි. ඒත් ඔරිජිනල් මියුසික් නම් නෙමෙයි. පටිගතකිරීමකට කරණ ලද නැවුම් සංගීතයක්.

ඒ දෙන්නගේ ගීත වල තිබුනේ වෙනස්ම වූ රසයක්. එකේ අමුතු දේශීය ගතියකුත් තිබුනා. ඒ වගේම පී ඇල් ඒ ගේ ගීතවල අනන්‍යතාවයක් තිබුනා. ඔවුන් ජීවත් උනේ කොළඹ හතේ බගතලේ පාරේ. ඒ නිසා ඔවුන් දෙපොල වෙනම පන්තියක් නියෝජනය කරන ගායන යුවලක්ද උනා. ඒ හේතුව උඩ වෙන්න ඇති. එයාලගේ පුතෙක් වන චිත්‍රාල් බිහිවෙන්නේ. 

චිත්‍රාල් අපි දන්න කාලේ ඉඳලම ප්ලේ කලේ, වෙස්ටන් බෑන්ඩ්ස් වල. පස්සෙ එයා රොක් ඉස්ටයිල් එක තෝර ගන්නවා. කාලයක් නිහඬව ඉන්න චිත්‍රාල්, ආයෙත් අපි අතරට එන්නේ "නදී ගංඟා තරණයේ..." කියන සුපිරි ගීතයත් එක්ක. ඊළඟට මේ මෑතකදි ජනප්‍රිය වෙන්නේ "මිරිඟුව පරදා....." කියන ගීතයත් එක්ක...

මේ ඔක්කොම රොක් ස්ටයිල්.. රොක් ස්ටයිල් කියන කෙනෙකුට, රෙගේ ඉස්ටයිල් එකට කියන එකත් මහ දෙයක් නෙමෙයි.. මේ ළඟදි දෙරණ ඩෙල් ස්ටූඩියෝ කියන වැඩ සටහනෙදි, චිත්‍රාල් දඹුලුගලේ ගීය ගායනා කරනවා. තනුව වෙනස්, සංගීතයත් වෙනස්, නැවුම් සංගීත සුසංයෝජනය මහේෂ් දෙනිපිටියගේ. ඒ කීර්තිමත් පැට්‍රික් දෙනිපිටයගේ පුතෙක්. ඒකේ අපූරු රසයක් තියෙනවා. සම හරක්ට නම් මේ වෙනස දිරවන්නේ නෑ. ඒත් මේ වගේ දේවල් වලට මම නම් බොහෝම මනාපයි...

මේ චිත්‍රාල් වගෙම රෝක් ස්ටයිල් එක අපේ රටේ ගෙනියන්න තව පොරක් එනවා. ඒ තමයි ඉන්ද්‍රචාපා ලියනගේ.. ඒත් මේ ඔක්කෝම පරද්දන එකෙක් දැන් ඇවිත් ඉන්නවා දෙරණ ඩ්‍රීම් ස්ටාර් තරඟයට.. නම හර්ෂ දනෝෂ් ගම මහනුවර.. ඉස්සෙල්ලා අහලා ඉන්නකෝ..

ටැලන්ටඩ් එකෙක්ට හරි ගීතයක් අහු උනොත්, ඌ ඒක ඔරිජිනල් ගීතයටත් එහා ගිය සුපිරි නිර්මාණයක් කරනවා. මේක විදේශ රටවල් වල, විශේෂයෙන් බටහිර සංගීතයේ නම් සුළු දෙයක්. මයිකල් ජැක්සන් ගායනා කරලා, මුළු ළෝකයම වැළඳ ගත් සමහර ගීත, කලින් ගායනා කරපු ගීත බව දැන ගත්තේ පස්සෙ කාලේක. ඒවගේම තමයි බොහොමයක් රෙගේ ගීත. බොනිඇම් කණ්ඩායම ගායනා කළ ගීත.

ලංකාවේ තියෙන හොඳම උදාහරණයක් තමයි, සංගීත් විජේසූරිය ගායනා කරපු "රඟහල දැන් ඇත අඬ අඳුරේ..." ගීතය. ඒක විජේරත්න වරකාගොඩගේ ගීතයක් කියලා කවුරුත් දැනගන්නේ, සංගීත්ගේ ටැලන්ට් එක නිසා..

ඒ වගේම තමයි, අතුල අධිකාරිගෙ සංගීතයට, හර්ෂ දනෝෂ් ගායනා කරන "දඹුලුගලේ...//" ගීතය. ගොඩාක් වෙලාවට හර්ෂ අවසන් තරඟයට යන එකක් නෑ. මොකද සිරසෙ වගේ, දෙරණේ එහෙම කොම්පැණි ඇජෙන්ඩා එකක් නැති නිසා.  ගායනා තරඟයකදි මම දැකපු, පට්ටම් ක්ලියර් වොයිස් එකක් මේ යකාට තියෙන්නේ.

හර්ෂ වගේම තවත් ටැලන්ට් බුවෙක් තමයි, ඇඹිලිපිටියෙන් ඇවිත් ඇම් ඇස් ගේ සින්දු කියන එකත්. ඒ වගේම විශේෂයෙන් කියන්න ඕන, දෙන්නෙක් තුන්දෙනෙක් ඇර, අනික් ඔක්කෝම සිරසේ ඉන්න උන්ට වඩා, කෝටියක් ඉදිරියෙන් ඉන්නේ. කවුරු කොහොම දින්නත්, ලංකාවේ නොම්මර එකේ රොක් ගායකයා හර්ෂ දනෝෂ් වෙන එක නම් කාටවත් වලක්වන්න බෑ කියන එක. රොක් ස්ටයිල් එක දන්න ඕන කෙනෙක් පිලිගනිවී.

වෙලාවක් ඇතොත් බලන්න බොරුද කියලා...