කතරගම දෙවියෝ - Katharagama

මාතලන්ට ඕන උනා, කතරගම දෙයියෝ හම්බ වෙන්න. මොකෝ ඔය ඌව ඡන්ද ප්‍රතිඵලේ ගැන සමීක්සොන, විස්ලේසොන, ප්‍රතිසත අනම් මනම් ගනන් හැදිලි කොරලා වැඩක් නෑ. කෙලින්ම කතරගම දෙයියෝ හම්බ උනාම වැඩේ ඉවරයි. ඉතින් ඔහේලා හිතන්න ඇති, ඔය අනෙක් උන් වගේ මම පළතුරු වට්ටියකුත් උස්සගෙන, දෙයියෝ හම්බ වෙන්න යන්න ඇති කියලා නේ.

නරපනුවන්ට තියෙන පෝලිමේ නෙමෙයි, VIP පෝලිමේ ගියත්, විනාඩි දෙක තුනක් ඇතුලේ ඉන්න බැරි සයිස් එකක් දැන් තියෙන්නේ. කතා කරන්න තියා. අතට අත දෙන්නවත් හම්බ වෙන්නේ නෑ. අනික, එහෙම හම්බ වෙලා වැඩකුත් නෑ. මේක නිකන් මේ දේශපාළණ සංවදයක් වගේ එකක් නේ. අනික එයාට ෆේස්බුක් එකවුන්ට් එකක්වත් ඉස්කයිප් වත් නෑ නේ.

පටන් ගත්තා වැඩේ. වහගත්තා කාමරේ. ඇඳගත්තා කිරිටොයියා වගේ සුදු සරමක්. උඩට සුදු මේස් බැනියම. බැඳගත්තා ඉනේ බෙල්ට් එක වෙනුවට, කුරහන් සාටකේ. තව ඒ පාටම එකක් අරගෙන ඔළුවේ බැඳගත්තා. මොකෝ, කරේ දාගත්තා නම් කතරගම දෙයියා උනත් බය වෙනවා, ලොක්කාය කියලා හිතලා. එහෙම හිතන එකකුත් නෑ. මාතලන්ට උඩු රැවුල නෑ නේ. ඒත් ඉතින් ඕක කරේ දාගෙන යන තව තුන් හතර දෙනෙක් ඉන්නවනේ. මොකටද නිකන් දෙවිවරු අපහසුතාවයට පත් කරන්නේ.

කෑම මේසේ පුටුවක් අරගෙන, ඒකේ ඉඳගන්න කෑල්ලේ. මල්, බුලත්, පළතුරු (ගෙඩි පූජාව) හඳුන්කූරු, කපුරු, පොල් ගෙඩියක්, අරවා මේවා ඔක්කෝම තියලා, Rs. 1000 කොලේකුත් තියලා, දන්න සොලෝක ගාථා අනම් මනම් ඔක්කෝම කියවනවා. කෝ.... ම්හූ..... ඒ පාර Rs. 2000 කොලයක් දාලා, ආයෙත් පටන් ගත්තා. කෝ... ඒත් නෑ.

ඒ පාර Rs. 5000 කොලයක් එහා ගෙදරින් ණයට ඉල්ලගෙන, ඒක තියලා, දන්න ඔක්කෝම එක්ක, කතරගම දෙවියෝ වඳින, නා දිං තිලක නදිං, කොහොඹ කළේ උකුලේ තියන්, මෝලම් පාරට නටලා සී ඩී එක දාලා, කාවඩි පාරකුත් දැම්මා. ඒත් ආවේ නෑ අප්පා.

මේ සද්දේ ඇහිලා නෝනා ආවා කාමරේට.

ඒ පාර මොකක්ද මේ නටන පිස්සුව? ඒ පාර තොවිල් නටන්න පටන් ගත්තද? දැන් කාලයක් තිස්සේ කාමරේ වහගෙන බොග දානවා. ගන්දස්සාරේ බෑ. අපිට ඉන්නත් නෑ. රටේම ඉන්න කාලකන්නින්ගෙන් එක එක කතා අහන්න වෙලා තියෙන්නේ අපිටයි, අර අහිංසක මගේ නැන්දම්මටයි. මොකක්ද ඒ පාර කරන්න හදන්නේ?

මම මොකා එක්ක වලි දාගත්තත්, නෝනා එක්ක වලි දාගන්නේ නෑ. ඔය ඉතින්.... බයටම නෙමෙයි. එහෙම කරන්න හොඳ නැති නිසා. ඒ පාර මම එයාට ඇත්තම කිව්වා. ඇත්තටම අපේ හාමිනේට මේ වගේ වැඩ ගැන විශාල අවබෝධයක් තියෙනවා. ඇත්තටම එයාට දුක හිතුනා.

දෙයියෝ එන්නේ නෑ අනේ... ඔයා හොයා ගෙන. නිකන් පිස්සු කෙලින්නේ නැතුව, ඔහේ යනවා එයා හොයාගෙන.

කොහොමද අනේ මම උඩ යන්නේ.? එයා ඉන්නේ දිව්ව විමානේ නේ...?

ඇයි අර ඔහේ ගාව පෙට්ටි වල දාලා තියාගෙන ඉන්නේ, පූජා කරන මල් වගයක්. ඒවා ගැහුවාම  හඳට යනවා කියලා නේද කියන්නේ?

අම්මපා හැබෑව. ඕක අමතක උනානේ. හරි හරි නෝනා එහෙනම් එලියට යන්න. මම මලක් පූජා කරලා ඒ පැත්තේ ගිහින් එන්නම්.

ඔන්න දැන් මම මේ හඳට යන ගමන්. "සින්ග්" ගාලා කන ගාවින් SA-11 මිසයිලයක් ගියා. නූලෙන් බේරුනේ. අප්පට හුඩු මේ කොහෙද මම? යුක්‍රේන් පැත්තට ඇවිත්. තව පොඩ්ඩෙන් MH-17 එකට වෙච්චි දේ මට වෙන්නේ. ටක් ගාල හැරිලා මගේ 5G ෆෝන් එකෙන් නැවිගේටරේ දාගෙන කතරගම පැත්තට ආවා. නිකන් හාල් පාරු දෙවිවරු හිටියට තේජස් පොරක් පේන්න නෑ. එකෙක්ගෙන ඇහුවම එයා කියපි. කතරේ දැන් මෙහේ නෑ. එයා ඉන්නේ වැඩහිටි කන්ද පැත්තේ කියලා. ඒ පාර කතරගමින් ආප්පයක් කාලා ආයේ ගියා වැඩහිටි කන්ද පැත්තට.

එකෙක් දෙන්නෙක්ගෙන අහගෙන, හොයාගත්තා කතරගම දෙයි හාන්දුරුවෝ ඉන්න තැන. ඉතින් මම ගිහින් දෝත් මුදුන් දීලා වැඳලා පැත්තකින් ඈඳීගත්තා.

Who are you..?

අම්මටම හැමිනියන්.., මම උඩ ගියා.

මම මේ මාතලන්.

ආ හින්ගල පුළුවන්?

අනේ හොඳටම පුළුවන් දෙයි හාන්දුරුවනේ.

මම හිතුවා, පොත්තත් සුදු නිසා, සිංහල බැරුව ඇති කියලා. මොකෝ ඔය VIP එකෙන් එන ගොඩක් අයට හින්ගල බෑ.

තව ගොඩක් අය එනවා ඇති ඔබ වහන්සේ බැහැ දකින්න.?

අපෝ එනවා. ඒ උනාට මම එයාලට පේන්න යන්නේ නෑ. ඔහේ තමයි මේ බලංගොඩ ආනන්ද මෛත්‍රීයය හාන්දුරුවන්ට පස්සේ මාව හම්බ උනේ.

අනේ කොච්චර දෙයක්ද. මම හිතුවේ ඔබ වහන්සේ අර ගොල්ලත් එක්ක හැමදාම සෙට් වෙනවා ඇති කියලා.

මොන ගොල්ලොද?

අර සාටකේ දාගත්ත සෙට් එක.

හපෝ මතක් කරන්න එපා.

ඒ මොකෝ මයේ දෙයියෝ?

නෑ ඉතින් මගේ ටයිටලෙටත් කෙලියේ ඒ සෙට් එකනේ.

ඒ කිව්වේ කතරගම කෑල්ලට? එතකොට ඔබ වහන්සේ දැන් කතරගම දෙයියෝ නෙමෙයිද?

පිස්සුද..? මම ඇවිල්ලා ජේශ්ඨ කතරගම දෙවියෝ. හරියට අර ජේශ්ඨ කතිකාචාරයවරු, මහාචර්‍රයවරු, ඇමතිවරු වගේමයි.

එතකොට ඔය මිනිස්සු ඔබ වහන්සෙට කියලා, පෝලිමේ ඇවිත් පූජා කරන ඒවා අපරාදෙනේ?

නෑ ඉතින් එහෙමමත් නෑ. මට පූජා කරාට, මට කන්න හම්බ වෙන්නේ නෑ නේ. ගේන උන්ම මළ පෙරේතයෝ වගේ ඒ ටික කනවනේ.

නෑ මම කිව්වේ සල්ලි කොල?

ඒවා අපරාදයක් වෙන්නේ නෑ. ඒවට වග කියන්න ඉතින් කපු මහත්තුරු, නිළමෙවරු ඉන්නවනේ. කී දෙනෙක් නම් ඕකෙන් කාළා බීලා ඉන්නවද?

අනේ.., එහෙනම් මම ආපු කාරනෙන් වැඩක් නෑ?

ඒ මොකක්ද ඒ?

ඌවේ ඡන්දේ ගැන ඔබ වහන්සෙගෙන් ප්‍රෙඩික්ෂන් ටිකක් අරගෙන, මගේ වගේ දාන වැඩේ.

ඒකට ඉතින් මම හම්බ වෙලා හරියන්නේ නෑ නේ. ගිහින් කතරගම දෙවියෝ හම්බ උනා නම් හරි.

ඒ කිව්වේ අර ඌවේ මහ ඇමතිට ඉල්ලන දෙයියද?

එයා මොන දෙයියද..? දෙයියා ඉන්නේ කොල්ලුපිටියේ.

ඕන දෙයක් ඉල්ලගන්න, දැන ගන්න, ඒ දෙයියා ගාවට ගියා නම් හරි.

.o0O0o.

සටහන - කතරගම ගැන හොඳින් දන්නා කෙනෙකු පැවසූයේ, කතරගම දෙවියන් එහි නොමැති බවත්. දැන් වැඩ සිටින්නේ, වැඩහිටි කන්දේ බවත්, එහි භාවනානුයෝගීව සිටින බවත්, කතරගම පුද බිම "කඩවර" දෙවියන්ට බාර දී ඇති බවත්ය. "කඩවර" යනු එසේ මෙසේ දෙවියකු නම් නොවේ. දෙවිවරුන් ගැන දන්නා කෙනෙකුගෙන "කඩවර" දෙවියන් ගැන විමසා දැනගන්න.