ඇදෙගන නානා ආන්ඩුවට බජට් යෝජනා - Budget Proposals for Interim Governmant

අපේ ඇදගෙන නානා ආන්ඩුවේ මුදල් ඇමති කම හම්බ උනේ, රවී කරුණානායක උන්නැහේටය. මේ ආන්ඩුව ඇදගෙන නාන බව මාතලන් කීවේ, ආන්ඩුව පත්වූ පසු ලියපු පළමු ළිපියෙන්මය. ඒ, ආන්ඩුවේ පළමු පත් කිරීමට එරෙහිවය. එහෙම ලිව්වේ මේ ආන්ඩුව ගැන අහිතකින් නොවේය. ඇති ආදරය නිසාමය. මේ ආන්ඩුවේ පළමු පත්වීමම අමුම අමු පිස්සුවක්ය. ඒ පචවාහිනියේ මුල් පුටුවය. අදත් එය පචවාහිනියක්මය. ආන්ඩුවේ පම්පෝරි ඇර, මේ රටේ වෙන කිසිම නිව්ස් එකක් ඒකට නිව්ස් නෙමේය. අපි කිව්වේ මේ වාගේ කම්බ හොරු දාගත්තොත්, නාන්න වෙනවා කියාය. කිව්වා වාගෙම, රවි කරුණානායක චෝදනා එල්ල කළ, තැප්‍රොබේන් ගිණුම කිසි අවුලක් නැති ගිණුමක් කියා, රවී කරුණානායක කිච කරලා දැම්මේය.

පාවෙන ආයුධ ගබඩාව, කිසිම අවුලක් නැති නීත්‍යානූකූල අවි ගබඩාවක් කියා, තම සහෝදරා ලවාම බෞතීස්ම කර දැම්මේය. (තවත් ස්ථාන තුනක ආයුධ ගබඩා ඇති බව, මේ වන විට සොයා ගෙන ඇත.) අපි මේ පත්වීමට එරෙහිව, පෞද්ගලිකව හිතවතුන්ට කතා කරනා විට, හැම එකාම කිව්වේ, "පොඩ්ඩක් හිටහන් මචං..., මේ වැඩේ වෙන්නේ නෑ.. කියාය. "විවේචනය පොඩ්ඩක් නවත්තන්න..." කියලාය. එහෙම කිව්වාට වෙන්න යන්නේ කුමක්ද කියා අපට නම් හොඳටම තේරුනේය. අඩුම ගානේ නයි ටී ඇන් එකට දාපු ජාතියේ මනුස්සයෙක් වත්,  පචවාහිනියට දාගන්න බැරි වීම ගැන නම්, අදටත් අපට ඇත්තේ කනගාටුවක්මය. අප එදා පලකළ අනාවැකි අද ඇස් ඉදිරිපිට සනාත වෙමින් තිබෙන්නේය.

ඊළඟට රෙද්ද අස්සේ දාගත්තේ, සියොළඟෙහිම විෂ පිරි නපුරු දුදනන් දෙන්නෙක්ය. උන් දෙන්නාම 9 වෙනිදා උදේ පාන්දර වෙනකන් මහ රජ්ජුරුවන්ගේ සඨ්ඨැඹිකම් කළ සඨ්ඨැඹියෝ දෙන්නෙක්ය. එකෙක් සිරිසේන උන්නැහේ එයාගේ රෙද්ද අස්සේ දාගත්තේය. අනික් එකා ආරක්ෂක අමාත්‍යශයට දැම්මේය. හමුදා ප්‍රකාෂක ලෙස උන්නේත් රෙදි තුවම කඩේ ගිය පෙත්තප්පු එකෙක්ය. මේ.., මේ රටේ ප්‍රධානම තනතුරුය. මේවාට විරුද්ධව රාජ්‍ය සේවය ගැන දන්නා උන් ලිව්වේය. ඒත් පයිසෙකට මායිම් නොකළේය. 

අන්තීමේදි හොරුන් සුද්ධ කරන්න ප්‍රකාෂ නිකුත් කලේ, ආරක්ෂක අමාත්‍යංශයට පත් කළ සඨ්ඨැඹියා හා මහ රජ්ජුරුවන්ගේ හමුදා මාධ්‍ය පොරොකාසකයාය. ඊයේ වෙන කොට වැඩේ අවුල් බව ආන්ඩුවට වැටහිලා,  රාජ්‍ය සේවයේ ක්‍රියා පටිපාටි ගැන බයිලා ගහනවාය. එතකොට කක්කා නාගෙන නෝන්ඩි වෙලා අහවරය. අඩු ගානේ දැන් වත් තේරුන එක ළොකු දෙයක්ය. මින් පස්සේ හමුදාවේ උන්ට මාධ්‍යට පොරොකාස දෙන්නට බැරිය. හමුදාවේ දේශපාළණයට තිත තැබිය යුතුය. 

මේ ආන්ඩුව කිව්වේ කිසිඳු දෙයක් විදේශිකයන්ට විකුණුවේ නෑ කියලාය. ඒත් දැන් කියන්නේ හමුදා මූලස්ථානෙම විකුණුවා කියලාය. ඒකේ සල්ලි වෙනම එකවුන්ට් එකක දා ගත්තා කියලාය. අපි අහන්නේ එහෙම කරන්න පුළුවන්ද කියලා පමණය. හමුද මාද්දිය පොරසකයාවත්, ආරක්ෂක අමාත්‍යශයේ ලේඛම්වත් අඩු ගානේ රාජ්‍ය මූල්‍ය ප්‍රතිපත්තීන් දන්නේ නැති තොත්ත බබාලාය. එහෙම නැත්නම් ඒවා දන්නා පචෝරිස්ලාය. 

නාවික හමුදාවේ බිස්නස් එක, යාළුවන්ට දීපු එකත් ඒ ජාතියේම ගේමක්ය. මේවා ගැන හැම තැනම ලියවෙන නිසා, ඒ ගැන ලිව්වා ඇතිය. අපි ආන්ඩුවට කියන්නේ, මහ රජ්ජුරුවන්ගේ කම්බ හොරු, තව තවත් පුළුවන්නම් කුක්කු පොවලා, වාඩාගෙන, රෙදි අස්සේ දාගෙන, නලවන්න කියලාය. එතකොට අපිට කොමඩි සෝ බලන්නේ නැතිව, රජගහේ නාඩගම් බලලා ආතල් එකක් ගන්න පුළුවන්ය.

බජට් ප්‍රොපෝසොල්

පෝස්ට් එක වැඩියෙන්ම ලිව්වේ, ජහ මනයා වන, අපි වන් ගොන් වහන්සේලාගෙනුත් බජට් ප්‍රොපෝසොල් ඉල්ලලා තිබුන නිසාය. මේ මාස තුනේ බජට් එකට මහා ප්‍රොපෝසොල් දීලා, ආන්ඩුවේ "ලේඛම්වරු" වගේ, ආන්ඩුව අමාරුවේ දාන්න අපිට ඕනා නැතිය. මාතලන් මේ ප්‍රොපෝසල් මහ රජ්ජුරුවන්ටත් කීවේය. එවා ලැබුන බවත්, ඒවාට ටැන්කූ කියා මේල් එකකුත් ආවට, අපි කියපු එවා මහ සජ්ජුරුවෝ පයිසෙකට මායිම් කොලේ නැතිය. 

මාතලන් එදා ඉඳන් කියන්නේ, කන බොන දේට, ටැක්ස් ගහන්න එපා කියලාය. බොන දේ කිව්වම බියර් අරක්කු වලට උනත්, "සහ ගහන" බදු ගහනවාට, මාතලන් විරුද්ධය. දුප්පත් එකා කසියා ගහන්නේත්, බීඩී බීලා, කැහැලා නහින්නේත් ඒවා බොන්න සල්ලි මදි නිසාය. ඒ නිසා ඇහැක් නම්, ඒවාත් පොඩ්ඩක් අඩු කරලා දුන්නොත් ඔහේලටා අජරාමර නිවන් සුවයම ලැබෙනවාය. 

ඒ ප්‍රොපෝසොල් එකේ අවුලක් වගේ පේනවා නම්, මාතලන් ඉල්ලා සිටින්නේ, පහලින් එල්ලා තියෙන බඩු භාන්ඩ ටිකේවත්, ටැක්ස් අයින් කොරලා ලාබෙට දුන්නොත්, සිරි ලංකා කාරයන්ගෙයි, වමනේ කාරයන්ගේයි රැස්පොට් බලන්නේ නැතිව, හස්ති රාජයන්ගෙන් රාජණියන්ගෙන් පිරි අළුත් ආන්ඩුවක්, බ්ලැක් මේල් කිරීම්, බිය වැද්දීම්, තගරි නැතිව, ආතල් එකේ ගෙනියන්න හැකි වෙනවා කියලාය.

1. හාල්
2. ඇමරිකන් පිටි
3. ළදරු කිරි පිටි
4. සීනී
5. පරිප්පු
6. අර්තාපල්
7. බී ළුෑණූ හා රතු ළුෑණූ
8. ධාන්‍ය වර්ග (කඩල, කව්පි, මුං ඇට, කුරක්කන් (සාටකේ දාගෙන උන්නාට එකටත් කප්පරක් ටැක්ස් ගැහුවේය)
9. සැමන් (මාළු අඩුවට දෙනවා නම්, ඒකත් ඕනා නැතිය)
10. හාල්මැස්සෝ (කැල්සියම් හීනතාවයට )

ඒ වාගෙම, අර විමලයා ඉල්ලන ඉන්ධන වල ඉතිරි කොටහ දුන්නොත් ,ඒ යකා උනත් සතුටට පත් වෙන්න පුළුවන්ය. ලයිට් හා ගෑස් අඩු වෙයි කියලත් හිතනවාය.

මේ මාස තුනේ බැරි උනත්, මීළඟ ආන්ඩුවෙත් මේ පෝස්ට් එකම හම්බ උනොත්, ඇතුලත්මුදලි මහත්තයාගේ අඩි පාරේ ගිය කෙනෙක් නිසා, මෙන්න මේ ඉල්ලිමත් ඉල්ලනවාය.

එනම් "දැයට කිරුලත්" නවත්තපු එකේ, සෑම වසරකම, අළුත් විශ්ව විජ්ජාලයක් හා අනෙක් සිසුන් වෙනුවෙන් විස්ස විජ්ජාල මට්ටමේම කාර්මික විජ්ජාලයක් ආරම්බ කරන්න හැකි වන්නේ නම්, ඔබේ නමත් ඉතිහාසයේ රන් අකුරෙන් ලියවෙනවා නොඅනුමානය. අම්මට සිරි ලංකාවේ, එහෙම නම තියපු උන් ඉන්නේ අල්පයක්ය.

මාස තුනේ ගේම ගෙනියන්න, සියළු ධෛර්යය ශක්තිය හා සිරි ලංකා කාරයන්ගේ හා වමනේ දාන ප්‍රගතිශීලින්ගෙත් ශක්තිය හා සප් එකත් ලැබේවා කියා බොක්කෙන්ම පතමි.

කන්න දෙනවා නම්, බොන්න දෙනවා නම්...
මොන කෙං ගෙඩියද තව ඕන කියන්නේ..

ජය වේවා...!!!