පොලෝසියේ ළොකුම ළොකු සෑර් වෙත, - To IGP with Love

ලැටර් එක පටන් ගන්න උන්නේ, ඔබ තුමාට අපේ ප්‍රමාණේ පිරිනමලාය. සමාවෙන්න.. ප්‍රණාමේ පිරිනමලාය. ඒත් ඉතින් ඒවා ඉල්ලන් කන වැඩ වගේ දේවල් කියලා, සිඳුවීම් සිද්ද වෙන ආකාරයන්ගෙන් දැන් පෙනී යනවාය. මොකෝ..., අපි මැකෝට දීපු ක්‍රෙඩිට් එකත් ආයෙත් රිටන් ගන්න වෙලාය. ඒ තියා, අපේ රුපියල් සීය හිඟා කාපු එකත්, දන් දීපූ අපිට, රොඩියෝ කියලා කින්ඩිය දානවාය. ඔබ තුමන්ලාට ක්‍රෙඩිට් එක දෙන්න ගියේ සහ දුන්නේ, 8 වෙනිදා රෑ රජ වාසලේ වෙන්න ගිය කුමණ්ත්‍රණයකට එරෙහිව, මෝල් ගහ වගේ කොන්ද කෙලින් තියාගෙන මහ රජ්ජුරුවන් වහන්සේටත්, "නීතීයට පිටින් නම් යන්න බෑ අපේ හාමුදුරුවනේ..." කිව්වයි කියා කට කතාවක් ගිය නිසාය.

ඒත් ඉතින් මැකෝ උන්නැහෙත්, හමුදාවේ මාද්දිය ප්‍රොකාසොක තුමත් කිව්වේ, එහෙම දෙයක් උනේ නැතෙයි කියලාය. ඊයේ කුකුළන් කෙටවීමේ වැඩ සටහනකට ආපු, අපේ ආචාර්ය බන්ධුල ගුණවර්ධන සෑරුත් කිව්වේ, කෙලවෙන බව දැන ගෙන රජ වාසලට ගියාම, මහින්ද මහත්තයා තනියෙන් ටී වී එක දිහා බලාගෙන ජීවිතයේ අනිත්‍යය මෙනෙහි කොර කොර උන්න බවත්, "මොකෑ.. බන්ධුල වෙන්න යන්නේ කියලා..." ඇහුවාම, ඒ මැතිදානෝ, "සෑර්.. කොළඹින් කෙල උනා කියන්නේ, අපිට බඩුම තමයි...." කිව්වාම, "මට ජය පැරදුම දෙකම එකයි බන්ධුල..." කියා. බුදුන් වැඳ, මෛත්‍රී භාවනාව වඩා, තපස් රැකුම සඳහා මැදමුලනට ගියා කියලාය.

දැන් බලාගෙන යන විදියට, පොලොස් මූලස්ථානේ කුමන්ත්‍රන චෝදනා කේස් ඇදපු මංගල සමරවීර උන්නැහේ, අන්තීමේ චූදිතයා වෙලා, චූ නාගෙන, අපහාස කේස් යටතේ වැලිකඩ ගියත්, ඒ හැටි කළබල විය යුතු නැත්තේ, රජ වාසලේ චීප් ජස්ටිස් උන්නැහෙත් තාම අළුත්කඩේ නඩු බලවන නිසාය.

ඒ නිසා ඉස්තූති කරන්න ගිහින් නෝන්ඩි වෙන්නේ නැතිව, මෙන්න මේ සුට්ටන් කාරනා ටික ලියලා එවනවාය. මහ රජ්ජුරුවන් වහන්සේටත් දන නොනැමු, පොලිස් කාරයෝ කියලා ලැජ්ජාවක් නැතිව කියන්න පුළුවන්, පොලීසියේ නම හ ගෞරවය ආරක්ෂා කොරාපු කීප දෙනෙකුත් එතරම් දරුණු පාළණයක් තුලත් සිටියේය. ඒත් අන්තීමට උනේ, ඒ වීරයන්ට පොලෝසියට ආයිබෝවන් කියන්නය. උන්නැහෙලාට ගෙම ඇදපු උන්ට විරුද්ධව ක්‍රියා කොරනවා වෙනුවට කලේ, පොලීසියේ නිළධාරින්ට එරෙහිව, පොලීසියම ක්‍රියාත්මක වීමයි. අපේ ගමේ නම් ඕවාට කියන්නේ, නීතිය කියා නොව, නඩුයි බඩුයි ඔක්කෝම හාන්දුරුවන්ගේ කියාය.

ප්‍රිශාන්ත ජයකොඩි

හිටපු පොලිස් මාද්දිය ප්‍රොකාසක තුමා හම්බන්තොට පැත්තේ ඉන්න කොට. ඒ කාළේ පොලිස් මූලස්ථානේ ඉස්සරහා වෙඩි කාළා මල, චන්ඩි මල්ලිගේ පුතාට එරෙහිව ක්‍රියා කරන කොට, ආන්ඩුවයි පොලීසියයි හිටියේ ප්‍රිශාන්ත ජයකොඩි ලොක්කාගේ පැත්තේ නෙමේය. කොහොම හරි ඇතුලට යවපු එකා එලියට ආවාම ඉහලින් ඕඩර් එක ආවේ, අර පර බල්ලාගේ කකුල් දෙක අල්ලලා වැඳලා සමාව ගන්න කියලාය. අන්තීමෙදි උන්නැහේ පොලීසියේ ගෞරවයත් රැකගෙන ඉගිලි ගොස් නැවතුනේ, ඔට්ටේලියාවෙය. මේ මනුස්සයාට යුතුකම් ඉටු කළ යුතුය.

කොට්ටාවේ ටැපික් රාළහාමී

දෙවන සිද්දියත්, මහ රජ්ජුරුවන්ගේ ළඟම ඥාතියෙක්ගේ කේස් එකක්ය. චන්ඩියාගේ නම හේමාල් ගුණසේකරය. උන්නැහේ රෙන්න බර වෙලා, කක්කා දාන්න, හයි වේ එකේ හයි ඉස්පීඩ් එකේ ඇවිල්ලා කොට්ටාවෙන් එලියට යන කොට, ටැපික් රාළහාමි කෙනෙක්ට මාට්ටු උනේය. කක්කා බර හැඳුන එකා බැලුවේ පවර් එක පෙන්නලා මාරු වෙන්නය. ඒත් රාළහාමි කෙලින් උන්නේය. 

අන්තීමේදි අර චන්ඩියා කොට්ටාව එක්සිට් එකේ කක්කා කොලේය. එතන කක්කා කොරලා ගිහින් නැවතුනේ නැතිය. අර රාළහාමිගේ වාහනයත් ගිනි තිබ්බේය. අන්තීමේ රාළයාමි දිවිය ළෝකේ යවන්නත් මාර ගේමක් දුන්නේය. රාලහාමි උන්නාද මලාද කියා අපි දන්නේ නැතිය. සමහර වෙලාවට ඔබ තුමාත් දන්නේ නැතුව ඇතිය. මේන්න මේ රාළහාමිටත් අනිවාර්යයෙන් යුක්තිය ඉටු විය යුතුය.

වඳුරඹ  OIC

මේ රටේ තිබුන තුඡ්ඡම මැතිවරණය උනේ අම්මට සිරි ලංකාවේ තිබුන අන්තීම මැතිවරණයය. ප්‍රචන්ඩ ක්‍රියා අඩු උනත්. මිනිසත් බවට නිගා කළ, මිනිසුන්ට මානසික වශයෙන් උපරිම පීඩා කළ, මේ රටේ හැදියාව හා මිනිසත්කම ප්‍රශ්න කිරීමකට ලක් කරන පජාතම මැතිවර්ණය එය බව, අද සෑම දෙනාම පිලිගන්නවා ඇත. තමන්ගේම ලේඛම් තුමාට සලකන්නේ මෙසේ නම්. දෙමලාට, විරුද්ධවාදියාට, සැලකූයේ කෙසේද කියා අපට හිතා ගන්න පුළුවන්ය.

මෙන්න මේ ඡන්දයේදි, සැටිපිකට් පිස්සෙක් වඳුරඹදී ඉස්ටේජ් එකක් ගිනි තිබ්බේය. පොලීසිය නීතිය ක්‍රියාත්මක කලේය. ඒත් උප ඇමතියා තගරිය දා පොලීසිය බල්ලා මාක් එකට දැම්මේය. කොන්දක් තිබුනු ඕ අයි සී මහත්තයා සේවයෙන් ඉල්ලා අස්වී පොලීසියේ ගෞරවය රැක්කේය.

අපට මතක ඔය සිද්දීන් පමණය. කෙසේ හෝ මෙවන් අසාධාරණයන්ට ලක්වු නිර්භීත නිළධාරින් වහාම උසස්වීම් සහිතව, සේවයේ පිටවිය යුතුය. මන්ද මේ රටට යහ පාළණයක් ගෙන ආ හැක්කේ, මෙවන් නිර්භීත නිළාරින්ගෙන් මිස, කුඩු කාරයන්ගේ මුදල් වලට, බෝතලයට හා ගණිකාවන්ට දපනේ වැටී පොලීසියේ ගෞරවය විනාශ කරනා උන්ගෙන් නොවනා නිසාය.

අගලවත්තේ වල් අලියා

තෙවරප්පෙරුම නම් වල් අලියෙක් අගලවත්තේ පිස්සු කෙලියේ පොලීසියත් එක්කම ඇවිල්ලාය. පොලීසියට තිබුනේ ඌට තගරිය දාන්න බැකප් දෙන එක නෙමේය. ඔළු කට්ට කුඩු වෙන්න තියන්න බයම නම්, අඩු ගානේ දනිහෙන් පල්ලෙහාට හෝ කෙළලා අරින එකය. ජනාධිපති තුමාගේ නියමයෙන් ඌට බඩු සෙට් වෙන්න යනවා කිව්වාම සතුටක් ආවත්. අල්ලාලා තියෙන්නේ, හාල්මැස්සෝ තුන් දෙනෙක්ය. අප ඉල්ලා සිටින්නේ වල් අලියාත් අල්ලාලා බැඳලා දාන්න කියලාය. වැඩේ පටන් ගන්න කොටම රොටි පුච්ච ගත්තේ නැත්නම්, ආයෙත් පොලෝසියට වෙන්නේ, හාල්පාරුවෝ වාගේ අමු රොටි හා ජරාව කකා ජනතාවගෙන් නෝන්ඩි වෙන්නය.

පොලොස් කොමිසන් එනකන් ඉන්න ඕන නැතිය. අඩු ගානේ වෙන්නේ මක්කද කියලා බලන්න, නීතිය හරියට ක්‍රියාවේ යොදන්න කියලා ජහ මනයා වෙනුවෙන් අපි ඔබ තුමාගෙන් ඉල්ලා සිටිනවාය. රජ ගෙදරින් පාළණය වූ පොලෝසියක් එක පාරම පොලිෂ් කරලා ගන්න එක ලේසි පාසු වැඩක් නොවේය. ඒත් එය කළ යුතුමය. කීර්තිමත් පොලිස් නිළදරුවෙකු ලෙස නමක් හදා විශ්‍රාම යන්නට වරම් ලැබේවා කියා පතනවාය.

වෙලේ සුදා රැකගැනුම කාටත් හොඳා

අවසාන වශයෙන් ඔබ තුමාගෙන් ඉල්ලන්නේ, වෙලේ සුදා, කුඩු හෝ බඩු හංගපු තැන් පෙන්නවන්න එක්ක යන්න නම් එපා කියලාය. පාදඩ, පාතාල වැඩ නොකොට, නීතිය නිසි ලෙස, විනිවිදභාවයකින් යුතුව ක්‍රියාවේ යොදවන්න කියලාය.