ජනාධිපති තුමා ජාතිය ඇමතීම.. - President address to the nation

 

ඊයේ වැදගත් කතා දෙකක් අහන්නට පුළුවන් විය. එකක්, ජනාධිපති තුමා ජාතිය අමතා කළ හරවත් කතාවය. අනෙක ගෝඨාභය මහත්තයා, මෙගා පෝන් එකකින් දීපු ටෝකය. ගෝඨාභය ලොක්කාගේ කතාව ගැන කතා කිරීම පස්සට තබා, ජනාධිපති ළොක්කාගේ කතාව ගැන කතා කොරන එක හොඳයි කියා හිතුනේය.

ඊයේ පඩත්තල ජඩ මාද්දියවේදින් මෙන්ම, සංධානේ නීල කාස හොරු සෙට් එක, එක් අපූරූ සිහිණයක් දකිමින් සිටියේය. එනම් එජාප සුළුතර ආන්ඩුව විසිරුවා හැර, සංධානයේ නීල කාස හොරුන්ගෙන්ද සමන්විත ආන්ඩුවක් බිහිවන බවත්, ඉන් පසුව සැටලයිට් නෝනාගේ උපදේශකත්වයෙන්, සිරිසේන ලොක්කාගේ සභාපතීත්වයෙන්, මහින්ද මහතා අගමැති බවට පත් කරනා මහා මැතිවරණයකට යන බවටයි. එහෙත් ඒ සියල්ලන්ගේ සිහිණය කුඩු කර දමමින්, ඉතාම බුද්ධිමත් මෙන්ම වැදගත් කරුණු කීපයක් අඩංගු කතාවක් පැවැත්වීමෙන්, මෙය යහ පාළණයක්ම බව නැවතත් තහවුරු කලේය.

ජනපති තුමා කියූ සියල්ල සත්‍යය. මේ රටේ ගොබ්බ ජනතාව මේ ආඩුවෙන් බලාපොරොත්තු වන්නේ ගිය ආන්ඩුව කාලයේ තිබූ සෙප්පඩ විජ්ජාවන් නම්, මේ ආන්ඩුව ඇත්තටම ඔවුන් බලාපොරොත්තු වන ආන්ඩුවක් නොවේ. මේ ආන්ඩුව තුල සෙප්පඩ විජ්ජාකාරයන්, තෙල් බෙහෙත් වෙලෙන්දන් මෙන්ම, ජෝකර්ලාද නැත. වසර 10 ක් තිස්සේ, එවන් පිරිසකගේ චීන සර්කස් බලමින් සිටි ජනතාවකට එක වරම සිඳුවූ වෙනස කිසි සේත් ඔරොත්තු දෙන්නේ නැත.

ජනපති කීවාක් මෙන් ඔහු ජාත්‍යන්තරය ජය ගෙන ඇත. ඔහු කුහක ජාතීවාදියකු නොවනා බවද ක්‍රියාවෙන්ම ඔප්පු කොට ඇත. එමෙන්ම ජනමාධ්‍ය තුල පවතින නිදහස, කිසි කලක අප අත්විඳ නැති නිදහසකි. දෙරණ නාලිකාවේ ප්‍රවෘත්ති තුල ආන්ඩුවේ කිසිඳු නිව්ස් එකක් නැත. ඒය තනිකර රාජපක්ෂ පවුලේ නාලිකාවක් බවටත්, අමු ජාතිවාදය පතුරුවමින්, දෙමළාගේ ලේ ඉල්ලා සිටිනා නාලිකාවක් බවට පත්ව ඇත. 

එය පුදුමයට කරුණක් නොවන්නේ, විකෘති කරනා ලද ජාතික කොඩිද ගෙන රට අස්ථාවර කිරීමට තැත් කරනා ව්‍යාපාරයේ, ඉදිරියෙන්ම සිටිනා දෙදෙනෙකුම, කළක ජනතාවාදි මාධ්‍ය කරුවන්ම වීමය. උන් දෙදෙනා නම් විමල් හා ඩලස්ය. විමල් කෙසේ වතුද ඩලස් නම් සැබවින්ම මේ ගැන ලැජ්ජාවට පත් විය යුතුය.

මාතලන් පෞදගලිකව සිතනාකාරයට, ආන්ඩුව හත් පොලේ ගාගත් ප්‍රධානම කරුණ නම්, දින සීයේ පොරොන්දු මල්ලයි. ඒ අතරිනුත් ප්‍රධානම කරුණ නම්, ජනපති ක්‍රමය අහෝසී කිරීම හා ඡන්ද ක්‍රමය සංශෝධනයකට ලක් කිරීම ඒ තුලට රිංගවීමයි. රටේ බුද්ධිමත් අල්ප වූ පිරිසක් බලාපොරොත්තු වන මෙම වෙනස, බහුතර අම්බරු ජනතාව කිසි සේත්ම බලා පොරොත්තු වන දෙයක් නොවේ. 

උන් විධායකය තියා විවස්ථාව කියන්නේ කුමක්ද කියා දන්නා පිරිසක් නොවේ. උනට අවශ්‍ය ප්‍රජාචන්ච්‍රවාදයක් නැත. උන්ගේ එකම පැතුම නම්, තුන් වේලට බත් සමඟ පුනක්කු හෝ අඹරා, අවුරුදේ නිවාඩු පාඩු වේලාවලට, කතරගම, අනුරාජපුර, මහියංගනයේ, පොළොන්නරුවේ, සිරීපාදේ හා යුද්ධය නිමා කිරීමෙන් පසු, නාගදීපය හා නන්දිකඩාල් වැඳගෙන ඒම පමණය. එතනින් එහා මහා බලාපොරොත්තු උන් තුල නැත.

එතුමා සඳහන් කළ පරිදිම, දැන් ඇත්තේ තරු හතේ ප්‍රජාතත්‍රවාදයක්මය. ඉත්තෑවෝ, හිඟන්නෝ, රජගෙදර රිලවුන් හා නීල කාස හොරුන් අධිකරණ නියෝග බල්ලාට දමමින්, පාරවල් පුරා තප්පුලන්නේ ඒ හේතුවෙනි. කැම්පස් කොල්ලන්ට ජල ප්‍රහාර, කඳුළු ගෑස් ප්‍රහාර සහ අවසානයේ බැටන් පොලු ප්‍රහාර වලින්ද සංග්‍රහ පවත්වන රටේ නීතී ගරුක පොලෝසිය, මේ කම්බා හොරුන්ට වතුර සංගයහක් තියා, දිය කළ පුනක්කු ප්‍රහාරක්වත් එල්ල නොකරන්නේ ඒ නිසාමය. 

ඇත්තටම එය යහපත් ප්‍රජාතන්ත්‍රවාදි ලක්ෂනයක් වන අතරම, හොරා මොකාද, හොඳ එකා මොකාද කියා මොළය අබ මල් රේණුවක් ඇති එකාට වටහා ගැනීමට කරනා මහඟු උපකාරයක්ද වන්නේමය.උන් කැමති තීන්දු නොදෙනා විට චීෆ් ජස්ටිස් නෝනා ගෙදර යවාපු උන්, නීතිය පයිසෙකට ගනන් ගන්නා උන් නොවේ. 

නමුත් එක දෙයක් පැහැදිලිව නිරාකරණය කර ගත යුතුය. ඇත්තටම සිරි ලංකා නිදහස් පක්ෂයේ හා සංධානයේ සභාපති කව්ද? අපට නම් පෙනෙන්නේ තවමත් එහි නායකත්වය දරන්නේ මහින්ද මහත්තයා කියලාය. එහෙම නොවේනම් විමල් වීරවංශය.

ඔබ තුමා එක වැදගත් කරුණක් එම කතාව තුල අඩංගු කළේය. එනම්, "ගත යුතු තීන්දූ තීරණ, ගත යුතු අවස්ථාවේ ගැනීමට, කිසි සේත්ම බිය වන්නේ නැත.." යන කාරණයයි. අපට නම් පෙනෙන්නේ, එය කිසි සේත්ම සිඳු නොවනා ආකාරයකි. ඔබ තුමා දින 100 ය සාර්ථකයි කියද්දි, ඔබ තුමාගේ පක්ෂයේ, ඔබ තුමාම අළුතෙන් පත් කල, අනුර කුමාර ප්‍රියදර්ශණයා දින 100 අසාර්ථකයි කියා කීම අපට නම් පෙන්නේ පරස්පර ප්‍රකශයන් හැටියටය. සම හරක් විට එය ඔබ තුමාගෙ ප්‍රජාතන්ත්වාදය විය හැකිය. එහෙත්, අපට නම් එය විගඩම්ක් මිස වෙන කිසිවක් නොවේ.

මේ ධූර කාලයෙන් පසු, රජකම අතහැර තපස් රැකීමට වනගත වන්නට සිටිනා ඔබ තුමාට, බලය පිළිබඳ කෑදර කම්ක් නැතිනම්, කළ යුත්තේ, මුලින්ම තම පක්ෂයේ හා සංධානයේ නායකත්වයෙන් ඉල්ලා අස්වීමයි. එවිට, පක්ෂය දැන් පාළණය කරනා උන් පක්ෂය කාබාසීනියා කිරීම හෝ නගා සිටුවීම, උන් උන්ට අවශ්‍ය ආකාරයට සිඳු කර ගන්නවා මෙන්ම, රට පාළණය කිරීමට බාධාවක්ව ඇති කරුම ප්‍රශ්ණයකින් ඔබ තුමාට ගැලවී සිටීමටත් හැකිය.

එසේ කළ නොහැකි නම් කළ යුත්තේ, රට විනය ගරුක නීතී ගරුක රටක් කිරීමට ප්‍රථම, පක්ෂයේ හා සංධානයේ නීල කාස හොරුන් ඉවත් කොට, නායකත්වයක් හා විනයක් ඇති පක්ෂයක බවට පත් කිරීමයි. තමාගේ පක්ෂයේම උන්, තමන්ට එරෙහිව දෝශාභියෝගයක් ගෙන එන තැනට කටයුතු සිඳු වුවහොත්, අපට නම් අක්මැත්තෙන් වුවද කීමට ඇත්තේ, ඔබ තුමා කෙසේ කීවද, ඔබ තුමා අසාර්ථක නායකයකු හා රාජ්‍ය පාළකයකු බවයි.

ඕනෑම දෙයක් ඕනෑවට වඩා ඕනෑ නැති අතර, තරු හතේ ප්‍රජාතන්ත්‍රවාදයටද එම ප්‍රකාශය අදාල නොවිය හැක්කේ නොවේ..

තෙරුවන් සරණයි...!!!