සිරසත් හොරු රකිනවාද...? - Is Sirasa protecting the Suspects.?

ඊයේ තවත් ජාතික වීරයෙක් යහපාළණයේ "දඩයම" ට බිලි විය. ඔප්පු කොට නැති වුවත්, අම්මට සිරි ලංකා ඉතිහාසයේ එතෙක් මෙතෙක් බිහිවූ මහා නීල කාස සොර දෙටුවාය. අපි එහෙම කිව්වාට එහෙම නොවෙන්නත් පුළුවන්ය. මොකෝ එයා වැලිකඩ ගියේ, "කොහොමද යහ පාලනේ...?"  කියලා අපෙන් අහගෙනය. අපිට නම් කියන්න තියෙන්නේ, "යහ පාලනේ පට්ටයි ඕයි..." කියලාය.

අපි දන්නා කාලයේ, රෝමන් කාරයාගේ ලන්දේසි නීතියද මක්කද එක ක්‍රියාත්මක උනේ, නැති බැරි අහිංසක එකාටය. සල්ලි තියෙන බලවත් එකා, සල්ලි බලෙන් ඇතුලට යන්නේ නැතිව එලියේ තියන්න කළු කෝට් දාගත්ත ඩ්‍රැකිව්ලලාට පුළුවන්ය. ඒ කාළේ දේශපාළණ බලපෑම් අළුත්කඩේට තිබුනේ නැතත්, විධායක බඩකඩුත්තුවෙන් පස්සේ, එතන පාළණය කලෙත් විධායකයෙන්ය.

ඒ නිසා මුදල හා පන්තියට අමතරව, පොලිටිකොල් බැග්ග්‍රවුන්ඩ් එකද, මිනී මරලා හරි එලියේ ඉන්න චෑන්ස් එකක් උනේය. ඒ ඉතරක් නොව, ජනාධිපති සමාව දුන්නාම, ඇතුලට ගිය එකාටත් ගෙදර ගිහිල්ලා ආතල් එකේ ඉන්න පුළුවන් විය. අධිකරණය බල්ලට ගිහින් පාරට වැටුනු අතරේ, පාරේ ඉන්න බල්ලෝ ඔටාරා නෝනගේ "එම්බාක්" එකේ ආතල් ගන්න ගියේය.

බලය තිබුනු කාලයේ මොළය නැතිව එකසිය ගානට පිස්සු කෙලපු ජල්බරි කාර ළොකු ළොක්කෝ, යහ පාලනයෙන් උදාවු ස්වාධීන අධිකරණය මගින් හිරේ විලංගුවේ දානා කොට, සංසාරේදි එහෙම දේවල් දැකලා නැති ජහ මනයා බන්ධනාගාර බස් එකේ එල්ලෙනවාය. උසාවී වට කරනවාය. අනාථ වෙච්චි බවලත්තු හොටු පෙරාගෙන අඬනවාය. එක මළ විකාරයක්ය.

ඊට පස්සේ හිටපු ලොක්කා දඟ ගෙයි අස්සේ රිංගනවාය. එතුමා ඇතුලට දානකන්, කැමරා කටුයි, මයික් පොලුයි උස්ස ගත්තු සෙට් එක, උන්නැහේගේ පස්සෙන් වැටෙනවාය. "එලව එලවා පලි අරගෙන, අපිට මඩ ගහ ගහ ඉන්නේ නැතිව, කීයක් හරි හම්බ කර ගන්නවා ඕයි..." කියා, එතුමා අවවාද අනුසාසනා දෙනවාය. ආරක්ෂක ළේඛම් තුමා තාමත් ධූරයේ ඉන්නවාය කියා හිතාගෙන, විශේෂ පොලිස් එකකේ වහලා දාන්නෙයි කියා ශත පනහේ පෙස්සන් ගහනවාය. එක ගිනි විජ්ජුම්බරයක්ය.

ඇතුලේ දාන එකෙන් වලකින්න, නීල කාස හොරුයි, උන් ඇති දැඩි කරපු අප්පච්චිලයි, බාප්පොච්චිලයි, උන්ට වහ වැටුන අමබරුවෝයි කෑ ගහන එක සාධාරනේයි කියලා කියන්න පුළුවන්ය. ඒත් ජනමාද්දිය උස්තාද්ලාය කියා හිතාගෙන ඉන්නා, සිරස මාද්දිය ජාලේ මීඩියා ප්‍රොපෙසර්ලා, "තෝරූ මෝරූ ඉන්දැද්දී, හාල්මැස්සෝ ඇතුලට දානවා...." කියා, පැය ගනන් නිව්ස් කියනවාය. ඒ වොයිස් කට් දෙන එකා ඝෝඨාභය මහත්තයාගේ පිටිපස්සේ ඊට පස්සේ ඉන්නවාය. 

එයාලා කියන්නේ, සුනාමි වලට ගෙවල් හදනවා කියා කෝටී 65 කට කෙලිය "රාඩා" ආයතනේ ප්‍රධාන විධායක නිළධාරියා අත් අඩංගුවට ගත්ත එක වැරදියි කියලාය. ගොසිප් සයිට් කියන විදියට, හරි නම් ගන්න ඕනේ ලලිත් වීරතුංග හා ටිරාන් අලස් උන්නැහේලාය. ඒත් එයාල ගන්න එපා කියා ශිරාල් ලක්තිලක ගේම අදිනවා කියා වටෙන් පිටෙන් කතන්දර හැදෙනවාය.

ඒ හේතුන් උඩ, අර දෙන්නා වෙනුවට, සාලිය වික්‍රමසූරිය ගත්තාම එයා මාර උගතෙක්ය, රටක් වටිනා හාදයෙක්ය අරකය මේකය කියා අත් අඩංගුවට ගත්ත එක වැරදියි කියනවාය. << වීඩියෝව හා විස්තර මෙතනින් බලන්න >> සම හරක් විට නොකියා කියන්නේ මහ උන් දෙන්නා ගන්නෙයි කියලා වෙන්නත් පුළුවන්ය. ඒත් ඉතින් "දවස" වැඩ සටහනට එන ශිරාල් ලොක්කාගෙන්, "ඇයි අප්පා මෙහෙම කරන්නේ...." කියා, ජනතාව ඉදිරියේම අහනවානම් වඩාත් වටින්නේය.

"සටන" වැඩසටහනේදි, කස්ටිය එක්ක වට කරලා, එරාන් වික්‍රමරත්නට කට උත්තර නැති වෙන්න මහ බැංකුවේ අධිපති අත් අඩංගුවට ගන්නේ නැත්තේ ඇයි කියා, වීරයෝ වෙන්න හදන චන්දනලාගෙන්, සිරි රංගාගෙන්, සුදේවලාගෙන්, අපිට අහන්න තියෙන්නේ, ඇතුලට ගිය උන් සුද්ධ කරන්නේ, කොහෙන් හෝ ගානක් හම්බ උන නිසාද කියලයාය. 

විශේෂයෙන් රාජ්‍ය දේපල හොරකම් කලා නම්, ඌ ඇමතියාද, විධායක නිළධාරියාද, උගතාද, නූගතාද, පියන්ද, කියන එකෙන් වැඩක් නැතිය. හොරකම් කලා නම් ඌ මොකා උනත් හොරාමය. (ඇත්තටම, එවන් රටක් වටිනා, උගත් බුද්ධිමත් මිනිසුන්, මුදල් පසු පස වැටි, කාළකන්නි රෙජිමයක සමාජිකයින් වී, හත් පොලේ ගා ගැනීම, රටේ කරුමයක් මිස උන්ගේ කරුමයක් නොවේ.)

මහ බැංකුවේ අධිපතිගේ කේස් එකට "සිරසෙන්" පමණක් නොව, "එම් ටී වී" ඉන්ගිරිසි චැනල් එකෙනුත් නැති වෙන්නම ගහන්නේ, අර්ජුන් මහෙන්ද්‍රන්ට ගහන්න තියෙන අවශ්‍යතාවයට වඩා, රනිල්ට ගහන්න තියෙන උවමනා කම නිසාමය. ඇත්තටම මොකා උනත් එහෙම ගහන්න ඕනය. ඒත් එහෙම ගහන උන්, තව එකෙක් හිරේ දැම්මාම, එයා වෙනුවෙන් කතා කරන කොට, අපිට හිතෙන්නේ, රනිල් කරන වැඩේම සිරසත් කොරනවා නේද යකෝ කියලාය.

හෙළුවෙන් ඉන්න උන්ට ගල් ගහන්න කලින් තමනුත් ඉන්නේ අමු හෙළුවෙන්ය කියා සිරසේ කස්ටියත් තේරුම් ගන්නවා නම් බොහෝ අගනේය. නැතිනම් ඉතින් කුඩු කාරයා වීරයා කරගෙන, රේස් බුකි කාරයන්ට ගේම් අඳින චැනල් එක වාගෙම, බල්ලා මාක් එකට වැටෙන එකත් අපට නවත්තන්න බැරිය. මේවා ලියන්නේ හිත් අමනාපයකින් නොව, බලන්න තියෙන චැනල් එකක් පිස්සු කෙලින කොට හිතට අමාරු නිසා පමණය.