පොළොන්නරුවේ නයිට් රේස් - Pulathisi Night Race

යහපාල මහත්මයා නොහොත් ළොකු සිරා තුමාගේ පුත්, පොඩි සිරා නිව් යෝක් ගිහින් හෙන ගිනි විජ්ජුම්බරයක් වෙලාය. ඒ අස්සේ යහපාල තුමා සමුළුව ඇමතුවේ හින්ගලෙන්ය කියා මහින්ද මහත්තයාගේ කෑල්ලක් වන අපේ හාමිනා පත කින්ඩියක් දැම්මේය. අපේ හාමිනාට, මහින්ද මහත්තයා ඕකේ හින්ගලෙන් ඉතරක් නොව, දෙපැත්තේ වීදුරු දෙකෙන් බලාගෙන දෙමළෙනුත් පොරි හැලෙන්න දුන්නා අමතක වෙලාය. ඕක එයාගේ වැරැද්දක් නෙමේය. අපේ හින්ගලයාගේ හැටිය.

ඔය පොඩි සිරා නොහොත් දහම් මහත්තයා සම්මේලනේට ගියපු එක සිරා ගත්ත උන් වගේම, වැඩේ එච්චරම අප්ෂෙට් එකක් නෑ කියනා උනුත් වැහි වැහලාය. එච්චරම අවුලක් නැතෙයි කියා කියන්නේ යහපාලනේ ගැන තවමත් හීන් මවාගෙන ඉන්නා යහපාලන ටොයියෝය. උන් කියන්නේ, ඕවා ඉස්සරත් උනා නේ ඒ නිසා ඕවා එච්චර ගනන් ගන්නට එපා කියලාය.

එතකොට අපිට උන්ගෙන් අහන්න තියෙන්නේ, ජනවාරි 8 වෙනිදායින් පස්සේ ගෙන එනවාය කිව්වේ, රෙජීම් චෙන්ජ් එකක් නොව ඒකේම තවත් දිගහැරුමක්ද කියලාය. රාජපක්ෂගේ රෙද්ද ගලවලා දාලා වෙනස් ජාතියේ අලුත්ම රෙද්දක් ඇඳගන්නවාය කියාපු උන් ඉන්නේ, රෙද්ද කෙසේ වෙතත් අමු හැලිවැල්ලෙන් කියලාය.

ඔය පුත්තරයාත් එසේ මෙසේ බඩුවක් නෙමේය. අප්පුච්චා ඇමති කම් කොරපු කාලේ පොලීසියේ ලොක්කෙකුගේ පුත්තරයෙකුට ඔය නැගෙනහිර පැත්තේ පාසිකුඩා බීච් එකේ නෙලලා ඒ කාලේ පට්ට ලෙඩක් දාගත්තේය. ඒ කාළේ ඩෙංගු පතුරුවන මොස්කිටෝස්ලා එක්ක සාඛච්ඡා පවත්ත පවත්ත උන්නු සිරිසේන කිව්වේ, අපේ පුතා රත්තරන්ය, පුතා උනත් වැරද්දක් කොරලා තියෙනවා නම්, නීතිය ක්‍රියාත්මක කොරන්නෙයි කියා පොලිස්පතිතුමාටම කිව්වා හිටං.. කියලාය.

එහෙම කිව්වේ පොලිස්පතිතුමා මැති ඇමතිලාගේ පුත්තුන්ට එරෙහිව නීතිය ක්‍රියාවේ යොදන්නේ නැතෙයි කියා කවුරු හරි හිතනවානම් බොහෝම වැරදිය. එයැයි එහෙම කිව්වේ, ගුටි කෙලිය ගිහිල්ලා තියෙන්නේ පොලොස් ලොක්කෙකුගේ පුතෙක් එක්ක නිසා, පොලීසිය පැත්තට වාසි වෙන දෙයක් කලොත් හෙම මොළේ අවුට් වී පිච්චු කෙලිනා ගොන් බයියෝ සනසන්නට වෙන්න පුළුවන්ය.

අපි නම් ඒවා ඒ කාළේ එච්චර ගනන් ගත්තේ නැත්තේ, තාජුඩින්ලාට ගේම දුන් රජ පැටව් අස්සේ. මැති ඇමතිලාගේ පුත්තුන්ට ආමි කාරයෙකුට, පොලිස් කාරයෙකුගේ පුතෙකුට, සුද්දෙකුට, සුද්දියෙකුට ගහන්න බැරිනම්, නයිට් ක්ලබ් එකක ගුටිකෙල ගන්න බැරිනම්, ඒ ඇමතිකම අහවල් රෙද්දකටද කියා හිතුන නිසාය.

ඊළඟට සති දෙකකට වඩා ගිහින් නිසා අපේ උන්ට අමතක වෙච්චි අනික් කාරනේ, යහපාල ලොක්කා දිවුරුම් දුන්න දවසෙම ඩිෆෙන්ඩර් පිරිවරාගෙන නයිට් ක්ලබ් එකක් අස්ට රිංගපු දහම් පුතා දාගත්ත ගේමය. යහපාලනේ ආපු ගමන් නිසාත්, ගල උඩ රීපු පූචට වෙච්චි දේ ජනමාද්දිය කාරයොන්ට වෙන නිසාත්, ඔක්කෝම උන් සද්දේ වහලා ඉන්න අතරේ, ඔය නිව්ස් එක වේලෙන්නත් කලින් පත්තරේ දැම්මේ ලංකා නිව්ස් වෙබ් එකේ සෙට් එකය.

නිව්ස් එක දැකපු යහපාල ලොක්කා කළේ එදාම පොඩි සිරා ලන්ඩන් පටවපු එකය. ඉන් පස්සේ පොඩි මෑන් පේන්න උන්නේ නැතිය. ඒ වෙනුවට ආවේ චතුරිකාය. ඒ කිව්වේ චතුරිකා පීරිස් නෙමේය. චතුරිකා සිරිසේනය. එයා අප්පුච්චා රජ වෙච්චි ගමන් පොඩි හෝටලයක් දාගත්තේය. පටන් ගන්නේ එහෙමය. මොකෝ, ඒ කාලේ රාජපක්ෂලාට තේ කඩයක්වත් නැතෙයි කියපු වාහෙලා හම්බ කරපු විදිය කියන්න, අද සජින් වාස්ලා ආන්ඩුවේ සාක්කි කාරයෝ වෙලා තියෙන නිසාය.

අපරාදේ කියන්නේ මේ රටට කරන්න පුළුවන් ළොකුම විනාසේ කොරාපු මහින්ද මහත්තයා උනත්, පැටව් ටික ගේමට බැස්සුවේ යුද්දේ ඉවර කරලා සුද්දෙ පටන් ගත්තයින් පස්සේය. යුද්දේ ඉවරකරායින් පස්සේ කොරන්න දෙයක් නැති නිසා නිකන් හොබි එකට වගේ රට පාලනේ කොරාපු මහින්ද මහත්තයා, කුමාරයෝ තුන්දෙනාගේ හොබීස් වලටත් පට්ට පදිරි සහයෝගයක් දුන්නේය. 

ළොකු එකා එයාගේ හොබි එකට සැට් කොලේය. ඒ වගේම විනෝදාන්සයක් ලෙස ලෝ එක්සෑම් එකත් පාස් උනේය. ආයෙත් රජ උනා නම් හෙම ජපුරේ පස්තාච්චි අදින්නත් ලැහැස්ති වෙලා උන්නේය. අනිවාර්යෙන් ජනාධිපතිගේ නිතීන්ග මහතෙකුත් වෙන්න පුළුවන් කුසළ කර්ම ඒ ඇත්තෝ පෙරෑ ආත්ම වල කොරලා තිබුනේය. දෙවනි එකා රගර් කෑවේය. සමාවෙන්න රගර් ගැහුවේය. 

එයා රගර් වලට ඇවිල්ලා, රගර් කචල් වෙලා කිව්වේ රගර් ගැන දන්නේ නැති හාල් පාරුවෝය. රගර් කොහොමත් කචල්ය. ඔහේලා හිතන්නේ මාතලන් කියන්නේ බොරු කියලා නම්, මේ දවස්වල ගහන රගර් ළෝක කුසළාණේ බැලුවානම් හෙම එහෙම කියන්නේ නැතිය. කොටින්ම කියනවානම් රගර් වල බෝලෙත් කචල්ය. අපරාදේ කියන්නේ තුන් වැනි සරේ රජ උනා නම්, අර අතේ තියෙන බෝලේ බලෙන් රගර් බෝලෙත් රවුම් කරනවාමය.

බාලම එකා රොකට් කාරයාය. ඒ යකා චීනත් එක්ක එක්කාසු වෙලා රොකට් එකක් ඇරියා කිව්වාට, ටොයියෝ නම් කිව්වේ එහෙම එකක් ඇරලා නැතෙයි කියලාය. ඒ කුමාරයත් තව ටික කලක් උන්නා නම්, ධම්මික පෙරේරාට වෙන්නේ කළුතර පැත්තේ රා කට්ටක් ගහගෙන ඉන්නටය. 

කොහොම හරි මෙයාලාගේ හොබීස් වලට, මහා නායක උන්නාන්සේලා පවා, අර්ථයෙන් ධර්මයෙන් ඉතරක් නොව, බොක්කෙන්ම සප් එක දුන්නේය. මොකෝ සාසනේ රැකෙන්නේ මහ රජා රැකුනොත් නිසාය. එහෙම කලාට සංඝ බජව් දානා වෙලාවට, මහ රජ්ජුරුවන්ගේ අම්මාට පින් අනුමෝදන් කොරන්නටත් ඇතිය. එහෙම උනේ, මහ සජ්ජුරුවෝ ලෝඩ් බුද්ධාටත් වඩා පවර් පුල් නිසාය.

මහින්ද ලොක්කා ගෙදර යැව්වේ ඔය පුත්තු තුන් දෙනා සහ හදාගත්ත පුතා එකතුව පුත්‍ර සමාගමය. මොකෝ, අපේ උන්ට උන්ගේ හොබීස් එච්චරම ඇල්ලුවේ නැති හන්දාය. එක අතකට එහෙම උන එක හොඳය. නැත්නම් ඉතින් ශිරන්ති නෝනාට වෙන්නේ හච්චින් ගිහිල්ලාම මිය යන්නටය. 

යහපාලන කැඳ හැලිය පටන් ගත්තේම හත් පොලේ ගාගෙනය. එනම්, සෝමරත්න දිසානායක කියන මහින්දවාදි දෙපිටකාට්ටු කාළකන්ණියා රූපවාහිනියට දාලාය. අපි එදා ඔය ගැන කතා කොලාම, ආන්ඩුවේ උන් කිව්වේ, කලබල වෙන්න එපා මචෝ එයා දැම්මාට ගේම ගෙනියන්නේ වෙන උන් කියලාය. අවුරුදු පහෙන් වෙස්සන්තර අප්පුහාමි වගේ රජකමත් දාලා, විධායකෙත් අහෝසි කරලා, තපසට යනවැයි කියලා ආපු උන්දෑ අද කෙලින්නේ මහින්දටත් අන්ත පිස්සු හුටං වැඩය.

පොඩි එකා ඇමරිකා එක්ක ගියා මදිවාට, සම්මේලනේටත් එක්ක ගිහිල්ලාය. පොටෝ එකෙන් කැපුවා කියා දැන් වැඩේ වහ ගන්න බැරිය. වරායේ සභාපති එලවලා ඇමතියාගේ අයියා එතනට දමාගෙනය. ඔය යකා සැටලයිට් නෝනාගේ කාළේ BOI එකේ හොරා කාලා මාට්ටු වෙලා, කැනඩාවට පිටුවහල් කොරාපු එකෙක්ය. දෝනියන්දෑ, කප්පරක් ඇමතිවරු, අරුන් මුන් ඉන්දැද්දි, ජනතා ප්‍රශ්ණ විසඳන්න රාජ්ජ නිළධාරිත් පිරිවරාගෙන ගම් දනව් පුරා සැරිසරනවාය.

අපරාදේ කියන්නේ මෙහෙම බලාපුවාම. ජේ ආර්ලා, ප්‍රෙමෙලා ඉතරක් නොව බලයට මළ පෙරේත් පවුලක් වෙන බන්ඩාරණායක පවුලේ සැටලයිට් නෝනත් සත්තරන් වගේ ඉස්තරන්ය. තා ටික දවසකින් පොළොන්නරුවේ සත් මහල් ප්‍රාසාදේ, ගල් විහාරේ, තිවංක පිළිම ගේ හරහා පුලතිසි නයිට් රේස් තිබ්බොත් හෙම ඔහේලා කලබල වෙන්න ඕනත් නැතිය.

ඒ වගත් මෙසේය...