මරු ආ කළ මිතුරේ, බේරෙන්න බෑ සසරේ - Tribute to Anton Jones

 

 

මාතලන්ට මතක ළමා කාලයේ ආරම්බය ගෙවෙන්නේ බයියන් රජකල යුගයකය. එකල රට පාලනය කලේ බයියන් පමණක් නොව මෙළෝ රහක් නැති සමාජවාදි කාරයෝය. මහින්ද යුගයේ වගේම සට්ටැඹි කලාකාරයෝ පිරිසක් අම්මට සිරි ලංකාවේ තිබුනු එකම හුලං විදුලි සේවය උන්ගේ බූදලයක් කරගෙන සිටියේය. උන් ප්‍රචාරය කලේ ජාතිකාභිමානී ගීත පමණි. උන් කැමති දේ අපිට බලෙන් දුන් අතර, අපට කැමති දෙයක් කිරීමේ නිදහස සම්පූර්ණයෙන් අහුරා තිබිනි. කොටින්ම බත් කෑම පවා තහනම් කර තිබිනි.

 

ලංකාවේ ජනප්‍රියම ගායකයා වන ජෝතිපාලගේ කිසිම ගීතයක් උන් ප්‍රචාරය කළේ නැත. කන්ඩායම් ගීත වලට හා බයිලාවලට කිසිඳු තැනක් තිබුනේ නැත. කන්ඩායම් ගීතයට ඉන්ගිරිසි සේවය විජය කොරයා අවස්තාවක් ලබා දීමෙන් පසු. විනාඩි 15 ක් වෙන කර ගත්තේ බොහෝම අමාරුවෙන්ය. බයිලා වලට තිබුනේ මුලු සතියටම විනාඩි 15ක් පමණි. ඒ ඉරිදා දවල් 12:30 සිට 12:45 දක්වා පමණි. ඉන් පසු ප්‍රචාරය වූයේ දිවා ප්‍රවෘතිය.

 

කෙසේ හෝ ඉරිදා දිනයේ වෙළඳ සේවය ඔස්සේ ප්‍රචාරය උන වැඩ සටහන් කීපයකම තේමා වාදනය ලෙස ප්‍රචාරය වූයේ මේ පහත් තිබෙන ගීතයේ වාදනයයි. මාතලන් මේ තේමා වාදනයට බොහෝ ප්‍රිය කල අතර  එය ගීතයක් බවත් එය ගායනා කරන්නේ ඇන්ටන් ජෝන්ස් නම් ගායකයකු බවත් ගීතයේ නම "සීගිරි ගිරි සිකරය" බවත් දැන ගැනිම කෙලවර වන්නේ, ඒ ගීතය ඇසීම සඳහාම ටේප් රැකෝඩරයක් ගෙදරට ගෙන ඒමය.

 

 

ඒ කාළේ ඇන්ටන් ජෝන්ස් ගායන කර තිබූ "ගල්කිස්සේ මූදූ වෙරලේ" (ෆ්‍රෙඩී සිල්වා සමඟ) මෙන්ම, "අඳින්න මිනි ගවුම අඳින්න",  "කන්තෝරුව කන්තෝරුව මම වැඩ කරන", "හාරලක්ෂෙ", "ඔමල පපා කොමල පපා අපේ ලඟට එන්නකෝ" වගේම "කන්දේ හැපුන මහ වනන්තරේ" මාතලන්ගේ ෆේවරිට් සින්දු වන්නේ, තාත්තා ගෙනත් දුන් මේ පිලිප්ස් රැකෝඩරයට පින් සිද්ද වන්නටය.

 

එසේ ආසා කරපු ඇන්ටන් ජෝන්ස්ගේ ෆොටෝ එකක් දැක ගන්න හම්බ වෙන්නේ ජේ ආර් පප්පාගේ ඕපන් ඉකොනමි නිසා ආපු කැසට් පටි නිසාය. දැන් තිබුන ආසාව උනේ කොහොම හරි ඇන්ටන් ජෝන්ස් ඇත්තටම බලා කියා ගන්නා එකය. ඒ වාසනාව හිමි වන්නේ රැලට වැටුන කාලයේය. අපේ පවුල් වල උන් සංගීත කියන්නේ මොනවාද කියා දැනගෙනවත් උන්නේ නැති කාළෙක, සංගීත ඉතරක් නොව වාද බයිලා පවා බලන්න යන්නේත්, සමාජය හා රට තොට ඉගෙන ගන්නේත් මේ රැලේ වැටීමට පින් සිඳු වන්නටය.

 

මාතලන් ඇන්ටන් ජෝන්ස් ඉස්සෙල්ලාම දැක්කේ ආමර් වීදියේ මියුසිකල් ෂෝ එකකදීය. ඔහු ඉතා කඩවසම් පුද්ගලයෙකි. . ඇඳුම පැලඳුම ඉතා පිලිවෙලය. කොන්ඩය ක්‍රීම් ගා මනා ලෙස පීරා ඇත. බොහෝ නිහතමානිය. කලබලයක් නැත. මා දන්නා තරමින් කිසිඳු සංදර්ශනයක අනෙක් ගායක ගායිකාවන් හා ප්‍රශ්ණ ඇති කරගෙන නැත. සංවිධාකයින්ට කිසිඳු ප්‍රශ්ණයක් ඇති කර නැත්තේය.

 

ඉන් පස්සේ අපේ හන්දියේ උන්ද සම්බන්ද කරගෙන පවත්වන පට්ටිය හන්දීයේ සංගීතයට, ඇන්ටන් ජෝන්ස් ගෙන්නුවේ අපේ නෑවෙන එකෙක්ය. කියන්න ඕන සින්දු ටික සිලෙක්ට් කිරීමේ වාසනාව හිමි වූයේ මටය. අර යකා සල්ලි කාරයා නිසා, ඇන්ටන් ජෝන්ස් සහ ඔහු එක්ක එන සෙට් එක ඉස්සෙල්ලාම ආවේ අරූගේ ගෙදරටය. අපි පොඩි උන් නිසා අපිව පයිසෙකට ගනන් නොගත්තත් ,මම මේ අපූරූ මිනිසාට වශීවී සියෙමි.

 

ඒ ඔහුගේ හඬට හා රුවටය. ඇන්ටන් ජෝන්ස්ට හිටිවන බයිලා ගැයීමේ හැකියාව තියේ කියා දැනගත්තේ දැණුම් තේරුම් ඇති කාලයේ අර යකාගේ ගෙදර පැවති උත්සවයකදීය. එදා ඔහු අපේ යකා වර්ණනා කරමින් අපූරු ගීතයක් ගායනා කල අතර මගේ ප්‍රියතම ගීතය වන, "කන්ද උඩරට සිරි දළදා මැදුර"ද ගයා මගේ ඉල්ලිමද ඉටු කලේය.

 

ඇන්ටන් ජෝන්ස්ට අනෙක් ගායක ගායිකාවන්ට නැති වාසනා ගුනයක්ද විය. ඒ බොහෝ සංගීත සංදර්ශන වලදි සංවිධායකගෙන් ලැබෙන මුදලට අමතරව එම ප්‍රදේශයේ අයියාගෙන් ඉස්ටේජ් එක උඩ ලැබෙනා මොණර කොල මල් මාලයයි. ගමේ අයියලා මෙන්ම පාතලේ නායකයෝ පවා මේක ට්‍රෙන්ඩ් එකක් කරගෙන තිබූ අතර, අපේ හන්දියේ සෝ එකේ මේ වරම හිමිව තිබුනේ පොඩ්ඩේ අයියාටය.

 

පොඩ්ඩෙ අයියාලාගේ කල්චර් එකට ඇන්ටන් අල්ලලා යන්න ඇත්තේ, "නිර්භීත මරු සිරා", "පොලොන්නරුවෙ පොඩි විජේ" වගේ එයාලාගේ සෙට් එකේ බයිලා නිසා වෙන්න ඇතිය. දෙශප්‍රේමි බයියලා අතරේ ජනප්‍රිය වන්න ඇත්තේ, "හසලක ගාමිණි" සහ "සේපාල ඒකනායක" නිසා වෙන්න ඇතිය. ටොයියන් අතරේ ජනප්‍රිය වෙන්නේ "මිනි ගවුම" හා "කන්තෝරුව" නිසා වෙන්න ඇතිය. "කන්දේ හැපුන මහ වනන්තරේ", "සුළි සුළං හමාලා" සහ මාතර නිල්වලා ගඟේ ඛේදවාචකය වන, "ආසයි බයයි ඒ බෝට්ටුවෙ නමයි" හේතුවෙන සාමාන්නිය ජනතාව ඔහුට කැමති වෙන්නට ඇතිය.

 

ඔහු ගායනා කලේ ලංකාවේ මෙන්ම ළෝකයේ කතා බහට පත් වූ කාරනාවන්ය. එක අතකින් බලන කල ඔහුගේ ගීත තුල එම සිද්දීන් වල ඉතිහාස කතාව සම්පූර්ණයෙන්ම අඩංගු වන්නේය. සම හරක් මෙය විවේචනයටද ලක් කල නමුත්. මාතලන්, "ප්‍රේමවති මනම්පේරි"යගේ ඥාතීන් හමුවී කතා කල අවස්ථාවක දැන ගත්තේ ඔවුන්ගේ කිසි විරෝධයක් නැති බවත්. ඇන්ටන් ජෝන්ස් නිසා අද සමාජයත් ප්‍රේමවති මනම්පේරී කියන්නේ කව්ද කියා දැන ගන්නා බවත්ය. කෙසේ හෝ පසු කලෙක ඔහු මෙම ගීතය හා මතුගම "සමන් කුමාර "සිද්දියේ ගීතය ගායනා කිරීම විවේචන නිසාම නවතා දැම්මේය.
 

 

 

බයිලා ගීත ප්‍රිය නොකරන උන් පවා ඇන්ටන් ජෝන්ස් ප්‍රිය කලේ ඔහු ගැයූ ගීත වල අඩංගු වූ ප්‍රස්තුත කාරනාවන්ම නිසාම වෙන්නට පුළුවන්ය. අනික් හේතුව ලෙස මාතලන් දකින්නේ ඔහු වැදගත් යයි සම්මත ආයතනයක රැකියාවක් කිරීමයි. එමෙන්ම ඔහුගේ වැදගත් පෙනුමද ඊට ඉවහල් වන්නට ඇතිය.

 

මාතලන් ඒ කාළේ සංගීත වලට ගියේ ප්‍රියතම ගායකයින් කීප දෙනෙක් දැක ගන්නටය. ඒ ජෝතිපාල, මිල්ටන් පෙරේර, මිල්ටන් මල්ලවආරච්චි. MS හා ඇන්ටන් ජෝන්ස් දැක ගැනීමටය. පස්සෙ කාලේ ගියේ විශේෂයෙන් චන්ද්‍රලේඛා හා ඇන්ටන් ජෝන්ස්ගේ ගීත විඳීමටය. මාතලන් ගායිකාවන්ගෙන් කැමතිම චන්ද්‍රලේඛාටය. බයිලා ගායකයින්ගෙන කැමතිම ඇන්ටන් ජෝන්ස්ය.

 

ඇන්ටන් ජෝන්ස් මියගිය බව දැනගත්තේ චන්ද්‍රලේඛාගේ "හිරු ටී වී අන්ප්ලග්" නැවත් නරඹමින් සිටිද්දී වීමත් පුදුම සහගතය. චන්ද්‍රලේඛා කවදා හෝ දැක ගන්න ලැබුනත් ආයේ කිසි දිනෙක් ඇන්ටන් ජෝන්ස් දැක ගැනීමට ලැබෙන්නේ නැත. ඇනටන් ජෝන්ස් කිව්වා වාගෙම අවසාන වශයෙන් මාතලන්ට කීමට ඇත්තේද මෙයමය.

 

මරු ආ කළ මිතුරේ, බේරෙන්න බෑ සසරේ, කාගෙද මට වරද නොතේරේ....

කළාකරුවන්ට මහත් සේ ආදරය කරන හා උදව් උපකාර කරන චන්දන  ගුණසෙකරගේ ළිපිය << මෙතනින් කියවන්න >>..