විදුලිය, පරිපත හා පට්ට විදුලි ඉංජිනේරුවෝ - Funny Electrical Engineers

මාතලන්ගේ තාත්තා එක්ක ටැලිවිසොන් එකේ නිව්ස් අහන්නට හෝ බලන්නට වෙන්නේ නැතිය ඒකට හේතුව එයාට එච්චර ඇහෙන්නේ නැති එකය. එයාට ඇහෙන ගානට ටී වී එක දැම්මොත් ශබ්ද දූෂණය කොලාය කියා පරිසර අමාත්තියන්සෙන් උන්දෑ අත් අඩංගුවට පත් වෙන්න පුළුවන්ය. ඇත්තටම සද්දෙට දාන ඒක නවත්තලා තියෙන්නේ එහෙම බය කොරලාය. ඒත් අම්මා එක්ක විතරක් ඉන්න වෙලාවට, එයාට ඇහෙන ගානට ටැලිවිසොන් එක දාගන්නවාය. එතකොට අහල පහල මිනිස්සු ජනෙල් දොරවල් වහ ගන්නවාය.

 

ඔය එයාට ඇහෙන්නේ නැති ගානට නිව්ස් දාපු ගමන් එයා කොරන්නේ ටෙලිවිසොන් එක ඉස්සරහා ටීපෝවේ ඉඳගන්න එකය. ඊට පස්සේ ඇහෙන්නේ නැති නිසා කොරන්නේ, අර ටී වී ඉස්කිරීන් එකේ පහළම හරියේ කෝච්චියක් වගේ යන නිව්ස් කියවන එකය. ඒක කියවලා නිකන් ඉන්නේ නැතිය අර දෙරණේ රීරී යකා හෙවත් චතුරයා වාගේ, ඒ නිව්ස් ගැන එයාගේ අර්තකථන දෙනවාය. ඊට පස්සේ ටී වී එක නිව්ස් කියවද්දි අපි එයාගේ විස්ලේසොන් වලට සවන් දෙන්වාය.

 

අද නිව්ස් යන අස්සේ ඔහොම මොකක්ද එකක් දැකලා එකපාරටම පටන් ගත්තේ, අම්මට හැමිනෙන්නද එහෙනම් මේ යකා ඔතන ඉන්නේ කියලාය. තාත්තාට මල පැන්න වෙලාවට හොඳ කතා ටික්ක අහගන්න පුළුවන් නිසා මම ඇහුවේ මොන යකාද තාත්තේ කියලාය. උන්දෑ කියනා කතාව සහතික ඇත්තය. අර අස්වීමේ ලියුම දීපූ සභාපතියා කලින් ආන්ඩුවෙත් සභාපතියාය. ඒ උනාට ඒ යකා කියාන්නේ මේ පරිපත් සම්බන්ධ කරලා තියෙන විදිය වැරදිය කියලාය. මේ ක්‍රමය අනුව කඩාවැටීමක් සිඳු උනාම නොරොච්චෝලේ අසාමාන්නිය හැසිරීමක් පෙන්නනවා කියලාය.

 

අසාමාන්නිය හැසිරීම පෙන්නුම් කරන්නේ නොරොච්චොලේ ඉතරක් වෙන්න බැරිය. ආන්ඩුවේ මැති ඇමතිවරුන්ගේ අම්මාවරු මෙන්ම විදුලි බල මණ්ඩලයේ ඉංජිනේරුවන්ගේ අම්මාවරුන්ගේද අසාමාන්නිය හැසීරිම් රටාවක් අනිවාර්යයෙන්ම පෙන්නුම් කරනවා ඇතිය. ඒ ඉතරක් නෙමේය විදුලි බලයේ පිහිටෙන් කීයක් හෝ හරි හම්බ කරගන්න උනුත් එහෙම හැසිරීමක් පෙන්නනවා ඇතිය.

 

මාතලන් ඇමතියා නම් සභාපතියාගේ ලියුම පිලිගන්නවා පමණක් නොව, එලෙවන්නේ පුකට පයින් ගහලාය. කරුමේ වෙල තියෙන්නේ ඒකය. මේ යකා කියන්නේ විදුලි උප පොලවල් හා බලාගාර සියල්ලම එකට සම්බන්ධ කොරලා තියෙන එක වැරදියි කියලාය. ඕක අපි නම් දන්නේ වෙසක් එකට ලයිට් වැල් දානා කාලයේ ඉඳලාය. හරි සිස්ටම් එකට වයරින් කොලේ නැත්නම් එක බලුබ් එකක් පිච්චුන් ගමන් ලයිට් වැලම වැඩ කොරන්නේ නැතිය. ඒ නිසා එකක් පිච්චුනත් අනෙක් ඒවා වැඩ කරන විදියට වයරින් කරන්න පුළුවන් විදියක් තියෙනවාය.

 

අර ආන්ඩුවේ මේවා කරන්න දුන්නේ නැත්නම් මේ ආන්ඩුව ඇවිල්ලාත් මේවා දැන දැනත් නිවැරදි නොකලේ මන්දැයි කියා ඒ මහත්මයාගෙන් අපිට අහන්නට වෙනවාය. ඔය පත් කරලා තියෙන කමිටු වලට වියදම් කොරනා සල්ලි වලින්, යලිත් මෙවන් විපත් සිඳු නොවේවා කියා බලු කපුටු දානයක් දෙන එක එයිට වඩා හොඳය. මොකෝ ඔය කමිටු ගැනත් ඒවායේ නිර්දේශ ගැනත් අපි හොන්දට දන්නා නිසාය.

 

මහා නඟර හෙවත් මෙග පොලිස් ප්‍රොජෙක්ට් කරන්න යන්නේ මෙහෙම ලයිට් නැති වෙන රටක නම්, අපට කියන්නට සිඳු වෙන්නේ ඒවාට අබ සරණයි කියලාය. ලබුගමට ජෙනරේටරයික් නැතිය. ඉස්සර කොළඹට විදුලිය ලබාදුන් කැළණිතිස්ස බලාගාරයෙන්වත් (ඩීසල්) අඩුම ගනනේ කොළඹටවත් විදුලිය ලබා දීමේ හැකියාවක් නැද්ද..? මෙහෙම ඉංජිනේරුවන්ගෙන් ඇති වැඩේ කුමක්ද? මේ ගොන් බූරූ වැඩෙ කලේ කාගේ උපදෙස් අනුවද? නොරොච්චෝලේට සම්බන්ධ කරන තෙක් රටේ විදුලිය ලබා දුන්නේ කෙසේද?

 

මේවා කඩාකප්පල්කාරී ක්‍රියානම් ආන්ඩුව හෝ අගමැති සමාව ඉල්ලීමෙන් වෙන වැඩක් ඇත්තේ නැත. එයින් පෙන්වන්නේ ආන්ඩුවේ අකාර්යක්ෂම බව මිස වෙන කිසිවක් නොවේ. එමෙන්ම මේ පිලිබඳව ප්‍රශ්ණ කරන ජනතාව කෙරේ ආන්ඩුවේ බුද්ධිමතුන් මල පන්නාගෙනද වැඩක් නැත. මේවා හරියට මූණත් සමඟ මල පැන නහය කපා ගැනීම් වාගේය.අඩු ගානේ ආන්ඩුවේ වෘත්තිය සමිති වත් කිසිම පලක් ඇති ඒවා නොවේ. මේවා කඩාකප්පල්කාරි ක්‍රියා නම් ඔවුන්ගෙන්ද සත පහක වැඩක් නැතිය.

 

සමාව ගත්තා කියා හෝ මල පන්න ගත්තා කියා හෝ ප්‍රශ්න නගන ජනතාව එලවා ගත්තා හෝ කියා ජනතාවට වෙච්ච පාඩු ලැබෙන්නේ නැත. දැන් දැණුම් දීමක් නොමැතිව විදුලිය කපා හරින බව කියයි. යහපාලනය කියන්නේ මේකද? කුඩා ව්‍යවසාකයන් ජීවත් වන්නේ කෙසේද? අඩුම ගානේ කලින් දැණුම්දීමක් කරන්නේ නම් ඔවුන්ට ඒ වෙනුවට විකල්ප බලශක්තිය හෝ යොදාගැනීමට පියවරක් ගත හැක.

කෙසේ හෝ අවසානයේ කීමට ඇත්තේ අපේ තාත්තා කියූ දෙයමය...

 

මෙහෙම පැය ගනන් විදුලිය නැතිව ඉන්න නම්, කප්පරක් ඉංජිනේරුවෝ අහවල් එකටද කියලාය.

 

මේ පිළිබඳව සමාජයේ විවිධ පුද්ගලයින් පලකල අදහස් පහත පල වේ...

 

ඒක තැනක ට්‍රාන්ස්ෆෝමරේ ගියාම ලංකාවෙම ලයිට යන්නේ, මුන් ලයිට් වැලක් වත් හරියට වයරින් කරන්න බැරි ඉංජිනේරුවොද බං - අපේ තාත්තා

 

මේක පුතේ අර නායක හාන්දුරුවන්ගේ ආදාහනේ බලන්න බැරි වෙන්නේ ක්‍රිස්තියානී කාරයෝ කරපු වැඩක් - අපේ අම්මා

 

කුස්සියේ බලුබ් එකක් පිච්චුනාම, ගෙදරම ලයිට් නැතිවෙන සිස්ටම් එකක් මේක - මාතලන්ගේ මිත්තරයෙක්

 

පැය 9 ක් රටම කරන්ට් නැතුව උන්නා කියලා මම දැන ගත්තේ පත්තරෙන් හිටං - ජනාධිපති තුමා

 

මීට පස්සේ ට්‍රාන්ස්ෆෝමර් කැඩෙනවා නම් මට කියලා උපදේස් අරගෙන කැඩෙන්න ඕන හිටං - ජනාධිපති තුමා

 

ලයිට් නැති වෙන්නේ රාජපක්ෂලා ඒ කාළේ වැඩියෙන් ලයිට් අරං තියෙන නිසා... කරන්ට් එකවුන්ට් වලත් දාලා තියෙනවලු - අගමැති තුමා

 

මේක තනිකර බටහිර කුමන්ත්‍රණයක්.. - රජ ගෙදර රිලවා මැති තුමා

 

ඔය ට්‍රාන්ස්ෆෝමරේ කවුරු හරි උප පොලේ දාලා ගිය එකක් - උඩුවේ බලන හිමි

 

මලබද්ධ විපක්ෂය වශයෙන් මේ පිපිරීම තරයේ හෙලා දකිනවා - දිනේස් වන ගුර්ධන

 

මේක ගන්න කොටම පුපුරන බව මම දැන ගෙන උන්නා.. ඒත් බයට කිව්වේ නෑ - කේන්දර සුමනේ

 

ඉදිරියේදී මේ වගේ පිපිරීම් තවත් සිද්ද වෙන්න පුළුවන් - නින්දිත තොටවත්ත

 

පොහොර ප්‍රශ්ණය මග හැරීම සඳහා ආන්ඩුව හිතා මතා කල දෙයක් වෙන්න පුළුවන් - ජනතා විභක්ති පෙරමුණ

 

කුමාර් ගුණරත්නම් නිදහස් කරණු - පසුගාමි පක්ෂය

 

මේක චම්පිකගේ වැඩක් වෙන්න පුළුවන්, මොකෝ එයත් කාලයක්  ඇමති කම කලා නේ - මං ගොනා පිල මැති තුමා

 

මේක ගිගාවොට් වලින් දුවන එකක්ද? මෙගාවොට් වලින් දුවන එකක්ද - පවිත්‍රා වන්නිආරච්චි

 

කොහොමද පොල් ගැහිල්ලේ බලේ... තව එක පාරයි ඝහන්න ඕන.. ඔක්කොම කේල වෙල යන්න - බන්ධුල අගුණවර්ධන

 

මේක මහින්දගෙ වැඩක් - අජිත් පී පෙරේරා

ඕවට හමුදාව දැම්මා කියලා ඕවා අරක්ෂා වෙන්නේ නෑ.. සෑම තැනකටම වාලම්පූරී තියලා පූජාව කරන්න ඕන.. පාර්ලිමේන්තුවටත් සෙංකෝලය අයින් කරලා ඒ වෙනුවට වාලම්පූරියක් තියන්න ඕන - නමෝ නාරයන් මැති තුමා

 

මට ආන්ඩුව දුන්නා නම් ලයිට් නැති වෙන්නේත් නෑ... කන්න නැති වෙන්නේත් නෑ... බොන්න නැති වෙන්නේත් නෑ... සල්ලි නැති වෙන්නේත් නෑ... ජනතාව නැති වෙන්නේත් නෑ.. - මහින්ද රාජපක්ෂ