එන්න යන්න නෙළුම් විලේ නෙළුම් නෙලන්න - Nelum Yaya Blog Awards 2016

 

 

දිනය, වරුෂ 2015 මාර්තු 26 වනදාය. සම්මාන උළෙල අවසාන භාහයේ පටන් ගත් මහා වරුෂාව නිසා පාරේ ටැපික් එක හෝ ගාලාය. සම්මාන උළෙල නොව ඕනම මලදානයක් අවසානයේ අනුමත් වීම එකම සිරිතක් කරගත් පිරිසක්, කොට අජියාගේ ඉස්පොට් එක සොය වාහන කට්ටක ගමන් කරමින් සිටි. ඉන් එකෙක් මාතලන්ය. ඌගේ ෆෝන් එකට එන ඇමතුමකි. "අඩෝ අන්න උඹ ටෙලිවිසොන් එකේ පෙන්නුවා...." ඒ මාතලන්ගේ බොක්කකි.. "අඩෝ... මොනාටද බං උඹ වගේ එකෙකුට සම්මාන දෙන්නේ. කරූට පිස්සුද..? ඇත්තටම මොකක්ද බං සීන් එක...?

 

තව ටික මොහොතකින්, තවත් ඇමතුමකි. "ඒයි... අන්න උඹව නයි ටී ඇන් නිව්ස් වල පෙන්නුවා.. මක්කෙයි බං බොග් කියන්නේ? දැන් බොග දානවටත් සම්මාන දෙනවැයි...?" ඒ හඬ ඇහෙන්නේ මාලිගාවත්ත ලී මෝලෙන් නොවේ.. ඊටත් වඩා බොහෝ සද්ද, මාතර නෑ වෙන අක්කා කෙනෙක්ගෙන්ය. පට්ට කෙලියකි. වේලෙන්නත් කලින් පත්තරේ දාලාය. අපි තාම සැලබෙරේට් කොරන්න පටන් අරගෙනත් නැතිය. දැන් මුන්ට මේවා එක්ස්ප්ලේන් කොරන්නත් විදියක් නැතිය. උන්ට කිව්වේ, පස්සෙ කියන්නම් කියලාය.

 

මාතලන් බොග දාන බව මාතලන්ගේ බොක්කේ පොරවල් වත්, අම්මා තාත්තාවත්, නංගි මල්ලිවත්, නෑයෙක්වත්, එතෙක් දැන උන්නේ නැතිය. දැනගෙන උන්නේ හාමිනා ,නැන්දම්මා හා පුතා පමණකි. ඊට පස්සේ, වැඩේ තවත් වන උනේ, ඊළඟ සතියේ, සිව්මංසල කොළු ගැටයා හෙවත් නාලක ගුණවර්ධන ලොක්කා, මේ ගැන පොටෝ එකකුත් එක්ක පත්තරේ විස්තරේ දාලා තිබුන නිසාය. අපේ පවුලේ ගොඩක් උන් "රාවය" කියා පත්තරයක් තියෙනවා කියා දැන ගත්තේත් එදාය. නියම සීන් එක කියන්නේ පත්තරෙ සීන් එක දැකලා තිබුනේත් අපේ පවුලේ රොයිටර් සේවයේ කෙනෙක් නිසා, ගේම නැගලාම ගියේය. අන්තීමට මාතලන්ට උනේ හම්බ වෙච්ච ගානට අතිනුත් දාලා, නෑයන්ටයි යාළුවන්ටයි පාටි දාන්නය.

 

ඔය සම්මාන උළෙලට යන්න එපා කියා මගේ බොග් යාළුවෝ බොහෝ දෙනෙක් කිව්වේය. කොටින්ම උත්සවේ වෙලාවෙත්, ඉඳ හිට බොගක් දාන "වෙනියා" කිව්වේ මාතේ උඹ ඕක ගන්නෙ නැත්නම් හොඳයි කියාය. ඒකට හැමෝම හේතුව ලෙස කිව්වේ එක්ස්පෝස් වෙයි කියලාය. හැංගි හැංගි වෙස් බැන්දාට නටන්න වෙන්නේ එලියේය. ඇනෝ ලෙස ආවත් ඕනා එකෙක් ඉන්න ඉසව්ව ඕන එකෙකුට හොයා ගන්න පුළුවන් මේ කාලයේ ඕකට නොගිහින් ඉන්නා එක මොඩ කමකි. අනික ඊ මේල් මගින් අජියා කරන ගේම දැක්කාම කිසි දිනෙක දැක නොතිබූ නමුත්, ලන්ඩනයේ ඉඳන් ඇවිත් මූ මේ කන කට්ටට අගය කිරීමක ලබා දිය යුතුව ඇත්තේය. මෙතරම් ඇවටිලි කරද්දිත් මාතලන් මේක මග හරින්නේ නම්, එය මාතලන් කරන අමු කුහක වැඩකි. සම්මානයක් ලැබී ඇත. එය ලබා ගත යුතුය. ඒ අවසාන තීරණයයි. 



(Pic by Sudam Gunasinge - Silumina)

මාතලන් කතන්දර ගුරු ජී ගෙන් අසාගෙන බොග දාන්න පටන් ගත්තේ කවි වලට ඇති ආසාව නිසාමය. එහෙත් පැරා කියනවාක් මෙන් කවියට එතරම් ගෝ එකක් සමාජයේ නැත. ඉන් පස්සේ ලිව්වේ අනං මනං වල් පල්ය. ඒ කාලේ උන් "ටැබූ" හා "බියෝන්ඩ් ෆ්‍රේම්" කරපු සමාජ මෙහෙවර, ඔවුන් බ්ලොග් ලොවෙන් සමුගත් හෙතුවෙන්, විශාල රික්තයක් ඇති විය. මාතලන් වැඩියෙන්ම ආසා කරන දේශපාලනය ලියන්න ගත්තේ ඉන් පසුවය. මෙය නැගලාම ගියේය. නෙළුම් යාය සම්මානයටත් වඩා, අදටත් මට වටින්නේ සමාජයේ ඉහළම තලයේ සිට, අපි වගේම සාමාන්‍ය උන්ගෙන් ලැබෙනා ජනතා සම්මානයය. මාතලන් හිතන්නේ ඕනෑම ක්ෂෙශ්ත්‍රයක එකෙක්ට ලබන්න පුළුවන් උපරිම සම්මානයත් එයයි කියාය.

 

කෙසේ වෙතත් අජිත්, චන්දිම විසින් සිඳු කල ඒ අගනා මෙහෙය මාතලන් නම් දකින්නේ එතෙක් මෙතෙක් බොග දාන උන් වෙනුවෙන් කල ඉහළම සේවයයි කියාය. මාතලන් බ්ලොග් වලට මෙන්ම බොග දාන සෑම සියළු දෙනාටම ආදරේය (දෙදෙනෙකු හැර. එකෙක්, පෞද්ගලිකවම මාගේ මැනියන්ට හා හාමිනාට සිඳුකල අපහාස නිසා උගෙත් එක්ක ආයේ පයුරු පාසා නම් ඇත්තේ නැත. අනෙකා ඇගේ අඩවියට පැමිනීමෙන් වලකින ලෙසත්, කොමෙන්ට් කිරීමෙන් වලකින ලෙසත්, බුකියෙන් හා සියළුම සමාජ මාධ්‍ය ජාල තුල ඇති සම්බන්ධ කම් වලින් ඉවත් කරන ලෙසට ආදරයෙන් කරනා ලද ඉල්ලීමට ගරු කිරීමක් වශයෙන් සදහටම ඉවත් කර දමන ලදි.)

 

එසේ ආදරය කලද, බොග දාන උන්ට විශේෂ යමක් කල නොහැකි නිසා කරන්නේ, බොග් අඩවියෙන්ම සම්මානයක් දීම පමණි. එසේ තිබියදි අජිත් හා චන්දිම පටන් ගත් මේ සද් ක්‍රියාවට මින් පසු දිය හැකි උපරිම සහාය ලබා දෙන බවට සිතා ගත්තෙමි. එදා අනුමත වන වෙලේ සියල්ලන් එකතුව ලබා දුන් බොග් සංසදයේ සභාපති කම පසුව මා නිහතමානීව ප්‍රතික්ෂේප කලේ එසේ කිරීමෙන් මගේ ස්වාධිනත්වය නැති වන නිසාමය. එහෙත් කමියා ඒ වගකීම ඉතා ඉහළින් කරමින් සිටීම අප සැමගේම වාසනාවකි. උන් සමාජය වෙනුවෙන් කරනා සද් කාර්යයන් බොහෝය. මාතලන්ට ඒවා කිරීමට කාලයක් ඇත්තේ නැතිය.



අජියා, චන්දිම, කමියා, හා විශාල පිරිසක් මේ සඳහා මෙවරත් පේවී සිටිති. එමෙන්ම හියවර මෙන්ම නම ගම සඳහන් කිරීමට අකමැති ඒ අනේපිඬු සිටානෝ මෙවරද සියළු බරපැන දරමින් සිටිනාතර, අජියා පැවසුවේ බොග දාන දෙන්නෙක් තුන් දෙනෙක්ද මුදල් ආධාර කර ඇති බවකි. මෙවර බොග් සම්මාන උළෙල පළවන එකට වඩා බොහෝ ඉදිරියට ගොසිනි. සංවිධාන කටයුතු වලට සහාය ලබා දෙන පිරිස හැරුණු විට, අනෙක් සියළුම දේ කරනුයේ බොග දානා උන්මය. එය ඉදිරියට තැබූ මහා පියවරකි.

 

නෙළුම් යාය තේම ගීය හා සියළුම සංගිත කටයුතු මනා ප්‍රමුඛ බොග දාන උන්ගෙන්ය. නිවේදන කටයුතු ප්‍රසිද්ධ නිවේදක (ඔව් දැන් එයා මාර ප්‍රසිද්ධයී) ඉවාන් පවුලූෂා හා දිලිනි නිමන්තිකාගෙනි... ඒ ඇර, අම්මට සිරි ලංකාවේ ප්‍රථම වෘත්තියවෙදී බොග දාන්නා වන, අජිත් පැරකුම් ජයසිංහ හා ළෝකය පුරා ප්‍රසිද්ධ බ්ලොග් කරුවකු හා ජනප්‍රිය මාද්දියවේදියකු වන නාලක ගුණවර්ධනයන් සමඟ කෙරෙන බ්ලොග් කතා බහකි. අතරින් පතරින් නටන්නට එන කැතරින්ලාද බොග දානා උන්මය. කාටද ආඩම්බර...

Nelum Ajith

මෙයිටාමතරව අජියාට ලැබෙන රොයිටර් ආරංචි මගින් වාර්ථා වෙන්නේ, දැනටමත් දිවයිනේ හතර දෙසින්ම මෙයිට සහභාගි වන පිරිස බොහෝ නිසා, තේ කෝප්ප හා කේක් ප්‍රමාණයද වැඩි කරන්නට සිඳු වූ බවකි. එමෙන්ම මේ වෙනුවෙන්ම අතින් කයිට් කරගෙන, පිටරට සිට, අජියා මෙන්ම එන කීප දෙනෙක්ද වන බව එහෙන් මෙහෙන් ආරංචි විය. මාතලන්ට ලැබෙන දූෂමාන ආරංචි වලින් නම් පෙනී යන්නේ, බොග දානා විශාල පිරිසකට මෙවර තෑගී මෙන්ම සම්මාන ලැබෙනා බවක්ය. (ඔක්කෝටම දීලා, ලබන අවුරුද්දේ දෙන්න එකෙක් නැති වෙයිද මන්දා..?)

වසරේ බ්ලොග් කරුවා තේරීමට ගොස් කට්ටියම නාගෙන සිටින බවක්ද ඒ සමඟ නිව්ස් වලින් ආවේය. ඒ කියන්නේ පට්ට ලෙස බොග දාන උන් බොහෝමයක් සිටින බවය. ඉතින් බොග දානා උන් හැටියට තවත් ආඩම්බර වෙන්න වෙන දෙයක් ඕනද? මෙතරම් නිදහස් මාධ්‍යක් තවත් කොහි වෙත්ද? මාධ්‍යවේදියෝ කියන්නේ නිදහසක් නැති පිරිසක්ය. ඒහෙත් බ්ලොග් කරුවෝ කියන්නේ ස්වාධීන පුදගලයෝය.

එන්න.. බොග දාන.. කොමෙන්ට් දාන.. මරා ගන්න.. තද උනාම වහලා දාන.. ඒත් කුඩු ගැහුවා වගේ ආයෙත් ලියන... සියළු දෙනාම එන්න. මාර්තු 26 වෙනිදා සවස 2:00 ට ජනමාද්ද  හා ප්‍රවෘත්ති අමාත්තියන්සෙට එන්න... අපි අපේ නිදහස උපරිමයෙන් විඳිමු.... අවසානයේ තේ එකක් බීලා, සැඳෑ අඳුර ළොව ගලෙන වෙලාවට, දෙකක් දාමාගෙන සොමියේ ඉන්නට.... ගල්කිස්සෙ... ගල් අස්සේ... ගල් බෝතලයක් සමඟ බැදපු හුරුල්ලෙක් කාලා.... ආතල් එකක් ගන්න.... නොවරදවාම එන්න... බීච් එකේ නිදාගෙන... උදේට යන්න පුළුවන්....

 

එන්න යන්න නෙළුම් විලේ නෙළුම් නෙලන්න...
නෙළුම් ඔබේ අත මට දෙන්න..
හා.... හා.... හා.... 26 වෙනිදා සවසට ඇවිල්ලා යන්න
අපේ ළොවේ අපි රජ වෙන්න...

සම්මාන සඳහා නිර්දේශිත බොග දානා උන්ගේ නම ගම ආගම ඉපදුන දාතම මෙතනින් බලා ගන්න....