යහපාලනේ කුණු වැඩ හා වන ජීවී අධ්‍යක්ෂක ඉල්ලා අස්වීම - Sumith Pilapitiya's Resigning

මීතොටමුල්ලේ කුණු කන්ද පුත්තලමට කෝච්චියෙන් ගෙනියන්නත්.. ඊට පස්සේ කොළඹ එක් රැස් වන කුණු පුත්තලමට ගෙනියන්නත්, කලින් ආන්ඩුවෙත් ප්ලෑන් එකක් තිබුනා කියලා මගේ බොක්කක් මෑතකදි කිව්වා.. අද, වන ජීවී අධ්‍යක්ෂක ඉල්ලා අස්වෙලා තියෙන්නේ, විල්පත්තුව වන රක්ෂිතය මායිමේ තියෙන අරුවක්කාලූ කියන ප්‍රදේශයට කොළඹ කුණු ගෙනයන්න කැබිනට් මන්ඩලය ගත්ත තීරණයට විරුද්ධව.

කැබිනට් මන්ඩලයේ මූලාසනය ගන්නේ ජනාධිපති. උන්නැහේ මේ ඊයේ පෙරේදා මොකක්ද පරිසර උස්සවේකදි, නා ගහක් එහෙම ඉන්දලා. මාර "සිරා ටෝක්" එකක් දුන්නා පරිසර ඇමති කම එයාට තියා ගත්තේ ඇමති වරුන්ටවත් ඒක කරන්න බැරි තරමට බලපෑම් තියෙනවය, ඒ නිසා ඒක එයාගේ යටතට අරගෙන එයා ඒක ගුවන් හමුදාවටයි, නාවික හමුදාවටයි, යුධ හමුදාවටයි, ඇස් ටී ඇෆ් එකටයි බාර දීලා තියෙනවය, ලංකාවේ වනාන්තර වලට මක්කා හරි වෙනවා නම් ඒක කෙලින්ම එයාට කියන්නෙයි කියාලා.

අනේ ඉතින් අපිට ඔබ තුමාට කියන්න තියෙන්නේ, අර පොලොන්නරුවට පොඩ්ඩක් එහායින් කඳුරුවෙල පාර අයිනේ කුණු ගොඩක් දාලා, අලි එතනට ඇවිල්ලා වෙන විනාසේ දැකලා නැද්ද කියලා විතරයි. මේ කුණු ගොඩේ තියෙන ඉටි කොල ටික ඇති වන ජීවීන් ටික විනාස කරන්න. ඒ වගේම ඒ විල්පත්තුව පරිසර පද්දතිය විනාස වෙන්න. මීට කලිනුත් රිෂාඩ් බද්යුදීන් කියලා කාළකන්නියෙක් විල්පත්තුව විනාශ කරලා, ඒක නවත්ත ගත්තේ පරිසරවේදියොයි, නානසාරලයි, අරුනුයි මුනුයි එක්කහු වෙලා පට්ට ගේමක් දීලා. එහෙව් එකේ ආන්ඩුව මේ හදන්නේ විලපත්තුව කුණු ගොඩක් කරන්න.

ලංකාවේ වනාන්තර තියෙන්නේ 18% ටත් අඩුවෙන්. ඒ ටිකත් නැති උනොත් මේ රටට වෙන විනාශය ගැන කියන්න දැන් සිද්ද වෙන දේවල් ටිකම ඇති. අර යකා නම් අඩු ගානේ මිනිස්සු හරි ගිහින් පදිංචි කලා. මුන් කරන්නේ හදන්නේ විල්පත්තුව කුණු කන්දක් කරන්න. බලාගෙන ගියාම මුන්ට වඩා ඒ යකා දාස් ගුණයක් හොඳා...

කොළඹ මෙගා පොලිස් හැදුවම අනිත් පැති වල උන් පරිප්පු කන්න ඕන නෑ. මේ රටේ ළොකු පොරවල් කරන්නෙත් ඕක. තමන්ගේ වත්තේ කුණු පාරේ දාලා යන එක. ආන්ඩුව කරන්නෙත් ඒක. ඔය කුණු, කැත, කක්කි වැඩ නොකර, මොකා හරි එක්ක එකතුවෙලා කුණු ප්‍රතිචක්‍රීයකරන වැඩ සටහනක් ඉක්මනටම ක්‍රියාත්මක කලොත්, ඔය මොන සංවර්ධන යෝජනා ක්‍රමේටත් වඩා වටිනවා.

මක්කා උනත් ආන්ඩුවේ කක්කා තීරණවලට එරෙහිව කොන්ද කෙලින් තියාගෙන ඉල්ලා අස්වුන මේ වගේ මනුස්සයන්ට අපේ ප්‍රණමය පුද කරන්නම ඕන... උන්නැහේ මෑතකදි, අලි හොරු ටික එකතු වෙලා, අලි ටික ආයෙත් උන්ටම ගන්න ජනාධිපති තුමත් එක්ක සෙට් වෙලා තිබ්බ මීටීමේදීත් කෙලින්ම ඒ වැඩේට විරුද්ධ උන කොන්දක් තියෙන මනුස්සයෙක්.. එමෙන්ම එතුමා දැනට ළෝකයේ සිටින වන ජීවී විෂය පිළිබඳව සිටිනා ඉහළම බුද්ධිමතුන් 10 දෙනා අතර ඉන්න කෙනෙක්... එහෙම මිනිස්සු මේ රටේ ඉන්න කාළකන්නි දේශපාලුවන්ටයි හොර නිලධාරින්ටයි කොහොමත් ගැලපෙන්නේ නෑ..

දැන් ඉතින් අලි ටික ආයෙත් අලි හොරුන්ටම යයි.. කුණු ටික විල්පත්තුවට යයි...

පට්ට යහපාලනේ ඕයි....!!!

නියම සිරා ටෝක් ඕයි....!!!