ජම්බූ ගහෙන් වැටුන මල්වර නැකත - Menses & Censors

රෝස කැලයෙන් ආව රතු රෝස මල්    කැකුළි

උඹේ පා තැවරු තැන පිපුනි රතු මල්        පියලි

එහෙත් අද උඹ නැතිව ගඟ අසල තන      පිඩලි

කොයිද ඒ සෙව්වන්දි විමසාවී ඟං        කොමලි

ගැට පේර කිරි රසද බලන්නට හැකි       වේද

බන්ඩි කුඹුරක පහස කිති කවයි මගේ      හද 

මුව අයා බලා හුන් සියොත් කැල විම      සාද

ප්‍රේමයට පහස දුන් තුරු ලතා වැල       පේද

සුදෝ සුදු කිරි ගරුඬ ගල් අතර ගලා            ගිය

හඬ දෙමින් පෙන නැඟු ජලපහර නිමා         විය

සෙල්ලමට මෙන් පෙමට ලැබු පහරවල්      නිය

වේදනා දෙයි ගතට සිසිලසක් නැතේ           දිය 

මල් වරවු නැකත මුලු පව්ලටම  බෝ      සුබලූ

නාව ගෙට ගන්න තුරු උඹ දකින්නට     බැරිලු

ජම්බු ගහකින් වැටී කියයි ගම් රෑන        කොලු

මින් පසුව ගැට පේර කන්න නම් බැරි      වේලූ

- .oOo. -