මාක් සකර්බර්ග් ලංකාවේ - Mark Zuckerberg visits Siri Lanka

මයෙ අම්මප මචෝ මේ දවස්වල මලක්කත් කඩා ගන්න බැරිව හිතේ වේදනාවෙන් ඉන්න නිසා, නාමල් උඩුගමගේ, "වේදනා දෙන්නේ නෑ.... ඔබ හැර මා යන්නේ නෑ...." කියලා වැරදි මාරගයෙන් බුකි ගත උනත්, කෑලි ටිකට වැරදි මාර්ගේ යන්න දන්නේ නැති නිසා උනුත් නැති හිතේ අමාරුවට, සිරිලයියගෙන් මලක් ගෙනත් ගහලා නිදා ගන්න ගියා.

වැඩි වෙලාවෙක් දොයියන්න උනේ නෑ, කෝල් එකක් එනවා පිට රට නම්බරේකින්. කොහොමත් මේ දවස්සල මම ඉන්නේ, අයර්ලන්තේ, සිංගා, නවසීලන්තේ වගේ රටවල නේ. ඕන මල හත්තිලව්වක් කියලා, ආන්සර් කලාම අනෙක් පැත්තේන් අමු හින්ගලෙම අහපි.."හලෝ..... මේ මාතලන්ද හිටන්...?" කියලා. මම කිව්වා "මාතලන් තමයි.... හැබයි හිටන් නම් නෙමෙයි ඇලවෙලා ඉන්නේ..." කියලා හිටන්.

"මාතේ..... මම මේ සිරිසේන.... මොනවද බං ඔහේ පත්තර වල තියෙන්නේ හිටන්...." කියලා අහපු ගමන්, හරකට වගේ මට තේරුම් ගියා, මේ අපේ අතිගරු ජනාධිපති තුමා නේද යකෝ කියලා. "අනේ... මේ සිරිසේන සෑර් නේද හිටන්...." කියලා අහපු ගමන්, එයැයි කිව්වා සෑර් කෑල්ල එපැයිය. "මම ඉතින් සරළ සමීකරණ පොර නේ මාතේ හිටන්...." කියලා.

"මක්කත් නෑ මචං... මේ ෆේස්බුක් තහනම අද නොවේ හේට කියලා ඉතරයි තියෙන්නේ......... මම හිතන්නේ පත්තර කාරයොත් වැඩේට කැමතියි වගේ හිටන්... "කියපු ගමන් උන්නැහේ කියපි,

"මක්කටෙයි මාතේ බොරුවක් මුසාවක් කියන්නේ... මම බොරුවක් කියනවා නම් මහින්ද අමරවීරට හෙන ගහන්න.... ඕවා මේ අරුන්ගේ වැඩ නේ හිටන්..."

"ඒක ඇත්ත..... මම නොදන්නවය.... ඔහේ කවදැයි බොරුවක් කිව්වේ... ඒකත් එකටම මම හිතුවා ඕක මහින්දලගේ වැඩක් වෙන්නෑ කියලා හිටන්..."

"මහින්දගෙ නෙමෙයි මාතේ.... ඔය ඔක්කොම ගේම් දෙන්නේ අර සෙට් එක... ඕවා එයාලගෙ වැඩ."

"එතකොට එක එකාට ඕන වැඩ කරන්න නම්, ඔහේ ඉන්නේ මක්කැටෙයි.... "කියලා අහන්න කට ගන්න කොටම,

උන්නැහේ කියපි, "ඕන් මාතේ ශිරාල් කාරයා හරි, ඔස්ටින් කාරයා හරි පෝන් එක ටැප් කොරනවද කොහෙද.... අනේ මාතේ.... මාත් ෆේස්බුක් එන්නේ ඕකුන්ට හොරෙන් හිටන්....|" කියලා,  උන්නැහේ කට් කලේ නැතැයි කෝල් එක හිටන්.

ඒ පාර, මල් මද හාසේ මස්කට් කෑල්ලකුත් කාලේ ආයේ නිදාගෙන විනාඩි කීපයයි ගියේ, ආයෙත් වැදුනයි කියහන්කෝ පෝන් එක. "ආ දැන් ටැප් කරන්නේ නෑ වගේද  හිටන්.." කියලා අහපු ගමන්, එහා පැත්තේන් කියපි "අයි ඇම් මාක් හියර්..." කියලා. පල පලයන් ඩෝ යන්න මේ නිදාගෙන ඉල්ල වෙලාවෙ පිස්සු කෙලින්න එපා කියලා කිව්වේ සමහර පඩත්තල වේස කොල්ලෝ එක එක කෝල් දෙන හින්දා. ඒ කියලා කෝල් එක කට් කරලා දැම්මා ඉතරයි, ආයේත් වදිනවා බඩ කඩුත්තුව, ඒ පාර හොඳට බැලුවාම වෙන නම්බර් එකක්.

Hello I'm Mark..

මන මාක්ද බං කාල් මාක්ද ඌ මැරිලා ගොඩක් කල් නේ...

නෑ නෑ බං... කාල් මාක්ස් නෙමෙයි.. මම මේ Mark බං..

ආ මේ Mark Anthony ... අඩෝ මචං පිස්සු පීකුදු... පොඩ්ඩක් "When I dream at night..." ගහපන්කෝ...

පිස්සුද බං මම මේ Mark Zukerberg .

අම්මට හැමනෙයි දාලා.. සකර්බර්ග්...

ඔව් බං ෆේස්බුක් අයිති සකර්බර්ග්..

අනේ පලයන් බං යන්න.... මාත් හිතුවේ එහෙම තමයි බුකියට යන කොට.. ඒත් එතනට ගියපු ගමන් ඒක මේ අයිතිකාරයෝ ගොඩාක් ඉන්න තැනක් කියලා තේරුනේ.. අපේ හිංගල උන් අපිට ලියන හැටි කියලා දෙනවා...

පිස්සුද බං මේක මගේ තනි ක්ම්පැනිය..

අනේ පලයන් බං යන්න... පස්සෙ තමයි අපිත් තේරුම් ගත්තේ මේක මේ අපේ ආන්ඩුවේ බිස්නස් එකක් කියලා.. ඕන් දැන් හැමිනවලා තියෙන්නේ.. ඒත් ඉතින් අපි වැරදි මාර්ග ඔස්සේ යනවා නොයා බැරි කමට..

ඒක නෙමෙයි මාතේ.. කව්ද මේ හරීන් කියන්නේ...

ආ එයා නේ මේ ජනවාරි 8 විප්ලවේ නියමුවා..

එයා අයියා කෙනෙක්ද..

එක නම් කියන්න දන්නේ නෑ හොඳ කොල්ලා මක්කා උනත්..

නෑ මේ ඌ කියලා තියෙනවා උන් කියන විදියට කරේ නැහ්නන් බුකිය වහලා දානවය කියලා...

ඔව් ඔව් මිනිහා එහෙමට පොර.. කොහොමත් බුකිය නෙමෙයි පත්තර ටැලිවිසොනුත් වහලා දායි කාපු කෑමට.. ඒ තරම් මලෙන් ඉන්නේ දැන්..

අනේ එහෙම නෙමෙයි උඹ ඌව දන්නවා නම්, ඌට කියලා බැරිද තහනම් අයින් කරන්නෙයි කියලා... නැත්නම් ඉතින් මම ඉවරනේ.. අපිත් මාතේ අහිංසක දරු පවුල් කාරයොනේ.. බුකියට එන්නේ උබලයි රටේ උන් විතරනේ... උඹලා නැහ්නන් මගේ බඩේ බත් නෑ..  ප්‍රිසිලගෙන් කනක් ඇහිලා ඉන්න නෑ.. දරුවට පිටි එකක් අරගෙන දෙන්න වෙන්නත් නැතෙයි.. පානුයි පරිප්පුයි තමයි කන්න වෙන්නේ කියලා... ඒ නිසා මම ලංකාවට ඇවිල්ලා ජනාධිපතිටයි, අගමැතිටයි කතා කරන්න ඉන්නේ පර්සනලි...

මෙහෙමයි මචං උඹ ලංකාවට වරෙන්..ඒත් එයාලා හම්බ වෙන්න කලින් රට පාලනය කරන අනික් අය හම්බ වෙලා ඉන්න වෙනවා ඊට පස්සෙ පුළුවන් අර අය හම්බ වෙන්න...

අප්පා එහෙමත් එකක්ද...?

ඔව්වොව් ආයේ ලේසි වෙන්නේ නෑ...  ඇවිල්ලා ඉස්සෙලම මල් වට්ටියක් අරගෙන දළදා හාන්දුරුවෝ වැඳහන්.. මල් ගැන කලබල වෙන්න එපා... අපි මල් සල්ලි දීලා ගත්තට..., උඹලා වගේ උන් එනකොට නිලංග දෑලා බන්ඩාරයා නොමිලේ මල් වට්ටියක් දීලා දත ළගටම ගිහින් පෙන්නනවා.. ඊට පස්සේ නුවර ෆුඩ් සිටියේ තියෙනවා පලතුරු වට්ටි..., ඒවයින් තුනක් ගනින්..., ඒවත් අරගෙන ඉස්සෙල්ලම පලයන් මල්වත්තට...

ආ මේ පේරාදෙනිය ගාර්ඩ්න්ස්

නෑ යකෝ... පේරාදෙනියේ මල් වත්තට නෙමෙයි.. මල්වතු විහාරයට... ගිහිල්ලා පළතුරු ටික වළඳන්නෙයි කියලා... දන ගහලා වඳින්න ඕන.. පොර ටිකක් ෂේප්... හොඳට හිනාවෙලා කතා බහ කරලා... ඕන නම් පොඩි කින්ඩියක් දායි..

හරි ඊට පස්සෙ තා දෙකක් ඉතුරුයිනේ...

ඊළඟට අස්ගිරියට. පොර ටිකක් තදයි... පොඩි සද්දයක් දායි ගනන් ගන්න එපා.. රෝන්ග් ටෝක්ම තමා දෙන්නේ.. ඒ නිසා බෙන්ස් කොම්පැනියෙන් ගිෆ්ට් වව්චරේකුත් ගන්න වෙනවා.. ඒවා දුන්නාම නිවන් දකින්නත් ලේසියි.. ආර්ය අස්ටාංගික මාර්ගේ යන්න ඕන නෑ.. වහගෙන ඉන්න පාරෙන් කෙලින්ම නිවන් මාර්ගෙට..

හරි .... එයිට පස්සේ

ඊළඟට පලයන් ගැටඹෙට.. පොර ටිකක් යකා වගේ පොර... ඒත් මහින්දත් එක්ක ගියා නම් ඇඹරෙනවා...

කව්ද මහින්ද

මහින්ද රාජපක්ෂ

ඉතින් එයා පැරදිලා ගෙදර ගිය එක්කෙනෙක් නේ..

මගුලක් කතා කරනවා මේ ළඟදි නීතීය හා සාමය ඇමති පත් කලෙත් එයා.. එයා තමයි රට පාලනය කරන්නේ...

ඔය නුවර කිට්ටුව නේද වැද්දො ඉන්නේ මට හරි ආසයි මාතේ වැද්දෝ බලන්න..

ආපෝ වැද්දෝ බලන්න එහේ යන්න ඕන නෑ.. මොකෝ ඊට පස්සේ ඔහේට යන්න වෙලවා කාදිනල් හම්බ වෙන්න... එයාට නම් වඳින්න ඕන නෑ.. අතට අත දීලා පොටෝ එකකට උන්නාම එයා නොමිලේ වොයිස් කට් එකක් දෙනවා..

ආන් ඒ ගමන්ම වැද්දෝ බලන්න පුළුවන්...

ඉතින් ඒකට ආයෙත් මහියංගනේ යන්න එපාය..

උන් මොන වැද්දොද මචං උන් දැන් හෙන දියුණුයි.. අපේ උන් කියන්නේ උන්ගේ නායකයා 2015 ජනවාරි 8 වෙනිදා නායකයා කරා නම් රට මීට වඩා දියුණුයි කියලා.. උඹ වරෙන් මම එක්ක යන්නම් නියම ගල් වැද්දෝ දෙන්නක් පෙන්නන්න..

කොළඹ...

ඔව් බං ඕව්.... එක්කෙනෙක් ඉන්නේ ෂැන්ග්‍රිලා එක ළඟ තියෙන කොලෝනියල් බිල්ඩින් එකක. තාමත් කෙහෙල් කොලේ කන්නේ... 

එතකොට තව එක්කෙනෙක් ඉන්නවා කිව්වා නේද...

ආ ඔව් එයත් ඒ කිට්ටුවම ඉන්නේ.... ටයි කෝට් ඇඳලා උන්නට රැවටෙන්න එපා.... එයත් නොම්මර එකේ ගල් වැද්දා..

එතකොට ප්‍රසිඩන්ට් ඇන්ඩ් ප්‍රයිමිනිස්ටර්

ආ ඒ දෙන්නද.... ඒ දෙන්නා ඉතින් හම්බ උනත් වැඩක් නෑ... ඒත් ඉතින් මේ වෙනකොට ඒ දෙන්නා හම්බ උනයි කියලා හිත හදා ගනින්කො....

එතකොට හරීන්

ආ මට අමතක උනා... අර මහින්ද හම්බ වෙන්න ගියාම එයාට කියපන් උඹේ දුක් ගැනවිල්ල.. එයා ප්‍රසිඩන්ට්ට කියලා මක්කා හරි කරලා දෙයි... හොඳ මනුස්සයා මක්කා කොලත්...