අලි රාළ "අනේ එපෝ" කියයි. - Elephant said "No..!"

මේක බලපු ගමන් හිතයි, මුසම්මිල් මහත්තයා ඇදුන ස්වීප් එකට පයින් ගැහැව්වද්ද කියලා. එහෙම එකක් නොවන නිසා අපේ මව් පාර්ශවයත් මතක් කොරයි. මේවට කියන්නේ මාර්කටින් ට්‍රික්ස්. පුරුදු උනේ, ප්‍රථමයෙන් බ්ලොග් ගුරු වන කශූ ගෙන්. පසුව ඔටාරා නෝනගෙන්. ඒ නිසා තරහ වෙන්නේ නැතුව කියවලම බලන්න. මම හිතන්නේ හිතට අල්ලයි.

අලි බැලිල්ලයි බලි බැලිල්ලයි එපා වෙන්නෙ නැහැල්ලුනේ. අපේ අය විතරක් නෙමෙයි පිටරට අයත් එනවා හෝ ගාලා පින්නවෙල අලි බලන්න. කැලැවේ ඉන්න අලි බලන්නනම් යන්න ඕන මින්නෙරියේ කැළේ, අලි, අලි රංචුවක් ඉන්නව එහේ. අලියා, බත් වගේම අපේ සංස්කෘතියේ එක අංගයක්නේ. පෙරහරේ යන අලි, කොටන් අදින අලි, පනින අලි. අඬන අලි, නාන අලි, නාකී අලි, වල් අලි, වන අලි, හිඟන අලි ( උඩවළවේ වැට ලඟ ඉන්න අලි ) ආදී වශයෙන්, අලි ගොඩක් අලි වැහි වැහැලා.

එතකොට ඔයාලා දැකලා ඇති සර්කස් වල ඉන්න අලි, අඩුගානේ රූපවතිගේ මැජික් පෙට්ටියෙන් වත්. අලි සයිස් ඔක්කොම ඉවරයි. බල්ලා වගේ කියන ඕක්කොම කරණවා. වටේ දුවනවා, විහිළු කරණවා, ඉස්සරහ කකුල් දෙකෙන් ඉන්නවා, ඉඳගන්නවා, හිටගන්නවා, බෝලේ ගෝල් එකට ගහනවා, ඇත්ගොව්වගේ බඩ උඩ කකුල තියනවා. ඇත්ගොව්වව කටේ දාගන්නවා. පිටේ තියාගන්නවා, පැන පැන යනවා කියන ඕන දෙයක් කරනවා. දෙහිවල සත්තු වත්තට ගියාම මේ සෙල්ලම් ගොඩක් බලන්න පුළුවන්. දියවන්නාවේ අලි නම් මීටත් වඩා වැඩ දානවා. අලි මුදලාලී කියන ඕන දෙයක් කරනවා.

මාතලන්ගේ "බෑන්ක් මැනේජර්" පෝස්ට් එක බලපු ඇත් ගොව්වෙක් කල්පනා කලාලු, ඉක්මනටම ධනවත් වෙන්න අලියත් එක්ක පොඩි සෙල්ලමක් කලොත් හොඳයි කියල. අලියා කකුල් තුනෙන් ඉන්නවා, දෙකෙන් ඉන්නවා, එකෙනුත් තත්පරයක් දෙකක් ඉන්නවා හැබයි කකුල් හතරම උඩ තියාගෙන ඉන්න බෑනේ කීයටවත්... අයිතිකාරයගෙනුත් අවසර අරගෙන දැම්මලු පත්තරේ ඇඩ් එකක්. අරවලින් මේවලින් උස්සන්නේ නැතුව අලියාගේ කකුල් හතරම එකවර පොලොවෙන් උඩට ගන්න ඕන කෙනෙකුට ලස්සයක්ම දෙනවයි කියලා. 

ආරන්චිය ගියාලූ පිටරටවලටත් ඔන්න ඉතින් පිටරටවල ඉන්න සර්කස් කාරයෝ, මැජික් කාරයෝ, ඉන්ද්‍රජාලිකයෝ, මන්තරකාරයෝ එනවලු වැහි වැහැලා එකෙක්ටවත් බැහැලු. ඔක්කෝම පරාදලු. දැන් බෙට් එක තවත් උස්සලලු මිලියනයක්ම කරලලු. ඔන්න අපේ කස්ටියත් එනවලු. ගාල්තැන්නේ ගුරා, ගාල්ලේ රත්තරන්, නාවල සාමී, සෝභිත මහතා, මාතර කට්ටඩි. සෝමා ගුරු මෑනියෝ, සුදර්මා ගුරු මෑනියෝ, ජයශක්ති ගුරුසාමී, පොඩිරත්න වල්ලි, ජිනදාස විල්ලියා, ශාකිලි බිස්වාන්, නීචකුල වශී ගුරුකම් කරන අය, මළයාලී කට්ටඩියෝ විතරක් නෙමෙයි පිටිදූවේ සිරිධම්මත් ආවලු ෂොරි වැඩියලු ඒත් හ්ම්ම් එකෙක්ටවත් බැහැලු.

ආවලු අපේ බෑන්ක් කස්ටමර්, වැඩි කරගත්තලු බෙට් එක මිලීයන දහයකට. ඇග්‍රීඩ්ලූ. දැන් කස්ටිය වට වෙලාලූ සූ ගාලලු.  පොර හෙමිහිට අලියගේ වටේ යනවලු. වට දෙක තුනක් ගියාලූ. වලිගේ ගාව නැවතුනාලූ. හොඳට දකුණු අත කරකවලා කරකවලා දුන්නලු අලියගේ ඇටේට, අලිය උඩලු, පොර දිණුම්ලූ. සල්ලිත් අරන් පොර ගියාලූ.

දිනපූ ඒවයින් සෑහෙන ගානක් ගිය නිසා අලියගේ කස්ටියට අප්ෂෙට්ලූ. ඇත් ගොව්වත් එක්ක කතා වෙලා අලියට කොරන්න බැරි දෙයක් හොයාගෙන බෙට් එකක් අල්ලමු කිව්වලු. ඇත් ගොව්වට ආවලු අයිඩියා එක අලියා සිරස් අතට ඔලුව උඩ පහළ කලාට තිරස් අතට ඇඟ හොල්ලන්නේ නැතුව ඔලුව වැනිලි බොරුලු. දැම්මලු පත්තරේ ඇඩ් එක. අර සෙට් එකම ආයෙත් ආවලු. ඔක්කොම චොරලු. නෝන්ඩිලු. ආවලු අපේ බෑන්ක් කස්ටමර්. වැඩි කලාලු බෙට් එක. ඇග්‍රීඩ්ලූ.

ආවලු දවස සෙනග සූ ගාලලු. කැමරාකාරයෝ, පත්තරකාරයෝ, ටී වී කාරයෝ, රේඩියෝ කාරයෝ විතරක් නෙමෙයි බ්ලොග්කාරයොත් වැහි වැහැලලු. පොර දැක්කා විතරයිලූ අලියා උඩ ගියාලූ, මයිල් කෙලින් උනාලූ. දැන් අලියා වෙව්ලනවලු. පොර එදා වගේම හෙමිහිට වටේට යනවලු. වට තුනක් හතරක් ගියාලූ, ඔලුව ගාව නැවතුනාලූ, කන ඉස්සුවාලූ, අර එදා කරපු දේ අදත් කරන්නද කියල ඇහුවලු, අලියා දෙපැත්තට ඔලුව වැනුවලු, "අනේ එපෝ" කිව්වලු, කුංච නාදයක් දීපූ අලියා පැත්ත පලාතෙවත් නොයිද පැනලා දිව්වලු.

සටහන - පරිවර්ථනයක්, අපිට ඕන විදියට ලිව්වා.....