ප්‍රසිද්ධ ගායිකා ඇඩේල් (Adele) පුනරුත්පත්තියක්ද....? - Reborn Adele

Adele

(කලින් පෝස්ට් එකේ කවියට උත්තරේ ඒකේ පහලම කොමෙන්ට් එකක් විදියට දාලා ඇති.)

මාතලන් සංගීතයට බොහොම ආදරෙයි. කාළයක් මම "සංගීතා" නමින්, බ්ලොග් එකකුත් කරගෙන ගියා. දැන් නම් ඒක අප්ඩේට් වෙන්නේ නෑ. මේකෙන් පස්සේ එ ගැන හිතලා බලන්න ඕන. මගේ රස වින්දනයට, බේදයක් නෑ. කලින් ළිපි කියවපු අය ඒ ගැන දන්නවත් ඇති. සංගීතය රස විඳින්න, භාෂාව ප්‍රශ්ණයක් කර ගන්නත් අවශ්‍ය නෑ. ඒ නිසා මම කොයි රටට ගියත්, ඒ රටේ ගීත වලට ආදරය කරන්න පටන් ගන්නවා. ගීත වලට විතරක් නෙමෙයි, ආහාර වලටත්. තව දෙයක් තමයි, එදා තිබුන ඒවා අද නෑ කියන එක. ඒක නම් පුහු මතයක්. එහෙම කියන අය මම නම් දකින්නේ, අළුත් වෙන්න අකමැති මිනිසුන් හැටියට. කවදත් සමාජයේ හොඳ දේ වගේම, නරක දේත් තියෙනවා. එදා පලු යන්න බැනුම් අහපු ජෝති අද හැමෝටම හොඳ වෙලා. මොකද ඒ කාළේ ගැන කතා කරන්න ඉන්නේ ජෝති විතරයි. ජෝති මරන් කන්න හදපු උන් උඩ ගියේ, ජෝතීට ආදරේ කරපු උන්, කනත්තේ තාප්පෙත් පෙරලපු දවසේ. ඔන්න ඕකයි ඔය ප්‍රබුද්ධ කියන අයගේ නම් තත්වේ.


ඉංග්‍රීසි සිංදු වලටත් මම බොහෝම ආදරෙයි. එදත් අදත්. ඔය කිව්වට අදත් සාර්ථක නිර්මාණ බිහිවෙනවා. අදත් මගේ ප්‍රියකරන ගායක ගායිකාවන් බොහෝයි. ඒ තරින් කෙනෙක් තමයි ඇඩේල් (Adele). එයාට් වෙනම අනන්‍යතාවයක් තියෙනවා. 1988 දී උපන් ඇඩේල් ගේ සම්පූර්ණ නම ඇඩේල් ලෝරී බ්ලූ ඇඩ්කින්ස් (Adele Laurie Blue Adkins). ඒ නම දාලා තියෙන්නේ ලොරියක් වගේ නිසාද දන්නේ නෑ. එයා සෙක්සි උනාට, ටිකක් මහත කෙනෙක්. ඇඩේල් ලංකාවෙත් බොහොම ජනප්‍රියයි. සිංහල සිංදු විතරක් අහන අයට මම කියන්නේ, ඉංග්‍රීසී ගීතත් අහන්න පුරුදු වෙන්න. මම ඉංග්‍රීසී භාෂාව ගොඩක් ඉගෙන ගත්තේ සින්දු නිසා. මොකෝ ඒ කාළේ ඉංග්‍රීසී සින්දු කියන අයගේ පින්තූර අලවලා, "අයිලන්ඩ්" (Island) එකේ හැම අඟහරුවාදාම ගියපු ලිරික්ස් කොල අලවපු, පොත් දෙක තුනක්ම මගේ ගාව තිබුනා. අනික පවුලේ නාලිකාව. (රාජපක්ෂ) නයි. ටී. එන්. එක විතරයි, ඒ කාළේ තිබුනේ. එතකොට ඒක ෂාන් මහත්තයගේ. "පොප්ස් ඉන් ජර්මනි" වගේම .ප්‍රචාරය උන දේශීය සංගීත වැඩ සටහන් වලත්, වැඩිපුර කාළය වෙන් උනේ බටහිර ගීතයට.

 දැන් එමුකෝ මාතෘකාවට. මේ ඇඩේල් වගේම මගේ ක්‍රෂ් එකක් උන්නා. ඒ, කොල්ලා ඉස්කෝලේ යන කාළේ.. ඇලිසන් මෝයේ (Alison Moyet)  කියලා. මෙයත්, මැඩෝනලා වගේම, යට ලීයෙන් වඩින එක්කේනෙක්. (මාතලන් මේ වගේ ෆිගර් වලටත් කැමතියි. :D ) බොහෝම ලස්සන ගීත එකතුවක් මෙයාගෙත් තියෙනවා. පහළ තියෙන්නේ, ඒ දෙන්නගෙම සින්දු... අහලා රස විඳින්න. තව දෙයක්, සංගීත වීඩීයෝවලට වඩා, මම ගොඩක් ආසයි සංගීත කණ්ඩායමක් එක්ක සජීවීව කරපු ගායනා නරඹන්න. මොකෝ, අපේ රසිකයෝ වගේ කන පැලෙන්න නටන්නේ නෑ (අපේ උන් නටන එකටයි, ජාතික ගීයටයි, ඔක්කෝටම නටනවනේ.) (ඉස්සර අපෙ ගෙවල් ගාව පොරක් හිටියා, ඌ සංගීතේ පටන් ගන්න, පාන පත්තු කොරන බෙරේ ගහපු වෙලේ ඉඳන්, ජාතික ගීය යනකම් නටනවා. ඇහුවම කවුද ආවේ කියලා ඌ දන්නේ නෑ එකෙක්වත්.) උන් ගීතයේ රසය නියමටම විඳිනවා. ඒකත් බලන්න ලස්සන දෙයක්.

හද පතුලටම කැරළි ගැසීම - (Rolling in the deep)
මේ ගීතය ලියලා තියෙන්නේ ඇඩේල් එක්ක පෝල් එප්වර්ත් කියලා කෙනෙක් එයාගේ 21 කියන ඇල්බම් එකට. මේක පුදුම විදියට ජනප්‍රිය උන ගීතයක්. ඔය ලව් කරන්න ගිහින් අවමානයට ඒ කියන්නේ නෝන්ඩියට පත් උන කෙනෙක් ගැන තමයි ගීතයෙන් කියවෙන්නේ. මෙකේ වීඩියෝ එක ඔයාලා දැකලා ඇති ඒත් මේ සජීවී ප්‍රසංගයක ගායනයක්. බලන්න කොතරම් ප්‍රභෝදමත්ද කියලා.




ඔබ වන් තව කෙනෙක් - (Someone like you)
මේකත් ඇඩේල්, ඩෑන් විල්සන් කියන කෙනත් එක්ක 21 ඇල්බම් එකට ලියපු ගීතයක්. මේකත් බූට් සින්දුවක්. මේ ගීතයේ තියෙනවා එයාගේ ගායන හැකියාවේ උපරිමය. පහල තියෙන්නේ ඔරිජිනල් විඩීයෝව නෙමෙයි, පියානෝ එකයි, බේස් ගිටාර් එකත් එක්ක විතරක්, සජීවී ගායනයක්. බලන්න වෙනස. මේ ඇල්බම් එකේම තියෙන තවත් ලස්සනම ගීතයක් තමයි "වැස්සට ගිනි තැබීම" - "Set fire to the rain". ඒකත් හොයාගෙන බලන්න.

Alison Moyet

 ඇලිසන් මොයේ, 1961 දී ඉපදිලා තියෙන්නෙත් ඇඩේල් වගේම, එංගලන්තයෙදී. පහල තියෙන්නේ එයාගේ ගීත දෙකක්. එකක් "ලස්සන හමුවේ දුර්වල වීම" - (Weak in the presence of beauty) හා "මෙයද ආදරය" - (Is this love) ගීත දෙක. ඒ දෙකත් රස විඳින්න. (මේ වීඩීයෝ දෙකම ක්ලික් කරන කොට අවුලක් ආවෝත්. එයාල සිංහලෙන් පැහැදිලි විදියට කියනවා යූ ටියුබ් එකේ ගිහින් බලන්න කියලා. ඒක ක්ලික් කලාම හරි)

දැන් පුනරුත්පත්ති කතාවා මොකක්ද...? ඇලිසන් මොයේ මැරිලා නෑ තවම. ඒත් ඇඩේල් දකපු මුල්ම දවසේ මගේ මතකයට ආවේ ඇලිසන්. මේ දෙන්නම සෑහෙන දුරට එක වගේ නේද...?. දෙන්නම එංගලන්තේ. දෙන්නම ජනප්‍රිය ගායිකාවෝ. ඇඟ.... දෙන්නගෙම එක වගේයි..මුහුණ... ඇයි එතකොට කටහඬ.... හ්ම්....