අතපසු වී අත් කැපීම - Medical Malpractice

අපේ රටේ පෞද්ගලික ඉස්පිරිතාල සෙල්ලම ගැන මෙන්ම, පෞද්ගලික වෛද්‍ය විද්‍යාල හුටපටේ ගැන මා කලින් ලිව්වේය. අද එය යට ගොස් ඇති කාරණයක් වන අතර මාලබේ කරන්නේ පට්ට පල් බොරුවක් බව අද ඔප්පුවී හමාරය. කොහොමත් අපේ වෛද්‍යවරුන්ගේ උපාධිය, පිට රටවල පිලිගන්නේ නැත. ඔවුන් එම රටවලදි නැවතත් විභාගවලට පෙනි සිටිය යුතුය. පච කෙලියාට ඇත්ත එයයි. අනෙක් කාරණය නම්, අපේ වෛද්‍යවරුන් පුහුණුකිරීම අන් සෑම දෙයක් මෙන්ම යාවත්කාලීන නොවී ඇති බවයි. එය එංගලන්ත වාර්ථාවකින් පෙන්වා දෙන අතරම. අපේ රටේ මනෝ වෛද්‍යවරුන්ද පවසනුයේ, වෙද කම දැන උන්නත්, හෙද කම ගැන මෙළෝ සංසාර දෙයක් නොදන්නා බවයි.

කලින් ළිපියේ සඳහන් කල පරිදිම, ආන්ඩුවේ ඉස්පිරිතාලවල රෝගීන්ට සලකන ආකාරය එක දිනක් හෝ රජයේ රෝහලකට ගොඩ වූ අය පැහැදිලිවම දන්නවාය. වෛද්‍යවරුන්ටත් වඩා ගෙම්බර් දාන්නේ හාල්පාරූ ඇටෙන්ඩන්ලාය. ඔවුන් ඉන්නේ රෝගීන් බලාගැනීමට හා රෝහලේ කටයුතුවලට උදව් වීමට වූවද, අද රෝගීන්ගේ රෝද පුටු හා ඇඳන් තල්ලු කරගෙන යාමට සිඳුවී තිබෙන්නේද රෝගීන්ටමය. එසේ නැතිනම් නෑ හිතවතුන්ටය. ඔපරේෂන් හා බෙහෙත් දීමත් ජනතාවම කරනාවානම් එයාලා සතුටුය. මේ ගොඩට නයිටිංගේල්ලාද අයත්ය.

මේ දුක් විදින්න බැරි නිසා පෞද්ගලික එකකට ගියද අද ඒවාවල තත්වයත් එසේමය. ඒවාවල ඉන්නේ මෙලෝ පුහුණුවක් නැති නර්ස් නෝනලාය. කොටට අන්දවා වැඩේ ෂේප් කර ගන්නවාය. මුළු වාට්ටුවටම කොලිෆයිඩ් නර්ස්ලා ඉන්නේ එකෙක්ය. අම්බ ගනන් චාජ් කරලා, හාට් ඇටෑක් හැදෙන බිලකුත් දී, කෙලවෙන්න යන කොට, ඇම්බියුලන්ස් එකේ දමා එවන්නේ මහ ඉස්පිරිතාලේටය. බබා හම්බ වෙලා කෙලවෙන්න ගියොත්, කාසල් එකට පටවනවාය. කිසි අවුලක් නැත. මොකෝ ප්‍රයිවට් බෙහෙත් දුන්නාට, වාට්ටුවක්, ආන්ඩුවේ එකෙත් තියෙනවාය.

හොර දොස්තරලා මෙන්ම, හොර ඉස්පැසලිස්ලාත් ඉන්නවාදෝ කියා මාතලන්ට සැක සිතෙන්නේය. ඒ මොකෝ පඳුරකට ගැහුවත් ගායක ගායිකාවෝ, ඇමතිවරු මෙන්ම ඉස්පැසලිස්ලාත් 10 - 15 විසිවෙනවාමය. මේවා චෙක් කරන්නත් එකෙක් වත් නැත්තෙය. ඇමතියා හාල්පාරුවෙක්ය. අද පත්තරේක තිබුනේ ප්‍රාදේශිය සභිකයෙකුත් එයාව රවට්ටලා කියාය. එහෙම ඇමති කෙනෙක් මාෆියා එකකට බය වෙන එක අහන්න දෙයක් නැතිය. මෙය නම් අගය කල යුත්තේමය. අගවිනිසුරුතුමියට කෙලින්න කස්ටිය අධිකරණයෙන්ම හොයා ගන්න පුළුවන් උනත්, බලු දොස්තර කෙනෙකුටවත් ලෙඩේ අදින්න ජනාධිපතිටවත් බැරි වෙන්න මාෆියා එක බලවත්ය.

ඔය පරීක්ෂන වල මොන කමිටු දැම්මත්, වාර්ථාව දිය යුත්තේ වෛද්‍යවරයෙක්මය. ඒ නිසා අතට කෙලපු දොස්තර මහත්තයා නිදහස් වෙනවාමය. වැරදි කරුවා අත් අයිති එකාය. ඒ ගැන නෝ කතාය. එයා කියලා තිබුනේ මේක කෙල්ලගේ "වෙලාව" කියලාය. දෙයියාගේ "වෙලාව" ටිකක් හොඳ නැති උනේ ලෙඩා විස්ස විජ්ජාලේ කෙනෙක් නිසාය. එ නිසා ලෙඩේය. එතන ඉන්නේ කොහොමත් ලෙඩ ගොඩවල්ය. එහෙම කියන්නේ මම නෙමේය. ඇස් බී මාමාය. කොහොම හරි කොල්ලෝ ගේම ඇද්ද නිසා දෙයියන්ගේ හොම්බ බිම ඇනුනේය.

මේ කෙල්ල විස්ස විජ්ජාල කෙල්ලෙක් නොවුනා නම් දෙවිවරුන්ගේම පිහිටය. මොකෝ මේ පවුල ඉතා අමාරුවෙන් ජීවත් වන පවුලක්ය. පියා ගොවියෙක්ය, මව විදේශ ගෘහ සේවිකාවක්ය, අයියා ත්‍රී රෝද රථ රියදුරෙක්ය. කෙල්ල වෙලාවට නීතීය හදාරන එකෙක් වූවාය. නැතිනම් ඉතින් අබ සරණය. මෙහෙම ඒවා අනන්තවත් වෙනවාය. එහෙත් මිනිසුන් බයට අධිකරණයට යන්නේ නැත. මොකෝ එතනට ගියොත් ජීවත් වෙලා ඉන්න උනුත් මැරෙණවාය. දැන් ජනාධිපති තුමාත් කේස් එක දන්නවාය. ඇමතියාටත්, ඒකටවත් ඉදිරිපත් වෙලා සමාව ගෙන, අතක් දෙන්නට කොන්දක් නැත. එයාගේ කොන්ද නිර්වින්දනය කරලා තියෙන නිසාය.

මෙහෙම අත් වැරදීම් වෙනවානම්. අගතියට පත්වන පාර්ෂවයට වන්දියක් ගෙවීම සඳහා වෛද්‍යවරුන්ගේ පඩියෙන් කපාගන්නා රක්ෂණ ක්‍රමයක් ආරම්භ කලා නම්, ඔවුන් මීට වඩා වගකීමකින් හා කැපවීමකින් මෙන්ම සැලකීමෙන් කටයුතු කරනු ඇත. ඒවාට ඒ අය විරුද්ධ නම්, ජනතාව වෙනුවෙන් රජය හෝ රක්ෂණ ක්‍රමයක් ආරම්භ කල යුතුය. හොඳ වෙලාවක් බලා, ප්ලාස්ටර් දාන්න දොස්තරලා ඕන නැතිය. ඒකට පත්තු බඳින වෙද මහත්තුරු ඉන්නවාය. ඇත්තටම එහෙම ගියානම් මේ කෙල්ලගේ අතත් බේරෙනවාය. "වෙලාව" බලා වැඩකරන දොස්තරලා ඉන්න රටක, බෙහෙත් ගන්න ඉස්සෙල්ලා, වෙලපත්කඩේ බලාගෙනම ඉස්පැසලිස් කෙනෙක් චැනල් කර ගන්න එක හොඳය. මොකෝ "වෙලාව" වැරදුනොත් අත විතරක් නොව බෙල්ල උනත් කපලා දාන්න පුළුවන් නිසාය.

මේ කන්ඩායමට අයත් සිසුන්ට හා මේ දරුවාට කල හැකි හොඳම කාර්යය නම්, අනාගතයේ "වෙලාව" නරක් වන රෝගීන් වෙනුවෙන් පෙනී සිටීමට, "නීතී උපදේෂක සංගමයක්" පිහිටුවා ගැනීමයි. ඇය මූලිකත්වය ගන්නේ නම් ඕනෑ තරම් විදේශ ආයතන ඇයට උපකාර කරනවා නොඅනුමානය. මන්ද මේ සිද්ධියෙන් පසුවවත් ගුණාත්මක බව වැඩිවීම කෙසේ වෙතත්, අන් ක්ෂේත්‍රයන් මෙන්ම වෛද්‍ය ක්ෂේත්‍රයත් දිනෙන් දිනම අගාධයටම ගමන් කරනා නිසාය.