පු.ක. ටුවර්ස් ඇන්ඩ් ට්‍රැවල්ස් (18+) - PUKA Tours & Travels (18+)

මුලින්ම කියන්න ඕන මේකේ පිදුම හෙන්රි බ්ලොග්වෝකර්ට.. උන්නැහේ මේ කතාව දන්නෙ නෑ කියලා තිබුන නිසයි. මේ වගේ කතා නොදන්න අළුත් පරපුරටයි තමයි මේ ලියන්නේ.

77 ජේ ආර් පප්පා ආපු වෙලාවේ, පප්පා උඩ බලාගෙන ඉන්න පෝස්ටර් එකක් හැම සී ටී බී (ලංගම) බස් එකේම අලවලා තිබුනා. එ කාළේ තිබුනේ ලංගම බස් විතරමයි. ආර්ථිකේ ප්‍රයිවටයිස් කොරාපු පප්පා, ගමනාගමනෙත් ප්‍රයිවටයිස් කොරලා දැම්මා. මුලින්ම කොළඹ ආවේ හිච්චික්කිතර බට්ටෝ වෑන්, ඒවල ඇතුලේ හිටගෙන ගිය උන් කොන්ද නමාගෙන මාර ආතල් එකක් අරගෙන ගියේ. පිටිපස්සෙ, පැත්තෙ දොර, බස් වලට වඩා ළොකු නිසා 7-8 දෙනෙක් දොරේ එල්ලිලා, ආතල් එකේ හුලං වැදි වැදි ගියේ. ඒක හරියට කතරගම ඉඳලා සෙල්ලට ගියපු ලොරි භාගේ ගියා වගෙයි. ඒත් ඒ ගමන වගේ සැප පහසුකම් තිබුනේ නෑ. එහෙම ගියත් ඒ කාළේ මේ වගේ අනතුරු නම් වාර්ථා උනේ නෑ.

ඊට ටික කාළෙකට පස්සෙ තමයි අද ඔය "ඒ.සී." දාගෙන දුවන, "ජර්නී"යි, "රෝසා"යි කියන බස් ආවේ. මේවල "ඒ.සී." තිබුනේ නෑ. අර බට්ටෝ පිට පලාත්වලට ගියා. ඕවා අස්සේ, පාන් ගෙඩියක් වගේ, ජනසතු කරපු කාළේ දුවපු බස් වගේකුත් "සුරංජිත් ටුවර්ස්" කියලා නම ගහගෙන, 193 කඩවත - පුරහල දුවන්න ගත්තා. සමහර අය බැංකු පොලි අරගෙන, මේ බස් එකක් පාරට දැම්මේ ඉන්කම් එක හොඳ නිසා. ඉතින් ගම්වල අය මේ බස් එකක අයිති කාරයෙක් වෙන එක ලොකු ආඩම්බරයක් ලෙසයි සැලකුවේ. ලිංසිං වෙළඳ පොලෙත් පෙරලියක් කලා මේ බස් සෙල්ලම. මිදුලේ මේ වාහනේ නවත්තලා තියන එක, හරියට ඇතෙක් වලව්වේ ඉන්නවා වගේ ආඩම්බරයට කාරනයක්.

සමහර ගෙවල්වල ජර්නී දෙක තුනක් තියෙන තැනුත් තිබුනා. දෙක තුනක් තිබුනත්, එකක් තිබුනත්, "ඊබට් සිල්වා ටුවර්ස් ඇන්ඩ් ට්‍රැවල්ස්" වගේ, හැම බස් එකකම වගේ, "ටුවර්ස් ඇන්ඩ් ට්‍රැවල්ස්" කියලත් පොඩියට හරි ගහගත්තේ, තත්තෙ පෙන්නන්න. ඔය ටුවර්ස් ඇන්ඩ් ට්‍රැවල්ස් කියලා ගහගෙන ගියාට, බස් කාරයෝ නම් හැම බස් එකටම වෙනම නමක් දාලා තිබුනා. මට මතක සමහර ඒවා තමයි, පාට පෙට්ටිය, තිලකේ, චූටී මල්ලි, සිරියලතා වගේ නම්. මේවා ඔක්කෝම කඩවත කොළඹ දුවපු බස්. එක කාලෙක ඉස්කෝල කෙල්ලෙක්ගේ ෆොටෝ එකක් බස් එකේ පිටිපස්සෙ වීදුරුවේ ගහගෙන ගියා, හරි වාසනාවන්තයි කියලා. අද නම් සමහර බස් වල අයිතිකාරයගේ දරුවෝ හිටන් ගහගෙන යනවා.

ඕන් ඉතින් ඔය කාළේ තමයි අපේ මේ කතාවට සම්බන්ධ මුදලාලි ජර්නියක් ගේන්නේ, වැඩියෙන්ම ගෙනාවේ පුතාගේ කරදරේට, පුතා "පුණ්‍යවර්ධන", හරි ආසයි වාහන එලවන්න. මුදලාලි සල්ලි කාරයා නිසා ජර්නියක් ගන්න ඒ තරම් අමාරු උනේ නෑ. බැංකුවේ මැනේජර් මහත්තයා ලීසිං එකක් දෙන්න ගියත්, අනේ මහත්තයෝ මම එකෙකුටවත් සතයක්වත් ණය නෑනේ, කියලා කිරි ටොයියා වගේ ජර්නියක් ගෙනාවා. දැන් ඉතින් ගෙනාවා වගේ නෙමෙයිනේ මේකට නමකුත් දාන්න එපාය. ඉතින් ඒකට නම් දාන එක හිතු මනාපෙට කොරන්න බෑනේ.

ඒ නිසා මුදලාලි ගියා නැකත් ගුරුන්නාන්සේ හම්බ වෙන්න. උන්නැහේ කිව්වේ මුදලාලිගෙ නම දාමු කියලා. මුදලාලිගෙ නම "අවුනිස්", ඒක හරියන්නෙ නෑ, නිකං අමු මිරිස් වගේ, එහෙමනම් නෝනගෙ නම දාමු කිව්වම, ඒක "බේබීනෝනා". ඒක හරියන්නෙත් නෑ. නැකත් ගුරුන්නාන්සේ, වී ජ මූ, අහුබුදුලත් එක්ක එකට සෙට් වෙච්චි, හෙළ හවුලේ පොරක්. පොර තමයි දරුවන්ගේ නම් එහෙම දැම්මේ... අපේ මුදලාලි, පුතාගෙයි දුවගෙයි නම් දෙකම දාලා කරොත් නරකද...? කිව්වාම ගුරුන්නාන්සෙ කිව්වේ, ඒක බොහෝම හොඳ අදහසක් බවයි. ඉතින් පුතාගේ නම "පුණ්‍යවර්ධනයි", දුවගේ නම "කරුණාවතියි" දාලා. "පු. ක. ටුවර්ස් ඇන්ඩ් ට්‍රැවල්ස්" මුදලාලිට දුන්නා.

බොරු නම්... මෙන්න බස් එක...

ඔය අතරේ තමයි "කරුණාවති" දුව බලන්න, මනමාලයෙක් එන්නේ. ඉතින්, ආපු ගියපු විස්තර කතා කරලා,
සංග්‍රහ එහෙම බුක්ති විඳලා, මනමාලිත් බුලත් අල්ලලා,ඇඹරි ඇඹරි ගිහින්, පැත්තකට වෙලා ඉඳගත්තා. දැන් ඉතින් කපු මහත්තයා දෙපැත්තේ පුරසාරම් එහෙම කතා කොරලා, මනමාල මහත්තයගේ තාත්තයි, අපේ මුදලාලියි කතා කොරන වෙලාව....

මුදලාලි මහත්තයලට මෙච්චරද ඉන්නේ.. ?

අපෝ නෑ.. තව පුතෙකුත් ඉන්නවා.... කෝ අපේ ළමයෝ පුතා...?

ආ... අද නිවාඩු දවස නිසා, පුතා, "පුක" හෝදගෙන එන්න ගියා.... දැං ළඟ ළඟම එනවා ඇති මයෙ හිතේ..."පුක" දීලා දාන්නත් හිතාගෙන ඉන්න එකේ, හොඳට තියෙන්න එපාය.... නේ අපේ මුදලාලි මහත්තයෝ....

ඕන් දැන් මනමාලයගේ පැත්තෙ උදවිය පොඩ්ඩක් අප්ෂට් ගියා..

මේ වතුපිටිවලින් සෑහෙන ආදයමක් හෙම එනවා ඇති මයෙ හිතේ..?

අපොයි ඔව්.. ඒත් ඉතින් මේ නවීන යුගේනේ මහත්තයෝ... "පුකෙනුත්" සෑහෙන හම්බවෙනවා..

ඒ කිව්වේ මුදලාලි මහත්තයෝ...?

මහතයලට ඇත්තම කියන්න... අපේ ප්‍රධානම ආදායම තමයි.... "පුක"....

අපේ මුදලාලි බොහෝම ආඩම්බරෙන් කිව්වා. කරුණාවතීටත් හරි ආඩම්බරයි...

මහත්තයට කියන්න කීප දෙනෙක් මගෙන "පුක" දෙනවද...? කියලත් ඇහුවා, ඒත් ඉතින් එහෙම දීලා කොහොමෙයි නේ.....?

මනමාලයගෙ කස්ටිය පොඩ්ඩත් බයත් උනා.. මනමාලයගෙ මූනත් නිකං කළු පාට උනා.... මනමාල මහත්තයා බය උනේ, මුදලාලි ගැන නෙමෙයි, මනමාලි ගැන. මේ මොන කුණුහබ්බයක්ද කියවන්නේ කියලා හිතුනත්.., ඕන මගුලකදි ඉතාම වැදගත්ම මාතෘකාව වන, දෑවද්ද ගැනත් මනමාල පාර්ශවේ ප්‍රශ්ණය යොමුකලා..

දැන් මුදලාලි මහත්තයෝ දැවද්ද එහෙම කොහෙමෙයි..?

අපොයි මහත්තයෝ.... අපේ ඔය ලෝභ කම් නෑ නේව..., මේ හම්බ කරපුවලින් භාගයක්මයි, තේ විස්සයි, කුඹුරු 20 යි, පහල කුරුන්දෙත් මයෙ හිතේ.... 10-12 ක් වෙන්න ඇති. ඒ ඇරෙන්න රත්තරන් බඩුයි, ඔක්කෝම බඩු මුට්ටුයි එක්කම, මහත්තයලා එනකොට දැකපු අර මහ විශාලෙට හදලා තියෙන අළුත් ගේත් දෙනවා.... ඒ ඇරෙන්න පුතා කිව්වා නංගිගේ මහත්තයට, "පුකත්" දෙනවා කියලා....

මේ මොන වනචර පවුලක්ද කියලා හිතපු මනමාල පාර්ශවේ, කපුවගෙ කනට කරලා හයි හ‍යියෙන් කුටු කුටු ගාලා යන්න නැගිට්ටා..

මොකෝ මහත්තයෝ යන්නෙයි නැගිට්ටේ..?

යන්න තමයි යකෝ නැගිට්ටේ..., අපි මෙතන "පුකක්" ගැන කතා කොරන්න ආවේ නෑ. වැදගත් මිනිස්සු කියලා හිතලා, මගුලක් කතා කරන්නයි ආවේ.. මේ "පුක" දෙන කතා කියවන්නේ...

ඉතින් මහත්තයෝ මම හිතුවේ.... "පුක" දෙන්නම් කිව්වම, ඔහේලා තවත් සතුටු වෙයි කියලා... එහෙනම් පුතාට කියන්නම්, "පුක" දෙන්න ඕන නෑ කියලා.. වෙන උන් ඉල්ලලත් නොදුන්න එකේ... අපිම තියාගන්නම්.... ඕකට ඉතින් ඔච්චර කෙන්ති ගන්න ඕනය...?

තොගෙ "පුකත්" එපා මඟුලුත් එපා....

කියලා යන්න ලෑස්ති වෙච්චි කස්ටියට පුණ්‍යවර්ධනලයි තාත්තා, මනුස්සකම නිසා මෙහෙම කිව්වා....

පොඩ්ඩක් ඉන්න මහත්තයෝ.... දැන් පුතා ආපු ගමන්, ඔහෙලා ඔක්කෝම "පුකෙන්" ඉන්දලා, පුකේම අරින්නං....

අම්බානක බය වෙච්චි කපුවයි, මනමාලයයි, මනමාලයගෙ සෙට් එකයි සරොං කරේ තියාගෙන දිව්වලු බය වෙච්ච බය විල්ලට...

ඊට පස්සෙ මොනවා උනාද කියන්න මම නම් දන්නෙ නෑ ආයිබෝවංඩ...

"පුක" යනු කුණුහබ්බයක් නොවේ.. (බ්ලොග් සක්විති - කකා)


ප: ලි:
ඕන් ලොක්කා, 60 ට අඩුවෙන් කස්ටියට, මුළු ගානම කපලා. 180 ට අඩු උන්ට සහනයක් දීලා, පොඩි බෝලයක් බස්සලා, කෂ්ටිය පුක ටුවර්ස් & ට්‍රැවල්ස් බස් ඉකේ ඉන්දවලා තියෙන්නේ. මේකත් ගොවි ණය කපා හැරීම වගේද කියලා බලා ගන්න වෙන්නේ බිල ආවා තමයි.