බුදුන් පුදනට මල් විකුණා අත් අඩංගුවේ - Story of Kalutara Mala

උපුටාගැන්ම ඩේලි මිරර් වෙබ් අඩවිය

ප්‍රස්තුතය - කළුතර පාළමේ, පෝ දින මල් විකුණු 9 ක් අත් අඩංගුවේ. 7 දෙනෙක්ම කාන්තාවන්.

රන් මාල කඩපු උන්,

මල් මාල දා පුදන,

සැලුට් දා කොඳු නමන,

බැනර් දා පිළිගන්න,

පොලෝසියෙ මහත්තුරු....

කළු ගඟේ ගං තොටේ,

බෝ රඳුන් අබියසදි,

බක් මහේ පුර සඳේ,

මහා මෙහෙයුමක් කොට,

කළු ගඟේ පාලමේ,

මල් විකුණු හිඟන්නෝ,

අත් අඩංගුවේ දා,

යදී බෝ සමිදුගෙන්,

උරේ පළඳිනා තරු....

සිනාසී තරවෙමුද...?

අඬ අඬා වැලපෙමුද...?

නොමැතිනම් බෝධියෙන්,

මුන්ට හෙණ ඉල්ලමුද..?

ඉට්ටේසමේ කෙලවරේ,

මුඩුක්කුවෙ, ලෑලි කාමරේ,

තමයි අපෙ මන්දිරේ....

මලක් විකුණා ගන්නේ,

නිවන් දකිනට නොවේ,

කිරි ඉල්ලලා අඬන,

පොඩි එකා නලවන්න.... 

වේලකින් කොහෙද සෑර්,

තනේ කිරි එරෙන්නේ....?

කිරි පැකට් එකක් නොව,

හැඳි දෙක තුනක් ගන්න...

උනානම් වැරද්දක්,

දෙනු අපට සමාවක්...!

කුදැලුවොත් පොලිසියට,

පොඩි එවුන් හාමතේ.

දන්න දා ඉඳන් අපි,

කරන්නේ මේකමයි.

ඒ දේත් නැති උණොත්,

විසිකරන්නද අපේ,

පොඩි එවුන් කළු ගඟට..

අනේ බෝ සමිඳුනේ,

තරු එපා පළඳන්න,

කාකි උර පටිවලට....!!!

හෙන හතක් හෙම නොවේ,

එයින් සිය ගනනක්ම,

ගහපියව් මේ හැත්ත,

සුනු විසුනු වී යන්න,

වැහි නොමැති දිනකදී,

තරු පිරුණු රැයකදී....!!!

.oOo.