පොටෝ ඇල්ලිල්ල - Photography

බුක් ෂෝ එක ගැන ලියපු කවි ටිකක් ආයෙත් දැම්මම, වෙනියට මල පැනලා, අපි දෙන්නා මරාගෙන, ඒ ගැන මාරයයි, කතයි දෙන්නත් පෝස්ට් දැම්මනේ. කවුරුත් හිතා ගත්තේ, අපි මරාගනියි කියලා. අපේ ඒවා නෑ. කියන්න ඕන දේ කිව්වා එතනින් ඉවරයි. යාළුකම එහෙමම තියෙනවා. (කොහොම හරි බොහොම කලෙකින්, එක පෝස්ට් එකක් නිසා, පෝස්ට් කීපයක් ලිය උන එක ගැන නම්, මට තියෙන්නේ පුදුම සතුටක්)

වෙනියා, මම හම්බවෙලා කතා බහ කරලා තියෙන බ්ලොග් කාරයෝ කීප දෙනාගෙන් එක්කෙනෙක්. ඒ වගේම හිත හොඳ බුවෙක්. ඌට මල පැනලා තිබුනේ පොත් වල පින්තූර දාන එකට, මම ගතු කිව්වයි කියලනේ. ඒ කියන්නේ පොටෝ ඇල්ලිල්ල ගැන.

බොග දාන උන් අතරෙත්, මේ කැමරමන්ලා වගේම කැමරවුමන්ස්ලත් හෝ ගාලා ඉන්නවා. ඔය වෙනියා, අපේ සොසී, පොඩි රාජ්, මාරයා, සිරා, අලුතෙන් ආපු ඔමායා, බින්දි, හැලපයා, කතා වගේම හෙන්‍රියත් ඒ අතරින් කීප දෙනක්. ඒ ඇරෙන්න අයිලාෂ් කියලා කැමරා ඉස්පෙසලිස්ට් කෙනෙකුත් ඉන්නවා. ඌ කැමරා ගැන, බොග දාන හාදයෙක්.

සොසීගේ පොටෝ එකක්

ඔය මොකාගේ පොටෝ තුබුනත්, මටනම් පොඩි ආටිස්ටික් ගතියක් තියෙන පොටෝ දාන්නේ සොසී විතරයි. එහෙම කිව්වා කියලා, අනික් උන් මා එක මල පන්නගන්න ඕන නෑ. මම කිව්වේ, මගේ ටේස්ට් එක. ඒ ඇරෙන්න ඉන්ඩිගේ කොත්තු සින්ඩියෙත් ක්ලැසික් පින්තූරු දානවා.

මට නම් ඔය පොටො ඇල්ලිල්ල, පොඩි කාලේ ඉඳන් දිරවන්නේ නෑ.ඒ උනාට ක්ලැසික් පොටෝග්‍රැෆි වලට නම් පට්ට පිස්සුවක් තියෙන්නේ. ඔහේලට කියන්න ආයිබෝවන්ඩ, ඔය එක එක රටවල ගියාට, ඒ රටවල ගත්ත පොටෝ එකක්වත් නෑ. තියෙන්නේ පාටියක බොන එකක් තමයි. ඒත් ඉතින්, යාලුවෝ අරගෙන උන්ට තියාගෙන වැඩක් නැති නිසා දීපුවා. මොකෝ ඒවා තියාගෙන, අපායේ කැලැන්ඩරේට දාන්නෙයි ආයිබෝවන්ඩ. ඉතින් ඒවා බැලුවා කියලා, ඉන්නේ මොන රටේද කියන්න බෑනේ.

මේ සොසී නෙමෙයි සූසී

අපේ උන් පොටෝ අල්ලන කොට කියන එකක් තමයි, "අනේ... ඔය පාර්ලිමේන්තුව වැටෙන්න අල්ලන්න..., රුවන්වැලිසෑය වැටෙන්න අල්ලන්න...., සීගීරිය වැටෙන්න අල්ලන්න.... කියන එක. ඉතින්, උන් ගන්න පොටෝ, ඩිවෙලොප් කොරයින් පස්සෙ, ඒ පොටෝවල ඕවා කඩාගෙන වැටිලා තියෙනවද කියන්න නම් දන්නෙ නෑ.

මට තාමත් පට්ට ලැජ්ජ වැඩක් තමයි, පොටෝ වලට ඉන්න එක. ඔය මගුල් ගෙවල්වල ගියාම, මගුල් ජෝඩුවත් එක්ක ඉන්නම එපාය. ඕන් ඉතින් එහෙම ගත්තු පොටෝ වල ඉන්නවා, සයිකල් හැඩල් එකක් ගිලපු එකා වගේ. මගුල් ගෙවල්වල පොටෝ ඇල්ලිල්ල ගැන කීප තැනක කියාපු නිසා මෙතන ආයෙත් කියන්න යන්නේ නෑ. අපරාදේ කියන්නේ ඒ ෆීල්ඩ් එකෙයි, පැසන් ඉන්ඩස්ට්‍රි එකෙයි නම්, ළෝකේ ඕන එකෙක්ට චැලෙන්ජ් කරන්න පුළුවන් උන් නම් ගොඩක් ඉන්නවා මෙහෙත්.

ඉස්සර නම් මගුල් ගෙදර ප්‍රධාන චරිතේ මනමාලි. අද ඒ තැන තියෙන්නේ කැමරමන්ට. ඌ, මගුල් පොටෝ ඇල්ලිල්ලට අමතරව ආපු උන්ගෙත් පොටෝ අල්ලගෙන ගානක් කපාගන්නවා. අපේ උන්ටත්, පොටෝ අල්ලන එකා පොරසිද්ද එකෙක් නම්, උගෙන් පොටෝ එකක් ගහ ගන්නකන් ඉස්පාසුවක් නෑ.

බාප්පගේ කැමරා එක

ඉස්සර තිබුන කැමරා, රීල් එකක් දාලා. පොටෝ එකෙන් පොටෝ එකට, කරකව කරකව ගන්න ඕන. ඔය කරකන සද්දෙත් මම මාර ආස සද්දයක්. කරකැව්වේ නැත්තන්, කලින් ගත්ත පොටෝ එකත් ඉවරයි, දැන් ගත්ත එකත් ඉවරයි. මගුල් ගෙවල්වලත් ඉතින් බොහෝම පරෙස්සමෙන් තමයි පොටෝ අල්ලන්නේ. ඉස්සර, ඔය අද වගේ හැම එකා ගාවම කැමරා නෑ. අද නම් පෝන් එකෙනුත් පොටෝ අල්ලන්න පුළුවන් නේ. ඒ කාලේ කැමරා එකක් තිබුන එකා පොරක්. ඒ මදිවට කලර් පොටෝ ගන්න එකෙක් නම්, ඌ හෙන පොරක්.

ඔහොම කැමරා එකක් තිබුන එකෙක් තමයි, අපේ සැල්ටොන් බාප්පා. පදිංචිය, ලන්ඩන් හංදියේ ඉඳලා පේන දුරින්. එයා කියන්නේ නම්, ඇලිසබෙත්ගෙ ගෙට, පොඩ්ඩක් එහායින් කියලා. පොර බැඳලා උන්නේ සුද්දියෙක්. එයාගේ නම මේරී. බබාලා දෙන්නයි, දෙන්නම කොල්ලෝ, උන්ට නම් මට වගේම විස පොවලා. උන්ට සිංහල බෑ. මට ඉන්ගිරිස් බෑ. උන් සුරුස් බුරුස් ගාන කොට, මම ගොළු භාෂාවත් එක්ක, දිස්, දැට්, කැට්, රැට් කෑලි දාලා, කොහොම හරි කොමිනිකේසොන් එක කරගන්නවා. අපේ සීයා (නයි ඇනෝගේ ෆේවරිට් පොර) කියන්නේ, අපේ වේස කොල්ලා මදිවට, ලන්ඩන් වලිනුත් මදි පාඩුවට ඇවිල්ලා කියලා.

පොර, පවුලේ එකෙක්ගේ මගුලක් කිව්වාම, අනිවාර්යයෙන් එනවා. ඒ එන්නේ "මගුල් ගේ" අද වගේ හෝල් එකේ තිබ්බ නිසා නෙමෙයි. මගුල හරි ඇට්ටෝන් එක හරි තිබුනේ මනමාලිගෙයි මනමාලයගෙයි ගෙවල් වල නිසා. කොළඹ උන්න කීප දෙනෙක් ඔය ආකාස කඩෙයි, GOH එකෙයි ගත්තට ගොඩක් මගුල් ගෙවල් තිබුනේ ගමේ. ඒ කියන්නේ ගාල්ලේ.

සැල්ටෝන් බාප්පා ලන්ඩන් වලට වඩා ආතල් එකක් ගන්නේ, මේ මගුල් ගෙවල් වල. අපරාදේ කියන්නේ අපේ පවුලේ අනිත් සාමාජිකයන් වගේම, ෆැමිලි බාර් ඇසෝසේසොන් එකේ, විශේෂ ඉස්තානයක් පොරට තිබුනා. අනික ඉතින් ලන්ඩන් බුවෙක් නිසා පොර තමයි මෑන් ඔෆ් ද මැච්. පොර ගාව වගේම, සුද්දි ගාවත් කැමරා තිබුනා. අපිට අල්ලනවත් දෙන්නේ නෑ. ඕවයෙන් ගන්න පොටෝ අපිට හම්බ වෙන්නේ මාස දෙක තුනක් ගිහිල්ලා. මම දන්න තරමින්. ඒ කාලේ අම්මට සිරි ලංකාවේ, කලර් ලැබ් තිබ්බේ නෑ.

නයා දිග වැඩි උනා. ඒ නිසා. ඉස්ටූඩියේ පොටෝ ආලපු හැටියි.අපේ ෆේමස් පොටෝ කාරයොයි, නෝනගේ පොටෝ ඇල්ලිල්ලයි, දිය ඇලි එක්ක පොටෝ කතාවයි, පොටෝ ගැන රස කතාවකුයි එක්ක, ඊළඟ එක දෙන්නම්..