සින්සෝ අබේ ආවෝ ගියෝ - Sinzo Abe Tour of Sri Lanka

කක්කා බර තදවී, හදිසියේ එළිබහින්න ගෙදරට ගොඩ උන එකා වගේ, කළබලේ ඇවිල්ලා ගියාට, මල පැනලා උන්න ජනාධිපතිතුමාට, ඊටත් එහා මල පැන්නේ, නයි ටී ඇන් එක කරකවපු වෙලේ, පැය විසි හතරක් වත් මෙහේ නොඉඳපු එකා, දවස් දෙකක සංචාරයක් කලාය කියන කතාව ඇහුවායින් පස්සේය. මේ යක්කු ඇවිල්ලා, චීනාගේ හිත අප්ෂට් යන නිසා, අබේ එනවාට ලොක්කාගේ ඒ තරම් කැමත්තක් තිබුනේත් නැත. ඒත් ඉතින් ඒ කාළේ ඉඳන් ඉන්න එකම ජපන් යාළුවාටත් පොඩි චෑන්ස් එකක් දෙන්න ඕන නිසා, ලොක්කා යසුසි ආකාෂිට කීව්වේ ඔන්න ඔහේ ඇවිල්ලා යන්නෙයි කියලාය.

යසුසි ආපු ගමන් අපේ ජනාධිපතිතුමගෙන් ඇහුවේ, ඇයි ලොක්කා අබේ මල්ලි පිලිගන්න ප්ලේන් එක ගාවටම ආවේ නැත්තේ කියලාය. මට මේ දවස්වල අව්වේ ඉන්න එපාය කියලා දොස්තරලා කියලා තියෙනවනේ කියා, අමු පචයක් ඇදලා ඇරපු ජනාධිපති තුමා, ළඟ හිටපු එකෙකුට කිව්වේ, මම ප්ලේන් එක ගාවට ගියානම්, මේ ඉන්න ගොන් හැත්ත, අබේ පිලිගැනීම පැත්තකින් තියලා, දෙකට නැමි නැමි මට වඳින්න ගත්තෝතින් හෙම, අබේ  මල්ලි අප්ෂට් යන්න පුළුවන් නිසා, හරක් රැල මැද්දට පැන්නේ නෑ කියාය. ළඟ හිටපු එකා ජනාධිපති තුමාට කිව්වේ, ඔබ තුමාගේ කටේ ජපන් ආධාර ටිකක් දාන්න හිතෙනවා කියපු කතාවට, මුන් බුදු හාමුදුරුවෝ ආවත්, උන්නාන්සෙට වඳින්නේ නැතුව, ඔබ තුමාට පෙරලි පෙරලි වඳින එක නම් බුදු ෂුවර් කියලාය.

කාළකන්නි සෙට් එකත් පස්සෙන් එල්ලෙන නිසා, අබේවත් තනියෙන් යවලා ලොක්කා හොර පාරකින් අළුත් පර්යන්තේ විවෘත කරණ තැනට ආවේ, මුන්ගේ වදේ ඉවසන්නම බැරි හින්දා මිසක් වෙන හේතුවක් නිසා නෙමේය. මත්තලත් පත එකක් හදලා තියෙද්දි කටුනායකට තව පර්යන්තයක් අහවල් එකටද කියා අබේ ජපන් වලින් ඇහුවාම, ලොක්කා කිව්වේ ඒක හදලා තියෙන්නේ දඬුමොණරා බාන්න කියලාය. ඉන්ගිරිසියෙන් එනවුන්ස් කරණ එකා මර හඬ දීලා කෑ ගහන නිසා මෙළෝ දෙයක් ඇහුනේ නැති අබේ ඔළුව වැනුවේ භාසා පරිවර්ථනේ කරන්න ආපු භාසා වෙල්ලත් දඬුමොණරේ කියන්නේ මොකක්ද කියලා දන්නේ නෑ, පස්සෙ හොයලා කියන්නම් කිව්වාමය.ය.

එතනින් අබේ අයියා එකකගෙන ගියේ, පරණ පාර්ලිමේන්තු වටරවුම ගාව, අළුතෙන්ම හදපු රවුන්ඩබවුට් එක පෙන්නන්නය. එක බලලා ඇතුලට ගියපු අබේ අයියාට, ලොක්කා රාමු කරපු පොටෝ එකක් තෑගී දුන්නේ ගෙදර ගියාම බලන්න, මමත් ඔය පොටෝ එකට උදේ හවා වඳිනවා කියලාය. අබේ අයියලා තෑගී දුන්න පාර්ලිමේන්තුව බලන්න ගියේ, ඊට පස්සේය. ආකාසිට ඕන වෙලා තිබුනේ සමාන්‍ය සම්ප්‍රදාය විදියට අබේ අයියා පාර්ලිමේන්තුව අමතන්න වැඩේ සෙට් කරන්නය. ඒත් අබේ අයියා කිව්වේ එතන කතා කරන එවා මෙලෝ වැඩක් ඇති ඒවා නෙමෙයි කියා. ගොසිප් සයිට් එකක තියෙනවා දැක්කා නිසා, කිසි තේරුමක් නැති වැඩ කරන්න අබේ කැමති නැතෙයි කියලාය.

එතන ඉන්න අස්සේ අබේ අයියාට අබේ අක්කාගෙන කෝල් එකක් ආවේය. ඩාලින් මම මේ ඉන්නේ ලක්සලේ, ලස්සන බුදු හාමුදුරු කෙනෙක්ගේ පොටෝ එකක් තියෙනවා මම ඒක ගන්නද කියා මිසිස් අබේ හුරතලේට ඇහුවාම,. ඕන වෙන්නේ නෑ, මම හිතන්නේ මහින්ද මට බුදු හාමුදුරු පින්තූරයක් දුන්නා, ඔයා වෙන මොනවා හරි ගන්න කිව්වම, නෝනා පන්කොල තොප්පියක් විතරක් අරගත්තේ, ගන්න ඒවට ගෙවන්න වෙන්නේ එයාගේ පොකට් එකෙන් නිසාය.

පාර්ලිමේන්තුවේ තේ සංග්‍රහය අස්සේ එක එකා කතා කරන අතරේ, අබේ යසුසිගෙන් ඇහුවේ සූමෝ කාරයොත් පාර්ලිමේන්තුවේ ඉන්නවාද කියලාය. ආ.. නෑ.. ඒ සූමෝ කෙනෙක් නෙමෙයි, නිමල් සිරිපාල කියලා ඇමති කෙනෙක්, එයා සූමෝ ක්‍රීඩාව දන්නේ නැති උනාට, අමාත්‍යශයේ සෙටියේ වෙනින් මොකක්ද ක්‍රීඩාවක් නම් කරලා, සම්මාන සහතික පවා ලබා ගෙන තියෙනවා කියා කීවේය.

එයිට පස්සේ ව්‍යාපාරික ප්‍රජාව එක්ක සෙට් වෙන්න ගියපු අබේ අයියාට, ව්‍යාපාරික ප්‍රජාව නියෝජනය කරන සාටක කාරයා පෙන්න නැති නිසා, හිතට සහනයක් දැනුනේ නැත්නම් ඉතින් වැඩේ පටන් ගන්නත් කලින් කොමිස් එක ගැන කතා කරන්න වෙන හින්දාය. අබේ කිව්වේ හෙට ඉඳන් ජපන් බිස්නස් කාරයෝ පෝලිමේ ඇවිත් මෙහේ බිස්නස් පටන් ගනීවී කියලාය. ඒත් ආපු බිස්නස් කාරයෙක් ළඟ ඉන්න එකෙකුට කිව්වේ මම නම් තියෙන එකත් වහලා දාලා මියන්මාර්වලට යන්න හිතාගෙන ඉන්නේ, ලයිට් බිල ගෙවාගන්න විදියක් නැති හින්දාමයි කියලාය.

ඊළඟ දවසේ උදේ කැළණි පන්සල් ගියපු අබේ මහත්තතයා, ඒකෙ බිදු සිතුවම් බලන ගමන් ඇහුවේ මහියංගනේට බුදු හාමුදුරුවෝ වැඩිය වෙලාවේ, එහේ යක්කු ඉන්නවා ඇඳලා තියෙන්නේ ඇත්තටම යක්කු එහේ ඉඳියාද කියලාය. ඒ කාළේ නෙමෙයි දැනුත් ඒ පැත්තේ යක්කු වගයක් ඉන්නවා, හැබයි යන්නේ එන්නේ නම් ඩිෆෙන්ඩර් වල කියා ගයිඩා කියලා දුන්නේය.

කොල්ලුපිටියේ මහින්ද (හාන්දුරුවෝ) ඒක ඇහිලා කිව්වේ, උන් ඒ පැත්තේ යක්කු නොව කොළඹින් සහ හම්බන්තොටින් ගියපු යක්කු වගයක් කියලාය. ඒක අහපු අබේ මහත්තයා කිව්වේ ජපානේ යකුසා කියලා යක්කු වගයක් නම් ඉන්නවා, උන් ඉන්නේ ඇඟිල්ලක් කපාගෙන කියලාය. අපේ නම්, දේශපාළණෙට එන යක්කු, ඇඟිලි කපාගෙන ආවේ නැති උනාට, වැඩේ පටන් ගන්න කොටම, ලැජ්ජා නහරෙ නම් කපාගන්නවා කියා එතන හිටපු එකෙක් අබේ අයියාට කිව්වේය.

ඔක්කෝටම අරිගතෝ ගොසයි මස්, ටටා බායි කියපු අබේ මහත්තයයි නෝනයි, ආයෙත් ජපානේ බලා යන අතරේ, නෝනා ඇහුවේ, ඩාලින් අර මහින්ද දීපූ පොටෝ එක බලමුද කියලාය. ඒක දැම්ම කඩලා බලන එක හරි නෑ නේද, අනික වැඳුම් පිඳුම් කරන පොටෝ එකක් නිසා, ගෙදර ගිල්ලම බලමු කිව්වම, අබේ නෝනා කිව්වේ ඒක දැන් බලන්න දුන්නේ නැත්නම්, මම හරාකිරි කර ගන්නවා කියලාය.

නෝනලාගේ හැටි දන්නා අබේ අය්යා ඉක්මනටම පොටෝ එක ගෙන්න ගත්තේය. රැපින් එක ගැලෙව්වේය. එකේ හිටියේ බුදු හාමුදුරුවෝ නොව ජේ ආර් උන්නෑහේය. අබේ අයියයි අක්කයි දෙන්නාම පින්තූරේට වඳින ගමන්, නෝනා අබේගෙන් ඇහුවේ, අපි මෙයාට වැන්දට, මහින්ද රාජපක්ෂ මේ ඔපසිසොන් පොලිටීසියන්ට වඳින්නේ මොකද දන්නේ නෑ නේද ඩාලින් කියලාය.