සූර පප්පලා මොනවා කරයිද...? - asterix & obelix take on ISIS

ලාංකීය සමාජය තරමටම බිඳෙන-සුළු (fragile), ලාංකීය සමාජය තරමටම මරි මෝඩ සමාජයක් තවත් ඇතිනම් ඒ ප්‍රන්ස සමාජයයි. 9/11 සිද්ධීන් ගෙන් පසුව ඇමෙරිකාවේ හෝ 7/7 සිද්ධීන්ගෙන් පසුව ලන්ඩනයේ දක්නට ලැබුණු සාපේක්ෂව පරිණත හැසිරීම ප්‍රන්සයෙන් බලාපොරොත්තු වීම මෝඩ කමකි. ප්‍රන්සයේ වෙසෙන්නේද (ලංකාවේ මෙන්ම) තොප්පියක් බිම වැටුණද එකිනෙකාගේ බෙලි මිරිකා ගන්ට සූදානම් පිරිසකි. "වගකීමෙන් යුතුව හැසිරීම" කියා දෙයක් ලංකාවේ සේම ප්‍රන්සයේද නැත. පසුගිය දින දෙකක කාලය තුළ ඔවුන්ගේ හැසිරීමම ඊට මනා නිදසුනකි.

මුලින්ම සරම උස්සා ගත්තේ ඔලොන්දේ අන්කල්ය. ඔහු සිද්ධියෙන් පසු තම ජාතිය ඇමැතීමේ පළමු වාක්‍යය නිම කළේ මෙසේය. «C'est un acte de guerre et face à la guerre le pays doit prendre les décisions appropriées. » (“මෙය යුද්ධමය ක්‍රියාවක්. යුද්ධමය ක්‍රියාවකට මුහුණ දුන් රටක් ඊට ගැළපෙන තීරණ ගත යුතුයි.”) ම්ළවුන්ගේ පවුල්වලට ශෝකය පළ කිරීම පවා ඔහුට මතක් වූයේ අන්තිමටය.

La Pen

වෙලාව එනතෙක් පුල පුලා බලා සිටියේය සිතිය හැකි ල පෙන් නෝනා ද නියම හෙළ උරුම ටෝකක් දුන්නාය.

මෙවැන්නක් ලංකාවේ වී නම් අනිවාර්යයෙන්ම අපේ කුමාරයෙක් විසින් නිකුත් කරතැයි සිතිය හැකි ට්විටර් පණිවිඩයට සමාන වන්නක් නිකුත් කළේ හිටපු ජනපති පුත් ලුයී සාකෝසිය. « La faiblesse et l’incompétence du président Hollande devient un danger mortel pour la France ». මේ මාරක සිද්ධියේ වගකීම ඔහු ඔලොන්දේගේ ගිණුමට සම්පූර්ණයෙන්ම බැර කරයි.

අද ගේමට බැස්සේ ප්‍රන්ස අග්‍රාමාත්‍ය මැනුඑල් වල්ය. ප්‍රන්සය විසින් ISIS ත්‍රස්තවාදීන් මුලිනුපුටා දැමිය යුතුය කියා පටන් ගත් ඔහු අවසන් කළේ ප්‍රන්ස හරයන්ට ගරු කළ නොහැකි සියළුම ප්‍රන්ස වැසියන්ගේ පුරවැසිභාවය අහිමි කළ යුතුය කියමිනි.

Manuel Valls

මේ හැරුණු විට ප්‍රන්ස දේශපාලුවෝ රාශියක් මේ වන විට එකිනෙකා පිට වරද පටවා ගනිමින්, එකිනෙකා පරයන්ට දේශප්‍රේමී වෙමින්, එකිනෙකා පරයන්ට රට යුද්ධයකට ඇදගෙන යන ප්‍රකාශ නිකුත් කරමින් සිටිති.

ප්‍රන්සයේ මුස්ලිම් ප්‍රතිශතය 5-10% අතර වෙතැයි සැලකේ. (ජාතීන් හෝ ආගම් වශයෙන් සංගණනය නොකෙරෙන නිසා මේ ගණන හරියටම දත නොහැකිය.) මේ පිරිස ගැන මම බිය වෙමි. 9/11 සිද්ධි වලින් පසුව ඇමෙරිකාවෙ මුස්ලිමුන්ට මුහුණ දෙන්ට සිදු වූ ඉරණමට වඩා භයානක ඉරණමකට මොවුන්ට මුහුණ දෙන්ට සිදු විය හැකිය. ප්‍රන්සයත් ලංකාව සේම “දේශප්‍රේමී” රාජ්‍යයකි.

ප්‍රන්සය මේ මොහොතේ පවතින්නේ හදිසි නීති (emergency) තත්වයන් යටතේය. හෙට ඔලොන්දේගේ පාර්ලිමේන්තුව ඇමැතීමේ කතාවෙන් පසුව එය වෙනස් වන්ට ඉඩ තියේ. ඉන් පසුව ඕනෑම දෙයක් විය හැකිය.

ස්තූතිය - හිතවත් චානුක වත්තේගමයන්ට