2015, මැට්ටෝ සහ යාං හෑලී - Good Bye 2015

2015 මොකෑ උනේ, ඇත්තටම බලාගෙන ගියාම මක්කත් උනේම නෑ වගේය. ජනවාරි 8 නිහඬ විප්ලවයෙන් හිටපු ලොක්කා ගෙදර යැව්වාට, තාමත් හොල්මන හැම තැනම කරක් ගහනවාය. ටැලිවිසොන් කාරයන්ට නම් තාමත් ජනාධිපති උන්නැහේය. සෑම ඉන්සිඩොන්ට් එකක් ගැනම එතුමාගේ අදහස විමසනවාය. එතකොට අර උගුර බල්ලෝ කාපු, ගාම්බීර වොයිස් එකෙන් එයා තවුසන් ටෝක් වගේ ලොරි ටෝක් දෙනවාය. එයා කියන්නේ එයාගේ කීර්තිය නැති කරන්න මේ ආන්ඩුව කරන්න පුළුවන් හැම එකක්ම කොරනවා කියලාය.

කතාවේ ඇත්තක් නැත්තේමත් නැතිය. අවුරුද්දක් ගිහිල්ලත් ඔප්පු කර ගත්ත එකම මළදානයක්කත් නැතිය. එහෙම බැලුවාම තාමත් ආන්ඩුව ගෙනියන්නේ රාජපස්සලා කිව්වොත් ඒකෙත් වරදක් නැත්තේය. ඇති යහපාලනයකුත් නැතිය. එහෙම එකක් තියෙන්නත් බැරිය. මොකෝ අලි බබා නැති උනාට හොරුන්ගෙන 90% අළුත් ලොක්කාගේ රෙද්ද අස්සේය. එහෙව් එකකට යහපාලනය කියා කියන්න එක්කෝ කියන එකාට පිස්සු තියෙන්න ඕනාය. එහෙම නැත්නම් සිරිසේන ලොක්කා ගාවට ගියපු ගමන් කැළණි වැන්දා වගේ, සියළු පව් අහෝසි වෙන කේස් එකක් තියෙන්න ඕනාය. 

කව්දෝ සෙට් එකක් වසරේ පොර ලෙස නම් කරලා තිබුනේ චන්ද කොමසාරිස්ය. ඒ අයට සෝභිත හාමුදුරුවෝ අමතකම වෙලා තිබුනේය. මොකෝ එතකොට උන්නාන්සේ අදාහනය කොරලා සති දෙක ඉවර වෙලා තිබුනු නිසාය. දැන් එහෙම එකෙක් උන්නද කියාවත් මතකයක් නැතිය. මාතලන්ට නම් වසරේ නොව, ලේ වැගිරීමකින් තොරව බුද්ධ දර්ශණය අනුව නියම විප්ලවයක් කල යතිවරයෙක් වශයෙන් උන්නාන්සේ කවදාවත් අමතක වන්නේ නම් නැතිය. ඒ පෙරලිය සිඳු වූයේ නැත්නම්. මේ වන විට අපිට බොග දාන්න ඉන්ටර්නෙට් තියා සැල්පෝන්වත් තියේදෝ කියා සැක සහිතය. කෙසේ වෙතත්, චීන්නු, හයි වේ, සියල්ල සමග, රජ පාලනයක මිහිරියාව නොඅඩුවම ලබන්නට නම් තිබුනේය.

පෝට් සිටිය පටන් ගත්තේ නැත්නම්, 2016 මීටත් චාටර් වනවා නොඅනුමානය. කිසිම සංවර්ධන කටයුත්තක් නැත. නෙළුම් කුළුණද නැවතුන තැනය. හොරණ පාරද එහෙමය. ආන්ඩුවට මුදල් නැතිය. එන ඉන්වෙස්ටරයෙකුත් නැතිය. 365 දවසෙම අග නගරේ උග්ගෝසන ඉස්ටැයික් පෙලපාලි තියෙන රටක ඉන්වෙස්ට් කොරන්න එන එකාට මොළේ ගොම හෝ ඊට සමාන දරව්වයක් අඩංගු විය යුතුය. දකුණු අත කොරන දේ වම් අත දන්නේ නැතිය. වම කරණ දේ දකුණ දන්නේ නැතිය. 

එකාට එකා නැතිය. මූ ගේන යෝජනා අරූ අහෝසි කරනවාය. අරූ ගේන යෝජනාවක් නැතිය. උන් යන්නේ ගල් යුගයටය. බෙසියරයක් ඔළුවේ පටලවාගෙන ඒක ලිහා ගන්න බැරිව මොළේ කොලොප්පම් වෙලාය. ළෝකයේ තියෙන ළොකුම පුරස්නය ඒකය. අපේ සඟිස්කුරුත්යක් ගැන කතා කරනවාය. එයාගේ මල්ලි සඟිස්කුරුතියද මක්කද කොරන්න ගිහිලා, නිවන් පුරේ දොර ඇර ගත්තේ පොරෝ පහරකට පින් සිද්ද වෙන්නය. ඒ අපේ සබ්බත්වයද මක්කද එකය.

බ්ලොග් ගැන කතා කරනවා නම් බොග දාන උන් කීප දෙනෙක්ම මේ අවුරුද්දේත් එකතු උනේය. උන් අතරෙන් මාතලන්ගේ හිත ගත්ත කීප දෙනෙක්ම ඉන්නවාය. තෝරා ගන්න එකත් බොහෝම අමාරුය. එකෙක් තෝරන එක කොහොමත් අමාරුය. සමහ විට මේ කේස් එකට නෙළුම් යායේ උන්ටත් මුහුණ දෙන්න වෙනවා බුදු ෂුවර්ය.

මාතලන් මේ වසරේ සාර්ථක බ්ලොග් කරුවන් දෙන්නෙක් තෝරනවාය.

මේ අතරින් පලවෙනි එකා ආර්ථිකය ගැන ලියනා, ඉකොනොමැට්ටාය. ඌ බොග දාන්නේ උගේ බොජුන්හලේය. ආර්ථිකයට අමතර දෙත් ඌ ලියනවාය. ඒ ලියන දේ ඉතා නිරවුල්ය. මනා ලෙස සංස්කරණය කොට කරුණු පෙලගැස්වීම අති ඉස්තරන්ය. එක්කෝ ඌට මෙය ලේ වලින් ලැබෙන්න ඇතිය. උගේ ලියවිලි ඒ තරම්ම ප්‍රොෆෙසොනල්ය. 

පුවත් පතක හෝ කිසිම තැනක ඒ තරම් නිරවුල් ලෙස ඉදිරිපත් කිරීම අද දකින්නට ඇත්තේම නැති තරම්ය. ඉකෝන් ලිවිය යුත්තේ ඉකෝන් දන්නා උන්ට නොව, අපි වාගේ මෙළෝ දෙයක් නොදන්නා හරක්ටය. ඕන් එතකොට අපටත් මක්කා හෝ තේරෙනවාය. ඒ නිසා වසරේ හොඳම බ්ලොග් කරුවන් දෙදෙනාගෙන් එකෙක් ලෙස, මාතලන් ඌට මේ සම්මානය දෙනවාය. පරෙස්සම් කොරලා අරගෙන තියා ගන්න එක උගේ වැඩක්ය. දෙන එක මගේ වැඩක්ය.

අනිකා අද බොග දාන උන් අතරේ ජනප්‍රියම පොරය. ඒ වෙනින් කවුරුවත් නොව යාං හෑල්ල ලියන සුරන් කොලුවාය. උගේ ගමේ තතු කිසිම ලෝබ කමක් නැතිව ඒ ආකාරයෙන්ම රස ගුලාවක් ලෙස අපට පුදනවාය. ඌ කියනවා වාගෙම, පොහොර බෙහෙත් නැති කාබනික ජීවිතයක අක් මුල් අතු පතර ඉස්පර්ස කොල මතකයන් හෝල් සේල් දෙනවාය. ගම කියා මහා ළොකුවට වර්ණනා කොරනා දේ තුල අඩංගු අමූලික තිත්ත ඇත්ත එලියට දානවාය. බොරුවට ගම වනනා උන්ට ඌ දෙන්නේ කම්මුල් පහරක්ය. අනික ඌ අනන්‍යතාවයක් ගොඩ නගාගෙන අවසානය. ඌ කොච්චර ජනප්‍රියද කියනවා නම්, අද ඌ අනුගමනය කොරනා උන්ද ඉන්නවාය. 

ඒක ලේසී පාසු දෙයක් නෙමේය. ඉතින් එතරම් ජනප්‍රිය සුරන් ගොයියාට අනෙක් සම්මානේ කිසිම ලෝබ කමක් නැතිව දීලා දානවාය. උඹ මේක මාතලන් දුන්නා කියා ආච්චම්මාට දූන්නත් අවුලක් නැතිය. මොකෝ උඹට වඩා හැම එකාම කතා වෙන්නේ උඹේ අච්චම්මා ගැන නිසාය. 

බයියා එලවිමින් නව අවු රුද්දක්             ආවා

උන් චුත වුනැයි ටොයියෝ ජය පැන්        බීවා

ජංගිය බැසියරේ දිනයක රජ                  වේවා

මේ වසරෙවත් බයියෝ සැම චුත            වේවා

-o0o-

ඔබ සැමට ගොන් ආතල් වලින් පිරි වසරක් වේවා.....!!!