තේ යාරයක් දාන්න.... - Tea with condensed milk

ටින් කිරි පෝස්ට් එකක් දාන්න ගිහින්, මාත් මාර ටින්කිරි පාරක් නේ ගාගත්තේ, අන්තිමේදි, උණවටුනේ ගිහින් නැවතුනේ. මේ ටින් කිරි තේ හදනවා, ඉස් ඉසෙල්ලම දැක්කේ, මම කියපු අර පාසිහේනේ කන්ද උඩ කඩේ. මේ ළඟදි තම්බියෙක්ගෙන් (අපහාසයට නොවේ) අම්බානක කන්න ගිහින් බේරුන, ඔය සැමා කියනවා වගේ, අද "විස්කම් නිවස" කියන්නේ, එදා මැටි කර්මාණ්ත ශාලාව.

ඕකට අපි ඒ කාළේ කිව්වේ "මැටි මෝල" කියලා. ඒකේ වැඩ කරන උන්ට කිව්වේ "මැට්ටෝ" කියලා. ඔතන තියෙන පාරෙන් තමයි ආයිබෝවන්ඩ, "වීජමූගේ සර්ප විෂ වෙද රෝහලට" යන්නේ. ඒක අද තියෙනවද, නැද්ද කියන්න නම් දන්නෙ නෑ. ටින් කිරි තේ එක නමෝ විත්තියෙන් දැකපු කඩේට අපි කියන්නේ කියන්නේ "කළු කඩේ" කියලා.

එහෙම "කළු කඩේ" කිව්වේ, අසාධාරනේට වෙළඳාම කරපු නිසා නෙමෙයි. මුළු කඩේම කළු පාට නිසා. පොඩි කාළේ හැටියට, තොරණ හංදියේ ඉඳන්  හැතැක්ම දෙකක් විතර දුරින් තිබුන මේ කඩේ ගැන දැනගත්තේ, ඔය කඩේ මුදලාලිගේ, අක්කගේ පුතා, උන්නේ මගේ පන්තියේ නිසා. ඌට හොඳට ඉගෙන ගන්න පුළුවන්. ඒ නිසා ඌ මාත් එක්ක බොහොම හිතවත් උනා.

උදේ වරුවේ ඉස්කෝළේ නෑනේ. ඉතින් සමහර දවසට, හැන්දෑවේ ඉස්කෝලේ යන්න, සූට් කේස් එකත් අරගෙන ඌ අපේ ගෙදර එනවා. එහෙම නැත්නම් මම ඌගේ ගෙදර යනවා. මේ ගමන් අපි ගියේ පයින්, කොහොමත් විනාඩි 45 ක විතර ගමනක්. සත පහක ගානක් නෑ. බස් එකක් ගියත්, යන්නේ බොහොම කළාතුරකින්.

ඒ කියන්නේ ටයිම් සැඩූල් එකකට තමයි එදා බස් දිව්වේ. "235" කැළණිය කොළඹ බස් එකට අමතරව, තව බස් එකක් දිව්වා, කැළණිය වත්තල, ඕක යන්නේ, වරාගොඩ පාරෙන් තොරණ හංදියට ඇවිත්, එතනින් වනවාසල පාරේන් වත්තලට. ඒකට තිබුනේ පොඩි ටාටා බස් එකක්. බස් එකක් හම්බ උනත් බස් වලට ගොඩ උනේ නෑ. පයින් තමයි ගමන.

යාලුවා හරිස්, හරිස්චන්ද්‍ර. හරිස් කියන නම, මම ඌට දාපු නම. ධර්මාළෝකේ උන්ට නුහුරු උනාට, කේරී කොලේජ් එකේ, නම් දාගත්තේ එහෙම තමයි. ඌගේ ගෙවල් තිබුනේ කඩේ පිටිපස්සේ, හරිස්ගේ අම්මගේ මල්ලි තමයි මුදලාලි. මුදලාලි බැඳලා නෑ, ගෝලයා බැඳලත් නෑ. ගෙදරට යන්න ඕන කඩේ ඉස්සරහයින් නිසා, මුදලාලිට අහු නොවී ගෙදරට ගොඩ වෙන්න බෑ.

මාමගෙයි, උදව්වට උන්න මාමගෙයි දත් සෙට් දෙකයි, පිගන් ටිකයි විතරයි සුදු පාටට තිබුනේ. දැකපු පළවෙනි දවසෙම සංසාර බැඳීමක් වගේ මාමා මාත් එක්ක සෙට් උනා. ඒ වාසනාව එදා ඉඳන් මගේ ළග තිබුනා. මේතන නම් හේතුව උනේ. බෙන්තර ගඟෙන් එහා සීන් එක. ආයේ ඉතින් නෝ කතා ඉනා බේත් දුන්නා වගේ තමයි.

දෙන්නම ඇන්දේ සුදු පාට සරමයි බැනිමයි උනාට, ඔය නිල් පාට "රොබින්" කුරුල්ලගේ, නිල් පාට කුඩු දාල, ඒව එක්කෝ නිල් පාටයි, නැත්නම් දුඹුරු පාටයි, හඩු පාට කියන්නෙත් ඔය පාටටම තමයි. අද කාළේ නම් සමහර කෙල්ලෝ කොල්ලෝ, ඔය හඩු පාටට ගොඩක් කැමතියි. ඒකනේ කොන්ඩේ ඒ පාටට හරව ගන්නේ. සමහර උන් නම් කියන්නේ මළ කඩ කාලය කියලා.

කඩේ ඉතින් "තේ කඩයක්", තේ කඩයක් කිව්වට ඔය "ම්ලෙස්නා ටී සැන්ටර්" වගේ, තේ කොල විකුණන කඩයක් නෙමෙයි. පොඩි හෝටලයක්. මුදලාලී ඉන්නේ, කැෂියර් කූඩුවේ, බැනියම රෝල් කරලා පපුව ගාවට අරගෙන, වීරප්පන්ගේ වගේ රැවුලක් වවලා, දැක්කම බොහොම ගරු ගාම්බිරයි, රැවුල දැක්කම පොඩ්ඩක් බයත් හිතෙනවා.

සමහර විට ණයට ඉල්ලන උන්, හොරෙන් කාළා මාරු වෙන උන්, බය කරන්න වෙන්න ඇති, ඇතුල්වෙන තැනම මේ වගේ අය ප්‍රදර්ශණය කරන්නේ. ඕක, ඔය කඩේ මැතඩ් එකක් නෙමෙයි. අදටත් ගොඩාක් හෝටල්වල ඔහොම තමයි, ගෝල්පේස් හෝටලේනම්, කෝට් එකේ බැජ් පුරවගෙන ඉන්න උන්නැහේ දැක්කම් බයක් නම් හිතෙන්නේ නෑ.

ළොකු ඇන්ටීක් ගතියක් පෙන්නේ. කෞතුක වස්තුවක් වගේ නිසා, පොර උස්සන්නත් පුළුවන් කිවම, මහ හයියෙන් හිනාවෙනවා බලන්න ලස්සනයි. සුද්දෝ මෙයත් එක්ක පොටෝ එකක් අල්ලනවමයි. මුත්ත සමහර දවසට හැදැවට හෙදර යන්නේ ජෙනරල් මැනේජර් මහත්තයටත් වඩා ගානක් හොයාගෙන.

කැෂියර් කූඩුව වටේ අලි වීදුරු බෝතලේක හුළං විස්කෝතු, ඊට පොඩි බෝතල්වල ඩෙල්ටා ටොෆි, හැක්ස් ටොපි, පැණි කජු කෑලී, පොල් ටොපි, රුලං කෑලී, එක එක බිස්කට් ජාති දාලා තිබුනා. කැෂියර් කූඩුවේ පිටිපස්සෙ රාක්කේ සරසලා තිබුනේ හිස් බ්‍රිස්ටල් පැකට්, ත්‍රි රෝසස්, ෆෝ ඒසස් පැකට් වලින්, ඒ කාළේ ගොල්ඩ් ලීෆ් තිබුනා කියලා මතකයක් නෑ. කොහොමත් ඒ දවස්වල මේවා පාවිචියක් නෑනේ. නමුත් හිස් පෙට්ටි එකතු කරන පිස්සුවක් නම් තිබුනා.

අනිත් පැත්තේ, අඩි තුනක් විතර උස වීදුරු අල්මාරියක්, ඔය දෙක මැද්දෙන් තමයි කඩේට ඇතුල් වෙන්නේ. වීදුරු අල්මාරියේ තමයි, ඉඳි ආප්ප, ආප්ප, බනිස්, ඤානකතා, ලඩ, හැලප, කළු දොදොල් අනං මනං ඔක්කෝම ජාති තිබුනේ. ඊට උඩින් කහ කෙසෙල් කැනයි, කොල කෙසෙල් කැනයි.

ඇතුලේ මේස පුටු නෑ. බංකුවයි, බිත්තියට ගහපු ලෑලි කෑල්ලක් මේසෙටයි, ගොඩක් අය තේ බිව්වේ හිටගෙන. ඊට පස්සෙ තමයි ගෝලයගේ විමානේ. දිග මේසෙක ඇලුමිනියන් ට්‍රේ එකක අශෝක ග්ලාස්, ඊට පස්සෙ තඹ බොයිලේරුව, ඒක තියලා තිබුනේ බූමිතෙල ලිපක් වගේ එකක. ඊට එහ පැත්තේ, තේ ගොට්ටයි, තේ හදන යකඩ කෝප්ප දෙකයි, හැන්දයි, අන්න අරකයි.....

මොකක්ද..............?

කඩාපු ටින් කිරි ටින් එකයි.......

තේ යාරේ ඊළඟ එකේ දානවමයි..