සිරි පැරකුම් ටින් කිරි (18+) - Tea, Plain Tea & Strong Tea (18+)

මේකේ අගක් මුලක් නොදන්න අය ඉන්නවනම්,
පළවෙනි කොටස මෙතනිනුන් 
දෙවැනි කොටස මෙතනිනුත්
බලාගන්න පුළුවන්ය..

ගිය පාර එක ලිව්වේ කළබලේ නිසා, ලියන ඉට්ටයිල් එකත් අමතක වෙලා ගියේය. ඒ ගැන මතක් කරපු එකාට නම් පින් අයිති වෙනවාය. නැවත්තුවේ, තේ හදන අඩුම කුඩුම අස්සේ තියෙන, ටින් කිරි ටින් එකෙන්ය. ටින් කිරි ගැන, ත්‍රිවිධ රත්නයේ රත්නයන් දෙකක් වන වෙද මහත්තයත්, බොක්කක් බඳු කෙන්ජියාත්, කොමෙන්ට් දමා තිබුන නිසා, දැන් ඉතින් ලියන්නත් දෙයකුත් නැත්තෙය.


කෙන්ජි කිව්වා වගේ, ඒ කාළේ තිබ්බේ පැරකුම් ටින්කිරිය. ඒකේ උන්නේ පුලතිසි පුරේ ඉන්නා, ගස්ලබු කන පරාක්‍රම රජ්ජුරුවෝය. රනිලුත් පැරකුම් යුගයක් බිහි කරනවා කියන්නේ, දැන් කනවටත් වඩා, ටින් කිරි පාරක් කන්න වෙන නිසාද දන්නේත් නැතිය. ඒ කෙසේ වෙතත් ඔය පිලිමේ ගැනත්, නොයෙකුත් මති මතාන්තර තියෙනවාය.

මහාචාර්ය මාතලන්ට අනුව නම්, ඕක රජ කෙනෙක්ගේ වෙන්න නම් බැරිය. තියෙන්නේත් පුස්තකාල භූමියක නිසා, පොත් ලියපු උතුමකුගේ වෙන්න ඇහැක්ය. හැබයි පුතෝ පැරකුම් රජ්ජුරුවන්ගේ රූපේ ගහගෙන, අද දවසෙ ටින්කිරි හැදුවනම්, රාවණාගේ බලකාය ඇවිත් ටින්කිරි පැක්ටරිය ගිනි තියනවාමය. එයාලා සති පූජා වලට බොහොම මනාපය.

ඔය ටින් කිරි අපේ ගෙදරටත් ගේනවාය. ඒ මිලික් ටොපි හදන්නය. වෙද මහත්තයා කිව්වා වගේ, ඒ කාලේ පියන අයින් කරන්න, දැන් වගේ ගැජමැටික් තිබුනේ නැතිය. ඒ කාලේ තිබුන එකට කිව්වේ ටින් ඕපනර් කියාය. හින්ගලෙන් මක්කා කියනවාද කියා නම් දන්නේ නැතිය. අද නම් අළුත් ගැජමැටික් එකෙන් ඕපන් කරන්නේ, "මිල්ක්මේඩ්" කොන්ඩෙන්ස් මිලික්ය.

වෙන් වෙන පියනට මම දිවෙන් වැඩේ දෙනවාය. ටින් එකේ ඉතුරුවෙන ඒවා හැන්දක් අරගෙන තුන් දෙනාටම සම සමව දෙන්නේ, තාත්තා, සමාජවාදෙට වඩා ප්‍රජාතන්ත්‍රවාදයට මනාප නිසාය. ඉතුරු බෙලෙක්කෙ, කිටියා දිවෙන් තල්ලු කරගෙන යනවාය. හිස් බෙලෙක්කේ වෙලට විසික් කොරනවාය. ඒ කාලේ සිරිසේන වගේ රත්තරන් ඇමතිවරු උන්නෙ නැති නිසා, ඩෙංගු හිටියේත් නැතිය.

ඒ කාළේ ඕවාවලින්, බෝම්බ හදපු උනුත් ඉන්නවාය. එහෙම සෙල්ලම් දාන්න ගිය එකෙක් තොරණ හංදියේ සිටියේය. ඒ කාළේ උන්න යූ ඇස් පෙරේරාට, ටින් කිරි ටින් එකෙන් දෙන්න ගිහිල්ලා, ඒක උගේ අතේ පත්තු වෙලා, අත් දෙකම වැලමිට පහලින් කෙලවගෙන වන වනා ගියේය. ඌ පුක හෝදගත්තේ කොහොමද කියා, දැන් ඔහේලා මගෙන් අහන්න එපාය.

ඔය ටින් කිරි ටින් එකෙන්, තේ හැඳි දෙකක්, බෙලෙක් කෝප්පෙට දමනවාය. බේරෙන්න වෙලා යන නිසා "ටිං.. ටිං.." ගාලා හැන්ද බෙලෙක් කෝප්පේ ගැට්ටේ ගහනවාය. ඊ ගාවට කළුම කළු, කඩේ පටන් ගත්ත දවසෙ ඉඳ හෝදලා නැති, තේ ගෝට්ට කෝප්පෙට අල්ලා උණු වතුර ගොට්ටට වක්කරනවාය. ටී එකේ පදම ගන්නේ ඔය වැඩෙන්ය.

මේකට අළුත් තේ කොළ දැම්මාම, දෙසරයක් විතර වතුර දමා, තේ කහට ටික විසික් කොරනවාය. මොකෝ ඒකට තේ කොළ අම්බානක දාන නිසාය. සමහර විට එහෙම කරන්න ඇත්තේ, අතේ පුරුද්දට වෙන්න ඇතිය. එක එකාගේ, එක එක ඉසටයිල් තිබුනේය. මේ ටින්කිරි වලින් හදන තේ එකෙට, සීනී දාන්න ඕනා නැතිය, ඒත් ඉතින් මලක් ගහපු වෙලාවට නම්, සීනීත් එක්ක ගත්තාම තව්තිසා දිවිය ළෝකෙටත් එහා ළෝක වලටම යන්න පුලුවන්ය.

ඊට පස්සෙ ටිලි.... ටිලි... ටිලි... ගාලා හැඳි ගානවාය. ඇත්තටම හැඳී ගානවා නොව හැඳි ගහනවාය. "තේ ගහනවා" කියන්නේ මේකටය, අපි වගේ වැදගත් නොවන, වනචර උන් නම් තේ ගහනවා කියන්නේ වෙන දෙයකටය. මේක නියම හෝටලයක සංකේතයක්ය. ඕන ලොකු හෝටලේක උනත්, පාරටම ඇහෙන්න හැදි පාර දෙන්නේ, ඉස්කෝලේ බැල් එක ගහනවා වාගෙය. ඊට පස්සේ, එක වගේම බෙලෙක් කෝප්ප දෙකෙන් "යාරේ" දානවාය.

ඔය පැත්තේ පින්තූරේ තියෙන්නේ, එහෙම තේ යාරයක් දාන හැටිය. ඕකෙන් වැඩ දෙකක් වෙනවාය. බොයිලේරුවේ උදේ ඉඳන් රත් උන වතුර ටික, කටට ගන්න ගානට නිවෙනවාය. අනික අයිස්ක්‍රීම් එක වගේ පෙන එනවාය. ඒක, ඊට පස්සේ දාන්නේ "අශෝක ග්ලාස්" එකටය. මෙහෙම ටින් කිරි තේ දෙන තැන්, අදටත් සමහර පැතිවල තියෙනවාය. ඕකට කියන්නේ "මලයාලම් ඉස්ටයිල්" කියාය. 

මෙහේට ආපු කප්පරක් උන් අස්සේ, ආපු මලයාලම් කාරයෝ, මලයාලම් ගුරු කමුත් එක්ක, මේ වැඩේ අපේ උන්ට පුරුදු කරන්න ඇතිය. ඉන්දියාවේ නම් කේතල් වල තේ දා ගත්ත කොල්ලෝ අදත් පාර වල් වල ඉන්නවාය. ඒ උනාට අපේ රටේ දැන් මේවා වෙනස් වෙලාය.

ඔය තේ එකේ, එක එක වර්ග තියෙනවාය. "ටී"  කියන්නේ කිරි සහ සීනී දාපු තේ වලටය. "ප්ලේන් ටී" කියන්නේ, සීනී දාපු කහට වලටය, "කිරි කහට" කියන්නේ, සීනී නැතුව, තේයි කීරියි දාලා දෙන එකටය, "කහට" කියන්නේ මුකුත් නැතුව තේ විතරක්ය, "ස්ට්‍රෝන්ග් ටී" කියන්නේ ටී එකේම, කහට වැඩියෙන් දාපු එකටය.

සාමාන්‍ය හෝටලේකට ගිහින්, ඕකක් ඉල්ලුවාම, බොන්නේ මොකක්ද කියලා මුලු හෝටලේම දැන ගන්නවාය. මොකෝ වේටරයා ඕඩර් එක දෙන්නේ, වෙන්දේසි පොලේ පීකර් එකෙන් දෙනවා වගේ, කෑ ගහලාය. බිල් ගෙන්නේ නැති කඩේකට ගියොත්, බිල ගෙවන්න යන කොට කාපු ඒවා ටිකත් අරූ කියනවාය.

ප්ලේන්ටියයි වඩේ එකයි විතරක් කෑවානම්, පට්ට නෝන්ඩිය. ටයි එකේ ගෞරවය, භෞමික අඛන්ඩථාවය, ඒකිය භාවය, ඔක්කෝම නැති වෙලා යනවාය. එහෙම ඉතින් ටයි එකේ ගෞරවේ බේරගන්න නම්, ඒ ජාතියේ ඒවාට යන්න වෙනවාය. නැතුව පෙට්ටි කඩ අස්සෙ රිංගුවොත් සුද්දාටත් එක්කම අගෞරවයක්මය. ඒ උනාට ඉතින් ටයි එකත් දාගෙන ඕවා අස්සෙ රිංගන්නෙ සිකැරට් එකේ රස දන්න උන්ය.

අද තේ එකක් බොන්න ගියාම, ගෙදරවත් දේ හදන්නේ නැති එකාටත්, තේ එක හදාගෙන බොන්න වෙලාය. මේක මල වනයක්ය, මම ඔය ෆයිව් ඉස්ටාර් වල, තේබොන්න යන්නේ නැත්තේ ඒ නිසාය. දැන් මේ දෙකයි පනහේ කඩවලත්, තේ මල්ලක් දාපු, පිරිසී කෝප්පයක් උස්සගෙන එන තැන්වල, මම නම් කියන්නේ. තේ එක හදලා දෙන්න බැරිනම් තේ එපා කියලාය.

කොහොමත් අපේ අම්මා හදන තේ එක රහ නැතිය. ඒ අපේ ගෙදර අය, කහට බොන්න අකමැති නිසාය. මට අර "කළු කඩේ" ටින් කිරි තේ එක නැගලා ගියේ ඒ නිසාය. අනික ඒ කාලේ "සත පහක්ද" කොහෙද උන, ටී එකට මුදලාලී මාමා සල්ලි ගත්තේ නැතිය.

මම "හරියගේ" ගෙදෙට්ට ගොඩවෙන්න කලින්, මාමාගේ කඩෙන්, ටී එකක් ගහලා යන්නේ, වං හුං කතා කර බලෙන් දෙන නිසා මිසක්, පෙරේත කමකට නෙමේය. සමහර වෙලාවට, මාව දැක්කේ නැත්නම්, මුදලාලි මාමා දකිනකන්, කඩේ ඉස්සරහා, එහෙට මෙහෙට ගියෙත්, හිත හොඳ මනුස්සයෙක් එක්ක කතා නොකර යන සිරිතක්, බෙන්තර ගඟෙන් එහා පැත්තේ උන් ගාව නැති නිසාය.

වාසනාවට ඒ පදමටම තේ හදන්න අපේ නෝනාට පුළුවන්ය. එයාටත් බැරි උනානම් මට වෙන්නේ "සෙස්ටා" එකේ තේ හදන මිසී ගෙදර උස්සගෙන එන්නය. ඒ මිසී, මිනියක් ගහලා, කාරෙකෙන් බැහැලා, තේ පැකට් එකක් ගන්න යන කොට, අර මලක් ගසා, ටින්කිරි තේ එකක් බිව්වා වගේ සුන්දර හැඟිමක් සිතට එන්නේ....

නැහැදිච්ච කමකටද, පරම්පරාවේ ලෙඩක් නිසාදෝයි, හරියටම කියන්න දන්නේ නැතිය. කාලේකින් ඇඩ් එකක දැක්ක, අපේ රටට ආඩම්බරයක් හිතෙන කෑල්ලක්ය. රිචී කෝපී එකේ "පට්ට" කෑල්ලත් ඒ වාගෙමය. ඒයා නම් ටෙලි නාට්ටි වලත් ඉන්නවාය.ටින් කිරි කතා වස්තුව මෙතනින් නිමා වන්නේය.

ටින් කිරි එකක් ගෙනත් කහට වැඩියෙන්, සීනී අඩුවෙන් දාලා, ටින් කිරි තේ එකක් බීලා, මම කියන්නේ බොරුදයි, ඔහේලාත් බලාගත්තට මගේ අවුලක් නැතිය. ඉතුරු වෙන ටින් කිරිත්, ඕන තැනක අතුල්ලා ගත්තාටත්, අමනාපයක් නැතිය. ඒ නැතත් අපේ ආදරණිය මහින්ද මහත්තයා දෙන ටින් කිරි පාර ඉහටත් උඩින් ඇතිය.