ඇඟිලි ගැහිල්ල. (18+) - Fingering (18+)

ඇඟිලි ගැහිල්ල කියා කියපු ගමන වල් කොල්ලෝ හිතන්නේ වෙන දෙයක්ය. කෙල්ලෝ නම් එහෙම හිතන්නේ නැතිය. මොකෝ ලංකාවේ කෙල්ලෝ වල් නැතිය. හරිම අහිංසකය, සුකොමාලය, ළඳ බොළඳය, දහම් පාසල් යනවාය, සන්ඩේ ස්කූල් යනවාය. සිලුත් ගන්නවාය. පති දම් රකිනවාය. ඒ නිසා එයාල ඔය පර කොල්ලෝ වගේ සිතන්නේ නැතිය. කොල්ලෝ නම් කියන්නේ එයාලා, එයාලාගෙම ඒවාට ඇඟිලි ගහගන්නවා කියාය. ඒ උනාට ඒ කතාව බොරුය. ඒයාලා අනුන්ගේ ඒවාට නම් ඇඟිලි ගහන්න හරිම දස්සය. එහෙමම කිව්වොත් එයාලා මාත් එක්ක තරහ වෙනවාය. බේදයක් නැතුව අපේ අය අනුන්ගේ ඒවාට ඇඟිලි ගහන්න නම් හරිම මනාපය.

ක්‍රිකට් ක්‍රීඩාවේත් එහෙමය. ක්‍රිකට් ගහන්නේ බැට් බෝල් වලින් උනාට. ගහන උන් කියන්නේ, උන්ට ගේම ගහන්න නොදී, වෙන උන් ඇඟිලි ගහනවා කියාය. මෙහෙම වැඩියෙන්ම ගහන්නේ දේශපාලුවෝය. උන් දන්න මගුලක් නැති උනාට එකම දෙයක් දන්නවාය. ඒ හොරකම් කොරනා එකය. හැමතැනම හොරකම් කොරනා නිසා, කෙල්ලෙක්, පින්සිපොල්ට ජීවත් වෙන්න සල්ලි දෙන්න, පොල් වගේකුත් හොරකම් කරලාය. ගමේ උන් නම් කියන්නේ, කෙල්ල හැමදාම කලේ ඕය වැඩේ කියලාය. අපිට කියන්න තියෙන්නේ, රටේම උන් හොරකම් කරන කොට, කෙල්ල පොල් ගෙඩියක් දෙකක් හොරකම් කොලාම, මක්කා වෙනවාද කියාය. පාසල් වලින් කියන්නේ බල්ලෝ මරලා ගරි සල්ලි ගෙනෙන් කියලාය. නොගෙනාපු එකා කොන් වෙන නිසා, කුඩු විකුනලා හෝ ඉස්කෝලේ සායම් ගෑවේ නැත්නම්, දෙමව්පියන්ගේ සායම යනවාය.

විමල් උන්නෑහේත් මේ දවස්වල මුදල් අමාත්‍යංශෙ ලේඛම්ගේ එකේ ඇඟිල්ල ගහනවාය. මයික් එකක් අහුවුනොත් ආර්ථික ඝාතකයෙක් ගැන කියනවාය. ඒ පාර බටහිර කුමන්ත්‍රණ කාරයා අන්තරස්දාන වෙලාය, කොහේ ගියාදයි කියා හොයා ගන්න නැතිය. ඔය ආර්ථික ඝාතකයා ගෙදර යැව්වේ, දියවන්නා ප්‍රේම පුරාණයේ පෙම් කුමරා, සරත් සිල්වා මහතාය. ගේම ඇද්දේ මාක්ස්ගේ මල්ලි කෙනෙක් වන වාසුදේව සහෝදරයාය. ගෙදර යවපු නයා ගෙනත්, මහින්ද මහත්තයා රෙද්ද අස්සේ දාගත්තාම එකෙක්වත් කට ඇරියේ නැතිය. දැන් අයි එම් ඇෆ් එකෙන් තවත් දෙන්න බෑ කිව්වාම නයා මරන්න පොලු අතට අරගෙනය.

මේ යකා මෙළෝ රහක් නැති එකෙක් කියා අප කියන්නේ අද ඊයේ සිට නෙමේය. චන්ද්‍රිකා නෝනාත් එක්ක අවුරුදු 14 රට කෑවේ මේකාය. ප්‍රේමදාස මහත්තයා ගාව නම් භාන්ඩාගාරේ බලාගන්න සුපිරිම බඩුවක් උන්නේය. ඒ පාස්කරලිංගම්ය. යුද්ධ තියෙන අස්සේත් රටේ ප්‍රධාන් ආදායම් මාර්ගය ඇගළුම් බවට හැරෙව්වේ දෙන්නා එකතු වෙලාය. මුන්නැහේ නම් කල මෙළෝ දෙයක් නැත්තේය. ඔය වැඩේ කරන්න මුන්නෑහේ ඕනා නැතිය. ඉංගිරිසි දන්නවානම් ගිරාදුරු කෝට්ටේ සමෘධි බැංකුවේ මැනේජර මහත්තයාටත් ඔය ජෝබ් එක කරන්න පුළුවන්ය. මම නම් මෙයැයිට කියන්නේ භාන්ඩාගාරේ ලේඛම් කියලා නෙමේය. කෙඩිට් ඔෆිසර් කියලාය. මොකෝ මැනේජර් ඇපෘ කලාම, ණය නිකුත් කරන්නේ ක්‍රෙඩිට් ඔෆිසර් නිසාය.

ණයක් දෙන කොට ප්‍රොජෙක්ට් රිපෝට් එකක් ඉල්ලනවාය. එතකොට ඒවාට ටයිම්, ටාගට් එකක් තියෙන්න ඕනාය. ඔය අනම් මනම් ගොඩක් නැතුව කසාද බඳින්නවත් ලෝන් එකක් ගන්න බැරිය. විමලේට් දුන්නාද නුදුන්නාද කියා අපි දන්නේ නැතිය. ඒත් පෙනෙන්නේ නම් මුකුත්ම දීලා නැතුව වගේය. එක්කෝ දුන්න ඔක්කෝම වල් කොල්ලෝ කියනවා වාගේ, එයාගේ නිවාස ප්‍රශ්ණේ විසඳන්න යෙදෙව්වාද කියන්නත් දන්නේ නැතිය. කොහොම හරි එයා ගැන කියන්න තියෙන්නේත්, හදපු එක ගෙයක්වත් අපි නම් දැකලා නෑ කියාය. මොකෝ ප්‍රේමදාස මහත්තයා ගෙවල් හදපු හැටි, අපි වගේම එයත් දැකලා තියෙන නිසාය. මක්කා නැතත්. ප්‍රේමේ හදපු ගෙවල් වල තීන්ත ටිකක් නම් ගාලා දුන්නේය. ඒ නිසා එයාගේ සායම යාන්තම් බේරා ගන්නට හැකිද කියා බලන්න වෙන්නේ ඊළඟ මනාපේදිය.

ආර්ථික ඝාතකයෙක් ඉන්නවානම් අපට කියලා, මයික් කාලා පලක් නැත. මහින්ද අයියාට ගිහින් කීවානම් අහකය. ඕනෑනම් සපෝට් එකට වාසු අයියයි, ඩීව් අයියයි, චම්පික අයියයි උනත් එක්ක ගෙන යන්න ඇහැකිය. ලොක්කා දකුණේ නිසා යනකොට බල මාළු ටිකකුත් ඇන්න ගියානම්, එතුමාගෙත් මොලේ පෑදෙන්නත් ඉඩ තියෙනවාය. ඒත් එතුමාට බල මාළු කවන්න ගිහින්, මුන්නැහේලාගේ උගුරේ කටු හිර උනොත් නම් අපට කියන්න එපාය. මොකෝ බර්ටි ප්‍රේමලාල්ලාට, ෆව්සිලාට උනෙත් ඒක නිසාය. අනික ජපනා කන්නේ බල මාළු නෙමේය. උන් කන්නේ ටූනාය. ටූනා කියන්නේ කෙළවල්ලාටය. සමහර විට විමල් සහෝ කන්නේ කෙලවල්ලෝ වෙන්න ඇහැකිය. ඒත් අනික් උන්ට බල මාළු කවන්න යන්නේ, උන්ගේ අර්ෂ්ශ් අමාරු තවත් වැඩි කරන්නදැයි කියන්න දන්නේ නම් නැත.

ඒ කෙසේ වෙතත් පාර්ලිමේන්තුවේ ඉන්නා ඔක්කෝටම ගෝල්ඩන් සිරප්, හැම්, බේකන්, කෝන්ෆ්ලෙක්ස්, උඩින් පුඩින් කවනවා වෙනුවට, කෙලවල්ලෝ ටිකක් කැව්වානම් හොඳය. හැබයි කවන මලදානයක් හලාල් කරලා කවන එක කතා නායක තුමා ගේ වගකීමය. ටූනා ගේ බෙල්ල කපන්න, සමස්ත ලංකා උලමාවෙක් ගෙනාවාට, බොදු බල සේනාව මල පන්නා ගන්න ඕන නැතිය. මොකෝ මුස්ලිම් කස්ටිය ඌරා නොකෑවාට, කෙලවල්ලා කන නිසාය. මෙච්චර කලක් දුන්නේ නම් බල මාළු බව මට ෂුවර්ය.මොකෝ ඒ තරමට එයාලාට අර්ෂස් නොහොත්, පස්ස කහන ලෙඩේ තියෙන නිසාය. හැබයි මාළු කාරයෝ නම්,  නොදන්න එකාට කෙලවල්ලෝ කියා දෙන්නේ නම්, බල මාළුය. නිදහස ගත්ත දා ඉඳන් හැම එකාම අපිට කෙලවල්ලෝ කියා, දී තිබෙන්නේ බල මාළු බව නම් නොකියා සිටිය නොහැකිය. බලාගෙන ගියාම මුන් ඔක්කෝම හොර මාළු කාරයෝය.. ඒ වගත් මෙසේය................

ප: ලි:
ලියන්න ගියේ ඇඟිලි ගැහිල්ල ගැන ජෝක් එකක්ය. 18+ දැම්මේ ඒ නිසාය. අන්තීමට ලිය උනේ වෙන මළදානයක්ය. ජෝක් එක ලබන සැරේ දෙනවාය. පින්තූරත් වෙනස් කරන්න උනේය. ඒ ගැන තරහ අවසරය....