සිරිසේනගේ අපාය සහායක මිත්‍රයෝ - Friends you should get rid of

එලොවටත් නැති මෙලොවටත් නැති ලෝක මහා බෞද්ධ සම්මේලනයක් කියා එකක් මේ රටේ තිබ්බාම මුළු ලෝකේම ඒ දෙස බලා සිටිනවා කියා කිව්වාට, එහෙම එකක් අපි නම් ඉන්ටර්නැෂනල් වල නිව්ස් වල නම් දැක්කේ නැතිය. කෙසේ වෙතත් විප්ලවයකින් පත්වන ආන්ඩුවකට හැර (ජනවාරි 8 විප්ලව වාගේ ඒවා නම් නොවේ) බුද්ධාගාම හා කහකඩ සිවුරුකාරයින්ගේ සප් එක නැතිව ආන්ඩුවක් ගෙන යන්න බැරි ගානට, දැන් හැම පක්ෂේ එකාම පළතුරු වට්ටියකුත් උස්සගෙන පඩයක් ගියත් දුවන්නේ මහා නායක උන්නාන්සේලා වෙතය. උන් නාන්සේලා ඇවිල්ලා ජනතාවට ආදරේ පිරිසක් නෙමේය. එහෙම උන් නාන්සේලා නම් "සුන්දර නුවර" වායූ දූෂණ නඟරයක් වෙද්දි පාරවල් වසාගෙන ගෙම්බර් දාන්නේ නැතිය.

මේ සම්මේලනේදී මරු මරු රස කතා සෙට් එකක්ම කිය උනේය. රනිල් උන්නැහේ නම් කිව්වේ ,අනාගතේ ඇති වන ව්‍යසනයන්ට ලොව පුරා බුද්ධාගම වැපිරුවාම ප්‍රශ්ණ ඔක්කෝම නැති වෙනවා කියලාය. එයා දන්නේ නැති උනාට, බුද්ධාගම වැපිරීම කෙසේ වෙතත්, ලංකාවේ ඉස්ලාම් තලෙයිබාන්කරණයක් නම් නැගලාම යන බව සම හරක් විට උන්නැහේ දන්නේ නැතිවා වෙන්නට පුළුවන්ය. ඒවා මහා නායක යක්කුන්ටද පේන්නේ නැති අතර, ඒවා පෙන්නේ නානසාරලා වාගේ අයට ඉතරමය. ඒත් නානසාරලාත් බල්ලෝ කරලා දාන්න තරම් අරුන් බලවත් උනේය. ඒ පැත්ත එහෙමය.

කවදත් සිරා ටෝක් දෙන සිරිසේන උන්නැහේ කිව්වේ බුද්ධාගමේ සියළුම ප්‍රශ්ණ වලට උත්තර තියෙනවාය කියලාය. සමහර විට එහෙම තියෙනවාත් ඇතිය. ඒත් ඒ තියෙන දේවල් එයා දන්නවාද කියා සැකයක් ඇති වන්නේ, උන්නැහේ නානා නෑම බලාගෙනම ඉන්න බැරි හන්දාය. ඒ හන්දා උන්නැහේට පරලෝ වශයෙන් කෙසේ වෙතත්, මෙලෝ වශයෙන් පටිසන් දිය හැකි ඉල්ලාගෙන කෑමක් ගැන කියන්නට මේ පල් හෑල්ල වෙන කොරනවාය.

බුද්ධාගමේ තිබෙනා එක එක සූත්තර අතරේ, සිඟාලෝවාද සූත්තරේ කියා එකක් තියෙනවාය. ආන් ඒකේ ඇසුරට නොගත යුතු මිතුරන් හතර දෙනෙක් ගැනද, ඇසුර කළ යුතු කල්‍යාණ මිතුරන් හතර දෙනෙක් පිළිබඳවද කරුණු දක්කලා තියෙනවාය. අද මෛත්‍රිපාල සිරිසේන රෙද්ද අස්සේ දාගෙන පට්ට ආතල් එකක් ගන්නේ, මේන් මේ කල්‍යාණ මිත්තරයන් නොව, නොම්මර එකේ කාළකන්නි හතුරන් සෙට් එකක්ය. එම කාළකන්නි මිතුරන් සතර දෙනා නම්,

1. අඤ්ඤදත්ථුහර

2. වචීපරම

3. අනුප්පියභාණී

4. අපාය සහාය යනුවෙනි.

අඤ්ඤදත්ථුහර

විවිධ ලාබ ප්‍රයෝජන බලාපොරොත්තුවෙන් පැමිණෙන මිතුරන් ය. නූතන සමාජයේ මෙවැනි පුද්ගලයන් බහුලය. ඔවුන්ගේ අපේක්‍ෂාව විවිධ තනතුරු, මිල මුදල්, ඉඩකඩම් ආදී තම අවශ්‍යතා ඉටු කර ගැනීමේ පරමාර්ථයෙන් යුතුව ඇසුර පතයි. මෙම පරමාර්ථ ඉටු කර ගැනීම සඳහා යාමේ දී විවිධ දූෂණ, දේපොළ හානි, ජීවිත හානි පවා සිදුවීමට පුළුවන. මෙවැනි මිතුරන් හා සබඳකම් පැවැත්වීම මගින් තමාද අනාරක්‍ෂිත තත්ත්වයට පත්වීම වැළැක්විය නොහැකි ය. පුද්ගල හා සමාජ සංවර්ධනයක් අපේක්‍ෂා කරන්නේ නම්,මෙසේ ලාභ අපේක්‍ෂාවෙන් ඇසුර පතන්නන්, දුරු කොට, හුදකලාව වුව ජීවත්වීම යහපත්වේ.

එදා මහින්ද අගමැති කරන්නට පවා සප් එක දී අද සිරිසේනට දිරච්ච ලණු දෙන උන් සියල්ලන්ම මේ ඝනයට අයත් වේ.  විශේෂයෙන් සිරිසේනගේ පිහිටෙන්ම ජාතික ලැයිස්තුවෙන් රිංගු පිංගුත්තරයලා.

වචීපරම

මෙම ගණයට අයත් වන මිතුරන් ඕනෑම කටයුත්තකදී වචනයෙන් පමණක් සුහදව සංග්‍රහ කෙරේ. තම මිතුරා වෙනුවෙන් යම් අවස්ථාවක් උදා වූ විට හොඳයි සලකා බලන්නම් කිසි දේකට බියවන්න එපා. ඕනෑම දේකට මම ඉන්නවා. ආදී වශයෙන් පවා රැවටීමට සලස්වයි. ලාබ ප්‍රයෝජනයක් අත්වුවහොත් ඉන් උපරිම ඵල විඳ සතුටට පත් වෙයි. වචී පරම ගණයට අයත් වන මිතුරන් එදා මෙන්ම අද සමාජයේ ද බහුල වශයෙන් දැකිය හැකි ය. මෙවැනි මිතුරන් ඇසුරින් දුරුකිරීම බුද්ධිමතාගේ ලක්‍ෂණයකි.

අද සිරිසේන ලඟ ඉන්නා හැම සිරි ලංකා කාරයාගෙම හඳවතේ ඉන්නේ මහින්දය. ඝෝඨා හෝ බැසිල් හෝ වුවද උන්ට කම් නැත. ඊළඟ චන්දයේ මහින්ද පාර්ෂවයෙන් ඉල්ලන ඕන එකෙක් සමඟ මුන් පෙල ගැසෙනවාමය. 

අනුප්පියභාණී

මිතුරා කරන හොඳ දේවල් මෙන්ම නරක දේවල් ද අනුමත කිරීම අනුප්පියභාණිගේ ස්වභාවයයි. එය යහපත් කල්‍යාණ මිත්‍රයකුගේ ලක්‍ෂණයක් නොවේ. නිරතුරුවම සමජයට අවශ්‍ය වන්නේ හොඳ දේ අගය කරමින් ඒ අනුව ඹ්වත්වන මිනිසුන් ය. නූතන සමාජයේ බහුතරය අවංක මිතුරන් යැයි විශ්වාස කොට කරන හොඳ දේ මෙන්ම නරක දේවල් ද වේ. මින් නරක දේ අනුමත කිරීම තුළින් තමා හොඳ වූවත් එය පිරිහීමට ලක්වනු ඇත. අනුප්පියභාණි මිතුරන් ඇසුරින් දුරුකොට හුදකලාව ජීවත්වීම වුව යහපත් වේ.

නමුත් සිරිසේන ළඟ ඉන්නා උන් මීටත් අන්ත උන්ය. උන් හොඳ දෙයට හරස් කපනා අතරේ, නරක දේට ෆුල් සප් එක දෙති. සයිටම් වලදි ඩොකාලාගේ පාර්ෂවයට මෙන්ම වර්ජන වලදි වර්ජකයන්ගේ පැත්ත ගැනීම මීට උදාහරණය. එනයින් උන් ආන්ඩු විරෝධීන් මෙන්ම සිරිසේන විරෝධීන්ද වේ. 

අපාය සහායක

මිතුරු වෙසින් සිට මෙලොව පරිහානිය මෙන්ම පරලොව පරිහානිය උදාකරවන පුද්ගලයා අපාය සහායක ගණයට වැටේ. මත්කුඩු, සුරාව, සූදුව, පරස්ත්‍රී සේවනය ආදී දුසිරිත්වල යෙදෙන හෝ තම මිතුරා ද ඊට යොමු කරවයි. පොළඹවයි. නොදැනුවත්වම මෙයින් සිදුවන්නේ මහා විපතකි. සමස්ත ජීවිතයම අඳුරට හෙළා දැමීමකි. එබැවින් අපාය සහායක මිතුරු, මිතුරියන්ගෙන් වෙන්ව ජීවත්වීම යහපත් වේ.

අපාය සහායක මිතුරු මිතුරියන් සමාජයේ සභාපති මහින්ද මහත්තයාය. උන්නැහේ ළඟ ඉන්නා තරමක් උන්නේ එහෙම බඩුය. නමුත් වාසනවාකට මෙන් ඉන් අති බහුතරය අදටත් ඉන්නේ මහින්ද මහත්තයාත් එක්කමය. සුළු පිරිසක් පමණක් බිස්නස් ගෙන යාම සඳහා සිරිසේන ලොක්කා සමඟ උන්නත්, ගේමක් ආපු ගම උන් හිටගන්නේ පක්ෂයේ සභාපති සමඟ නොව අපාය සහායක සංගමයේ සභාපති සමඟය. 

මෙසේ ඇසුරින් වෙන් කළ යුතු, මිතුරු වේශයෙන් පෙනී සිටින මිත්‍ර ප්‍රතිරූපකයත් පිළිබඳ මනා පැහැදිලි කිරීමක් කරන, සිඟාලෝවාද සූත්‍ර දේශනාව, ඇසුරට සුදුසු යහපත්, කල්‍යාණ මිතුරන් සිවු දෙනෙකු, පෙන්වා දෙනු ලැබ ඇත.

1. උදව් උපකාර කරන උපකාරක මිත්‍රයා

2. දුක සැප දෙකේදීම කිසිදු වෙනසක් නොමැතිව එක්ව සිටින සමාන සුඛ දුක්ඛ මිත්‍රයා

3. දියුණුවට අත හිත දෙනා අත්ථක්ඛායි මිත්‍රයා

4. කරුණාවන්තව හා අනුකම්පාවෙන් ක්‍රියා කරන අනුකම්පක මිත්‍රයා යනුවෙනි.

මෙවන් මිතුරන් උන්නැහේට සිටිනවාද, සිටින්නේද, සිටියා නම් අද ඔවුන් තමන් සමඟ සිටින්නේද යන්න ගුලි ගිලිනා හා දිරච්ච ලණු කන වේලාව මේ ගැන සිතීමට යොමු කිරීමෙන් යහපතක් උදා වන්නේ අපට නම් නොව උන්නැහේටමය.

කොහේවත් සිට ආ හිඟන ජෝන් සෙනෙවිරත්නලාට, මහින්ද අමරවීරලාට, මහින්දගෙනුත් ගුටි කෑ සුසිල් ප්‍රේමජයන්තලාට තැන දෙන්නට, රාජිතලාට කෙලින්න යනවා නම් සිරිසේනට වෙන්නේත් භාරතලාට ගේම දීපූ මහින්දට උන දේ මිස වෙන මොනවත් නෙමේය. උතුරු මැද පලා බබා පෙරලා දුමින්දගේ තාත්තා ළඟ උන් බොඩි ගාඩ්ලාට පිස්සු කෙලින්න  දී උන් දුමින්දට අරිනකන් බලා ගෙන ඉන්නේ නම් ඒවා අමු කැත වැඩය. ජීවිත පරදුවට තබා උන්නැහේ එක්ක එලියට බැස්සේ ජෝන් බාස්ලාවාත් අමරවීරලාවත් ඩිලාන්ලාවත් සුසිල්ලාවත් දයාසිරිලාත් නොව රාජිතලා හා දුමින්දලා පමණි. 

මුල අමතක වන එකාට කොහෙතම පැවත්මක් ඇත්තේ නැති බව අතීත කතා වල නොව වත්මන් කතා තුලත් අගේට පෙන්වා තිබෙනවාය. මහින්ද සම්ඟ ගොස චන්ද්‍රිකාට පුක පෙන්වූ උන් අද චන්ද්‍රිකා ලඟ ඇඹරෙන හැටි දැක්කාම අපට දුක හිතෙනවාය. ඒවාට කියන්නේ මෙලෝ වශයෙන් පටිසන් දෙනවා කියලාය.

කොහොමත් සිරිසේනට සිරි ලංකා නිදහස් පක්ෂය සමඟ අනාගතයක් ඇත්තේ නැත. ඒ නිසා ඔය පක්ෂයේ උන් සමඟ ජෝගි නටනවාට වඩා කළ යුතු වන්නේ තමන් බලයට පත්කළ බලවේග හා පක්ෂ සමඟ හොඳහිත පවත්වාගෙන ගොස්, නැවතත් පොදු අපේක්ෂයා ලෙස ඉදිරිපත් වීම පමණි. නැත්නම් උන්නැහේට වෙන්නේ ඇප නැති වීම පමණක් නොවේ ඇටත් හොයා ගන්නට නැති වීම පමණි.

“න භජේ පාපකේ මිත්තේ

න භජේ පුරිසාධමේ

භජේථ මිත්තෙ කල්‍යාණේ

භපේථ පුරිසුත්තමෙ

- ධම්මපදය -

සමහර උපුටා ගැනීම්,

http://www.lakehouse.lk/budusarana/2009/03/10/tmp.asp?ID=vision07