"දිනමිණ" පත්තරෙත් විනාසයි - End of the "Dinamina" News Paper

ටපලා ටපලා, සෝමවාහිණියේ "මුල් පිටුව" කියවපු සභාපති තුමා, පත්තර මහගෙදරට ගොඩ උනේ, මල පැනලාය. පැනිල්ල කොච්චරද කියනවා නම්, ලේක් හවුස් එකෙන්, මල් පත්තර දහයක් විතර ගහගන්න පුළුවන් සයිස් එකටම, මල, හොඳ එකෙන්ම පැනලා තිබුනේය.

වෙනදාට, කාටුන් වලින් කස්ටියටම කින්ඩියක් දමා, මල් කුමාරයා වාගේ කන්තෝරුවට ගොඩ වෙන සභාපති තුමා, මල පැනලා ඉන්නවා දැකපු ඔක්කෝම උන්, "ගුඩ් මෝනින් සෑර්...." ගෑම පැත්තක තබා, හෙමිහිට මාරුවෙලා ගියේ, ජනාධිපති තුමා මල පැන්න වෙලාවට, ඇමතිලා තම තමන්ගේ ආසනේටම ගිහිල්ලා නවතිනවා වාගේය.

පුටුවට දැනෙන්නම, පුටුවේ දඩාස් ගා ඉඳගත් සභාපති තුමා, සැකට්‍රි නෝනාට කිව්වේ, "අන්න අර ගාමිණි ජයලත්ට එන්න කියනවා...." කියාය. "සෑර්.... ගාමිණි ජයලත්..... කිව්වේ.....???", කියා අහපු සැකට්‍රි නෝනාට, සභාපති තුමා කිව්වේ අර "දිනමිණේ" මහ එකාට එන්න කියනවා කියාය.

මෙළෝ හසරක් නොදන්න දිනමිණ කත්තුරු තුමා කාමරේට ගොඩ උන ගමන්ම, ඈඳී ගන්නවත් නොකියා, සභාපති තුමා ඇහුවේ, "තමුසේ හදන්නේ "රටේ ජාතික පුවත් පත" වහලා දාන්නද ඕයි යන්නේ....???", කියාය.

"ඇයි සෑර්...? අන්තරේ ඒවුන් වත් සෑර්ට තර්ජනයක් දැම්මාද...? මම, ඕන නම් සමාව ඉල්ලලා හෙට හෙඩිම දාන්නම්...." කිව්වේ, "මහපොළ මුදල් අන්තරේ කොල්ල කාලා" කියා, සංසාරේදි වෙන්න බැරි, අතේ රෝලක් හැඩිමට දාපු එක මතක් වෙලාය.

"ඕකුන් 88-89 ත්, ලේඛවුස් එකට ඔහොම තර්ජන බර්ජන කොරලා, කොල කෑලී අරවා මේවා එව්වාට, අපි ගාඩුත් දාගෙන, ඕකුන්ට පොරි හැලෙන්න දුන්නා සෑර්......" කියා කිව්වේ, මල පැනලා තියෙන්නේ එහෙම තුන්ඩු කෑල්ලක් නිසා ලොක්කා බය වෙලා වෙන්න ඇති කියා හිතා ගෙනය.

"ඒ මළදානයක් නෙමෙයි ඕයි...., කවුද පත්තරෙට මේ "හින්ගල බ්ලොග් පිටුවක්" එල්ලනෙයි කිව්ව හරකා...? තමුසෙ දන්නවද අඩු ගානේ බ්ලොග් කියන්නේ මොනවද කියලා....?"

"මම දන්න බොගක් නම් නෑ සෑර්...... මගේ බොග නම් උදේ දලා ආවේ..... මටත් ඕක හරියට කොර ගන්න බැරි උනාම මල නම් පනිනවා තමයි..."

"ඒ බොගග් නෙමෙයි ඕයි... මේ කතා කරන්නේ බ්ලොග් පිටුව ගැන.... තමුසෙ දන්නෙ නැද්ද මොකාද මේක කොරන එකා කියලා...? තමුසෙත් හරියට අපේ අගමැති තුමා වගේනේ.. එයා දන්නෙ නැතුව, සැකට්‍රිලා ලියුම් දෙනවය කියන්නේ..."

"අනේ සෑර්.... ඒක නම් මගේ වැඩක් නෙමෙයි.... අර නලියගේ වැඩක් නේ....."

"කවුද ගාමිණී.... නලියා කියන්නේ.....?"

"අපේ ප්‍රවෘත්ති කත්තුරු තුමා  සෑර්....".

"කවුද නලියා....... මට මතක නෑ ඕයි.. කී දෙනෙක් නම් කියලා මේකේ ඉන්නවද.......?"

"සෑර්...... අර... තට්ටෙට කන්නාඩියක් දාලා........ අත් දිග කලිසන් ෂර්ට් ඇඳලා..... මහින්ද මහත්තයගෙ ලැප් එක කරේ දාගෙන යන පොර......"

"ආ... හරි හරි.. යාන්තම් මතකයි.. මම හිතුවේ සිවුර ඇරපු පොරක් කියලා.. එහෙනම් තමුසෙ ගිහින් ඒ යකාට එන්න කියනවා...."

"තාම ඇවිල්ලද දන්නේ නෑ..... කොච්ච්යේ එන පොරනේ සෑර්.... හැමදාම ලේට් වෙලා ඇවිත්, කොච්චි ඩයිවර්ලගෙ අම්මලට බනිනවා...... ඇත්තද බොරුද කියන්නේ දන්නෙ නම් නෑ..... ඇවිල්ලා උන්නොත් එන්න කියන්නම්...."

ටික වෙලාවකින් සභාපති තුමාගේ සැකට්‍රී නෝනා කිව්වේ, "සෑර්..... නලීන් දිල්රුක්ස කියලා කෙනෙක් ඇවිත් ඉන්නවා, එන්න කියන්නද.....? කියාය..

"ආ එන්න කියන්න..... මමත් මේ ඕකා එනකන් තමා ඉන්නේ...."

"සෑර් මට එන්න කිව්වද..?"

"ඔව් එන්න කිව්වා තමා..... තමුසෙට මොළයක් තියෙනවද ඕයි....?"

"තියෙනවා සෑර්..... හැබයි ඒක අල්මාරියේ දාලා තියෙන්නේ...... ගෙදරදි තමයි පවිච්චි කරන්නේ....., මම හිතන්නේ සෑර් උනත්, මෙහේට එනකොට ඒක අල්මාරියේ දාලා එනවා ඇත්තේ...... පරෙස්සමට...."

"හා...... හා.... ඒවලින් වැඩක් නෑ.... මොකක්ද අයිසේ මේ කොරලා තියෙන්නේ......?"

"ඇයි සෑර්......?"

"මොකක්ද මේ "සින්හල බ්ලොග්" ද මොකක්ද මළදානයක් පටන් අරගෙන තියෙන්නේ..... කවුද ඒක පටන් ගන්න කියලා තමුසෙට කිව්වේ.....? අනික මේ මක්කද මේ බ්ලොග් කියන්නේ....බල්ලෙක්වත් බලන එකක්ද ඕයි..?"

"ආ.... සෑර්.... ඒක නම් මම තමයි පටන් ගත්තේ....., ප්‍රබුද්ධි රණසිංහ තමයි සංස්කරණය.... මේ සෑර්.... අන්තර්ජාලේ තියෙන බ්ලොග් කියන ඒවා ගැන තමයි, ඒකේ දාන්න ඉන්නේ...."

"තමුසෙ දන්නවද.....? ඕවා මුලින් පටන් ගත්ත උන්, අද ලියන්නෙත් නෑ.... සත පහක වැඩක් ඇති දෙයක් නෙමෙයි කියලා....., අනික සමහර ඒවට "හුලා" ගේම දුන්නා......"

"ආ.... එක නිසා වෙන්න ඇති, "හුලාට" කෙල උනේ......?"

"මොකක්ද කිව්වේ.....?"

"නෑ..... මුතු කිව්වේ නෑ සෑර්..... මේ මගේ කට ඇතුලේ මොකක්ද උනා....."

"අනික නිකන් මේ වැදගම්මක් ඇති එකෙක් ඔතන ඉන්නවද.....? මක්කුන්ද මේ නමක් ගමක් නෑ....? ඉවාන් පවූලෂලයි, සොසීලයි, චැප්ද වැප්ද මොකක්ද එකෙකුයි.. අස්වැන්නයි...මක්කුන්ද මේ.....?"

"එයාලා සෑර්..... බ්ලොග් වල කප් ගහපු උන්......, මාත් එහෙම තමයි....., ඒත් ඉතින් මගේ ඒවා එකේ දාන්න බෑ නේ.....?"

"එතකොට මොකක්ද මේ පැම්පස් සින්ඩියක්ද මොකක්ද එක..

"ඒක සෑර් අළුත් වැඩක්....., ඒ කියන්නේ, කැම්පස් එකේ උන්ට, කැම්පස් බිත්තියේ ලියන ඒවා, බ්ලොගක් හදාගෙන ඒකේ ලියන්න පුළුවන්......"

"ඒවා මම දන්නේ නෑ....., තමුසෙගෙ ඔළුව නරක් වෙලාද කොහෙද........, ජාතික පත්තරේකින් මේ ඉන්ටර්නැට් එකේ මල් කඩන උන්ට, දෙකයි පනහේ උන්ට, පිටුවක් වෙන් කොරන්න......." 

"නෑ සෑර්..."

"නෑ සෑර්..... ඔව් සෑර්..... නෙමෙයි ඔයි.... මේවා මේ රට්ටු හිනස්සන වැඩ..... තමුසෙ දරු පවුල් කාරයා හින්දා ගෙදර යවලත් බෑ....., ඒත් ඉතින් මේ වගේ පිස්සෙක් මේකේ තියා ගන්නත් බෑ.....,"

"ඒ උනාට සෑර්.... රටේ උන් කියන්නේ, මේකේ ඉන්නේ ඔක්කෝම පිස්සෝ කියලනේ......?"

"රටේ උන් මක්කා කිව්වත්......, අපේ උන් එහෙම කියන්නේ නෑ නේ......? තමුසෙ වගේ ජෝක් කාරයන්ට හරියන්න, ඉස්සට "හිනා" පත්තරේ ගහපු උන්, ආයෙත් ඒක පටන් ගන්න යනවලු........, මම කියන්නම් කත්තුරු වැඩේටම හරියන පිස්සු ඩයල් එකක් ඉන්නවා......, එවන්නම් කියලා..,. ලබන මාසෙ ඉඳලා ඒකේ වැඩට යනවා....., අදම රැසිග්නේසොන් ලැටර් එක, මගේ සැකට්‍රිට දෙනවා....."

"තෑන්කිව් සෑර්.....,  සමහර උන් නම් කියන්නේ, මේකත් නිකන් "හිනා " පත්තරේ වගේම තමා කියලා..... ඒ නිසා අවුලක් නෑ...."

නිමිත්ත:-

සුළු කාලයක් තුල, බ්ලොග් ළොව ජයගත්, "සමකය වටේ" ලියන අපේ නලියා, දිනමිණ පත්තරේ බ්ලොග් කාරයන්ට පිටුවක් වෙන් කරලා. දැන් ඉතින් සල්ලි දීලා සිකුරාදට ගත්ත "රාවය" පත්තරේට අමතරව, "දිනමිණ"කුත් ගන්නම වෙනවා. පත්තරේ ගත්තේ නැතත්, ජාලෙන්ම බලන්න පුළුවන් මෙතනින් ගියාම.

අළුත් දේවලට බය. ඉතිහාසේ ඔළුව උඩ තියාගෙන, හිස්ටීරියා රෝගයෙන් පෙලෙන ජනතාවක් ජීවත් වෙන රටක., අළුත් දේකට මේ වගේ තැනක් ලබා දෙන එක, ඉතිහාස ගත වෙන වැඩක්. මීට කලිනුත් බ්ලොග් වල ගිය ඒවා පත්තර වල ගියාට, වෙනම් පිටුවක්ම වෙන් කරලා තිබුනේ නෑ. මේක විශාල ඉදිරි පිම්මක්..

උඹට ස්තූතියි මිත්‍රයා...

සුබ අනාගතයක්.....!!!

http://www.dinamina.lk/epaper/?id=16&tday=2014/01/10