සුවවිරුවෝ, අම්බරුවෝ හා රණවිරුවෝ

 

සැප්තැම්බර් මාසය අවසානය වන විට වැක්සීන්කරණය අවසන් කොට රට සම්පූර්ණයෙන්ම විවෘත කිරීම තම බලාපොරොත්තුව බව ජනාධිපතිවරයා ඊයේ කිව්වේය. හැබයි ඒක කරන්න යන්නේ මේ ඉන්නා සුව විරුවන් එක්ක නම් උන්නැහේට වෙන්නේ ඒ සිහිණයත් තවත් සිහිණයක්ම බවට පත්කර ගැනීමටය. 

රට හදන්නට කොන්දක් ඇති තද පාලකයෙක් බලාපොරොත්තු වූ අපට අද බලා ඉන්නට සිඳුවී තිබෙන්නේ වෘත්තිය සමිති වල පදයට නටනා පාලකයෙක් දෙසය. යහපාලනයට රටට මක්කත් කරන්න අවංක උවමනාවක් තිබුනේ නම්, ඊට ප්‍රධාන බාධකයක් වූයේත් දිනපතා පැවති වෘත්තීය සමිති විරෝධතා හා පෙරට්ටන්ගේ අම්බරු විරෝධතාවයන්‍ය.

ඒ පාලන කාළයේ කොටුවේ වැඩට ආ හැම එකාම ගෙදර ගියේ වරු ගනන් මහ පාරේ රස්තියාදු වී, පොලිසියේ කඳුළු ගෑස් පාරකුත් කාගෙනය. විශේෂයෙන් විදෙස් ණය මත යැපෙන්නේ නැතිව, ඍජු  විදෙස් ආයෝජන (FDI)  මත ආර්ථිකය ගොඩ දැමීමට සිතාගෙන සිටිනා පාලකයන් නොදන්නා දෙය නම්, මෙවන් වෘත්තීය සටන් පවත්නා රටවලට ආයෝජකයෝ කිසි දිනෙක එන්නේ නැති බවය.

විදෙස් ආයෝජකයින් ආයෝජනයක් සිඳු කිරීමට පෙර සලකා බලනා ප්‍රධානම කරුණක් වන්නේ ආයෝජනයට බලාපොරොත්තුවන රටේ ස්ථිර බලවත් ආන්ඩුවක් හා පාලකයින් සිටිනවාද යන්නය. එහෙත් ආන්ඩුව කල්පනා කළ යුත්තේ මේ ආන්ඩුවට 2/3 ක බලයක් තිබුනත් රටේ නිසි පාලනයක් තිබේද යන්නය. දැන් දිනපතා මුලු රටේම ආන්ඩුවට එරෙහි විරෝධතාවන්‍ය. වැඩ වර්ජනය. මෙවන් වාතාවරණයක් තුල සිඳුවෙන්නේ ඉන්න එකාත් දමලා ගහලා යන එකය.

රටක ප්‍රධාන පාලකයා ඒකාධිපතියකු වූවත්, ඔහුට රටක් පාලනය කිරීම තනියෙන් කළ නොහැක. ඇමතිවරුන් හා නිළධාරින් සිටින්නේ ඒකටය. ඇපත් නැතිව පාර්ලිමේන්තුවට ආ රනිල් වික්‍රමසිංහ ආන්ඩුවට මතක් කර දුන්නේ එම කාරනාවය. ඔහු කිවේ කොරෝනා පාලනය හමුදාවෙන් ඉවත් කොට කැබිනට් මණ්ඩලය වෙත පවරා ගන්නා ලෙසය. රනිල්ලාට හමුදාව දිරවන්නේ නැති එක වෙනම කතාවකි.

එහෙත් ඔහුට අමතක වූ කරුණ නම්, පරිපාලන කටයුතු වලට සහාය විමක් හැර තීන්දූ තීරණ සියල්ලම ගන්නේ සෞඛ්‍ය  ක්ෂෙශ්ත්‍රයේ විශේෂඥයෝ බවය. ඔවුන්ට ඉහලින් ඔවුන්ගේ පරිපාලනය සඳහා කැබිනට් බලතල ඇති ඇමතිවරියක් සිටී. 

ඇත්තටම මේ ඇමතිවරියට තම අමාත්‍යංශය පාලනය කිරීමේ ගැටළුවක් ඇත්දැයි අපට සැක සිතෙන්නේ, අමාත්‍යංශයේ කිසිම තනතුරක් නොදරන සිය ස්වාමියාද හැම තැනම රිංගනා නිසාය. අමාත්‍යංශය ඇතුලෙන් ලැබෙනා තොරතුරු අනුව අපට දැනගැනීමට ලැබෙන්නේ, පළමු වටයේ කොරෝනා මර්ධනය සාර්ථකව මැඩ පැවැත්වූ අනිල් ජාසිංහ හා පබා පළිහවඩණ වැනි විශේෂඥ කාර්‍යශූර නිළධාරින් එලියට විසිවන්නේ කාළකන්නි දේශපාලන මැදිහත් වීම් මත බවය.

කිසිසේත් දේශපාලන වහලුන් නොවූ එවන් නිළධාරින් එලවා දමා අද පත් කරගෙන තියෙන්නේ කිසිම පර්සනැලිටියක් නැති, හරි හැටි කතා කරගන්නවත් බැරි හාල්පාරුවන්‍ය. ඉහළ තනතුරු සියල්ලේම ඉන්නෙ රාජිත සේනාරත්නගේ බිස්නස් පාට්නර්ස්ලාය. කෙසේ වෙතත් ඖෂධ අංශය බාරව ඉන්නා වියත්මගේ දොස්තර මහතාත්, රාජ්‍ය ඇමතිවරයාත් ප්‍රශංසා කටයුතු මෙහෙවරක් කරනා බවද අනිවාර්‍යයෙන් සඳහන් කළ යුතුය. 

එහෙත් කරුමය වන්නේ වැක්සීන්කරණය බාරව ඉන්නේ සෞඛ්‍ය ක්ෂේත්‍රයේ වෙනත් පිරිසක් වීමයි. මාතලන්ගේ අදහස නම්, සිනීයෝ රොටි කම් පසෙක තබා, සිරිසේන හා යහපාලන ඩෙඟා නටන්න ගිය පට්ට ෆේල් කෙනෙකුට වඩා, එදා සිට අද දක්වා රාජලක්ෂලා හා ඉන්නා කෙනෙකු වන චන්න ජයසුමනලා වැනි තරුණයන්ට අවස්ථාව ලබා දිය යුතු බවයි.

ආන්ඩුව ජොස්තරලාගේ පඩි වැඩි කරමින් කරේ ඉල්ලාගෙන කෑමකි. කොරෝනා මර්ධනයේදි අඩුවෙන්ම රොගින් හා ගැවසෙන හා කාළය මිඩංගු කරනා පිරිසට පමණක් වැටුප් වැඩි කර, අනෙක් උන්ට මක්කත් නොදීම ජනවහරේ හැටියටම කියනවා නම් හෙන ගහනා වැඩය. මෙය තේරුම් ගැනීමටවත් නොහැකි ඇමතිවරියක් හා කැබිනෙට්ටුවක් ඇත්තටම එකම විහිළුවක් පමණකි.

ශවේන්ද්‍ර සිල්වා ඉන්නේ ජනාධිපතිතුමාගේ පෙර පිනකටය. ජනාධිපතිතුමාටත් වෙලා තියෙන්නේ ශවේන්ද්‍ර මේක පොඩ්ඩක් බලලා මොනවා හරි කරන්නෙයි කියන එකය. වාසනාවකට උන්නැහෙත් දෙන වැඩේ බලාපොරොත්තු වෙනවාටත් ඉහළින් ඉටුකරනා එකය. එය ඊයෙ මුලු ලෝකයටම දැන ගන්නට ලැබිනි.

සැන්ටිබෝට් මහත්තුරු ඉස්ටැයික් කරලා නිසා එන්නත්කරණය පොඩ්ඩක් බලන්න කියලා ශවේන්ද්‍රට බාර දුන්නේය. වෙනදාට වැක්සීන් පෝලිම් වල දක්නට ලැබෙන ගහ මරා ගැනීම් කිසිවක් නැතිව සුපිරියටම වැඩේ කෙරුනේය. ආපු හැම එකාම හමුදාවලට පින් දී සතුටෙන් ගියේය.

මාතලන් නම් කියන්නේ AR, FR පැත්තකට දමා JR උන්නැහේ කලාක් මෙන් ඉස්ටැයික් කරනා උන්ට ගෙදරම ඉන්න කියා, වැඩට එන උන් ටික ශවේන්ද්‍රටම බාර දුන්නා නම් මීට වඩා දෙයක් වෙයි කියලාය. හැබයි ශවේන්ද්‍රටත් දෙන දෙයක් දෙන්න ඕනා තනතුරේ ඉඳිද්දික්ම මිස පෙන්ෂන් ගියායින් පස්සේ නම් නොව්ය.

මොකෝ, පැන්ෂන් ගිය ආමි කාරයෝත් පැන්ෂන් ගිය පොලිස් කාරයෝ වගේම හාල්පාරුවෝ බව මේ වන විටත් ඔප්පු කරලා තියෙනා නිසාය. 

ඒ වගත් මෙසේය....