ගව පෙරහැර නවතනු..!!! - Stop...Mad Cow Decease..!!!

 
අති ගරු මහානායක හිමිවරුනි,
ජනාධිපතිතුමනි,
ආරක්ෂක ලේඛම් තුමනි,
"බුද්ධිමත්" බෞද්ධ පින්වතුනි,

තිස් වසරක යුද්ධය ..
වසර තිහක කාළයක් අප විඳි දුක් කන්දරාව නිවා දමා ගතවූයේ වසර 4 ක් පමණි. එසේ වසර 30 ක් මේ රට සිඳුවූ විනාශය හා සසඳා බලද්දි, ත්‍රස්තවාදී ක්‍රියාවක් හේතුවෙන් උතුරේදී මිය ගිය ජීවිත 13ක් වෙනුවෙන්, දකුණේ අහිංසක දෙමළ පුරවැසියන් වෙත එල්ල කල, මාරන්තික ප්‍රහාරය වලක්වා ගත හැකි වූයේ නම්, මේ ප්‍රශ්ණය හෙතුවෙන් රටේ කීර්තීනාමයට සිඳුවූ හානිය, වටිනා ජීවීත, මිළ කළ නොහැකි දේපල හානි හා රටේ සංවර්ධනය ඇන සිටීම මෙන්ම, අදටත් අප විඳවන 13 ව්‍යවස්ථා වැනි කිසිවක් ඇති වන්නේ නැත.

එහිදි රාජ්‍ය ත්‍රස්තවාදයක් මුදාහැරුණු බව අද කවුරුත් පිලිගන්නා කාරණයකි. එදා රට පාළණය කළ දේශපාළණ නායකත්වය, මේ පිළිබඳව පසුව පසුතැවිලි වූ බවද නොරහසකි. ඉන් පසු යුද්ධය නිමා කිරීමේදී, දකුණේ ජාතිවාදීන්ගෙන්, දකුණේ දෙමළ ජනතාව ආරක්ෂා කිරීම වෙනුවෙන්, සියළුම නායකයින්ටත්, ආරක්ෂක හමුදාවන්ටත් අපගේ ගෞරවය හිමි විය යුතුමය. එසේ බුද්ධිමත්ව ක්‍රියා නොකලේ නම්. මෙරට ලේ ගංඟවක් බවට පත් කිරීමට ගතවන්නේ ඉතා සුළු කාළයක් බව 1983 දී මනාව ඔප්පු කරන ලදි.

එමඟින්, ළොව පුරා සහාය මනා සේ ලබමින් වැඩුනු ත්‍රස්තවාදය අතුගා දමා ලබා ගත් නිදහස, කවුරුන් හෝ කෙනෙකුන් එය සිහළුන්ගේ නිදහසක් ලෙස පමණක් අර්ථ ගන්වන්නේ නම් එය ඉතා පහත් ක්‍රියාවකි. යුද්ධයේ ජයග්‍රහණය වෙනුවෙන්, පාර්ලිමේන්තුව අමතමින් ජනාධිපති තුමා පැවසුවේ, මෙරට සිටිනුයේ ජාතින් දෙකක් පමනක් බවය. එනම් රටට ආදරය කරන දේශප්‍රේමී ජාතිය හා රටට ද්‍රෝහීකම් කරනා දේශද්‍රෝහී ජාතිය බවයි. එයින් අප අයත් වනුයේ මේ රටට ආදරය කරනා කොටසටය. මෙරට මුස්ලිම් ජනතාවද කවදත් උන්නේ දේශප්‍රේමී කන්ඩායමෙය.

හලාල් හා ගබ්සාව..
එහෙත් මෑතකදි අපටද ඔවුනට එරෙහිව පෑන මෙහෙයවීමට සිඳුවූයේ, රටේ ජනගහනයෙන් 10% කටත් අඩු වූ එම ජනතාව නියෝජනය කරන උලමාවරුන්, රටේ ඉතිරි 90% වන ජනතාවටත් බලෙන් හලාල් කැවීමට යාමට එරෙහිවය. මෙතන ඉතාමත් වැදගත් කාරණය වනුයේ. මේ ප්‍රශ්ණය ඇති කළේ අහිංසක මුස්ලිම් ජනතාව නොව පල්ලියේ උලමාවරුන් බව මතක තබා ගැනීමය. මුස්ලිම් ජනතාව එනයින් ගත් කල ඉතා අහිංසක ජන කොටසකි. හලාල්කරණය පමණක් නොව අරාබීයෙන් ඉවත්වන ලෝගූ මෙටර මුස්ලිම් ජනතාව වෙත බලෙන් අන්දවන්නේද ඔවුන්මය. නමුත් ඒය මුස්ලිම් ජනතාවට පමණක් බලපාන දෙයක් බැවින් එය විසඳාගැනීම ඔවුන් සතු කාරණයකි.

හලාල් සටන වෙනුවෙන් බොබසේ කළ මෙහෙය අගය කරනා නමුදු, එයින් පසු ඔවුනගේ හැසිරීම්, අපට කිසි සේත්ම අනුමත කළ නොහැක. ප්‍රශ්ණය ඇති කල උලමාවරුන් හා වාදයකට පැමිනීම, බෞද්ධ පූජකයාගේ යුතුකමය. එය මහ නාහිමිවරුන් වෙතින් ඉටු නොවන්නේ නම්, වෙනත් පූජකයන් පිරිසක් හෝ ඉදිරිපත් වීම අගය කළ යුතු වුවත්. ගිහියන්ගේ කුටුම්බ ක්‍රියාකරකම්වලට මැදිහත් වීම කිසිම පූජකයකුට සුදුසු දෙයක් වන්නේම නැත. තමන් කැමති ආහරයක් ගැනීමට, තමන් කැමති ඇඳුමක් ඇඳීමට, තමන් කැමති වෙළඳසලකින් භාන්ඩ මිලදී ගැනීම මෙන්ම. තමන්ට අවශ්‍ය දරුවන් සංඛ්‍යාව තීරණය කිරිම ජනතාවගේ පරම අයිතීන් වේ.

ගබ්සාව, ශ්‍රී ලංකාවේ නීතියෙන් තහනම් කර ඇති ක්‍රියාවකි. එහෙත් අප රටේ සෑම තැනම ගබ්සා මධ්‍යස්ථාන ඇති බවත් ප්‍රසිද්ධ රහසකි. එසේ ඇති වීමට ප්‍රධානතම හේතුව, ජනතාව ලිංගික විෂය ගැන ඇති නොදැනුවත් කම මිස, අන් හේතුවක් නොවේ. ඒ සඳහා කළ යුත්තේ ගබ්සා මධ්‍යස්ථාන වැටලීම නොව, පල්ලියේ මෙන්, විවාහයට එළඹෙන බෞද්ධ පිරිසවත්, ලිංගික වශයෙන් දැණුවත් කිරීමට යොමුකිරීමයි. මෙය, බෞද්ධ භික්ෂුවට කිසිසේත්ම නොගැලපෙන කටයුත්තක් වන අතරම, ඒ වෙනුවට වෛද්‍ය උපදෙස් ලබා දීම වැනි කටයුත්තක්, පන්සල් වලින් කළ හැක. එසේ නොමැතිව නීතීය අතට ගෙන මහ දවාලේ ගබ්සා මධ්‍යස්ථාන වැටලීමෙන් සිඳුවන්නේ, ගබ්සා කිරීම් නැවතීම නොව, බුද්ධාගමට හා භික්ෂූන්ට අගෞරව කිරීම පමණකි.


ගව ඝාතනය හා ආත්ම පූජා..
මෙවන් වාතවරණයක් තුල තවත් ප්‍රශ්ණයක් ඇති කළේද භික්ෂුවකි. ඔහු භික්ෂුවක් ලෙස හැඳින්වීමට මගේ කිසීම කැමත්තක් නැත. අපචාර ක්‍රියා හේතුවේන් සිහල උරුමයෙන්ද ඉවත් කොට උන් පුදගලයකු, පාරමිතා පිරු උතුම් භික්ෂුවක් වන්නේ, දේශාපාළන උවමනාවන්ට මිස, වෙන කිසිම හේතුවකට නොවේ. දේශපාළණ නිල මැස්සන්ගෙන් මෙවන් දෙයට වඩා, වෙනත් දෙයක් බලාපොරොත්තු වීමත්, විහිළුවක්ම පමණි. එහෙත් මේ ක්‍රියාව හෙලා දැක නිවේදනයක් නොකිරිමේ පාපයෙන්, මහ නාහිමිවරුන්ට කිසි දිනක ගැලවීමක් ලැබෙන්නේ නැත. ඔවුන්ගේ නිහඬ බව කියා පෑවේ, ඔවුන්ද මෙය අනුමත කිරීමක් පමණි.

මා දන්නා තරමින්, බෞද්ධයන්ගේ ගව මස් අනුභවය, ප්‍රතිශතයක් වශයෙන්, ඉතා පහත් මට්ටමක පවති. ගව මස් ප්‍රධාන ආහාරයක් වන්නේ මුස්ලිම් ජනතාවගෙයි, ඊට අමතරව ක්‍රිස්තියානි ජනතාවද ගව මස් කෑම ප්‍රිය කරයි. ලංකාවේ ජීවත් වන්නේ බෞද්ධයන් පමණක් නොවේ. සිංහලයන් පමණක්ද නොවේ. එසේනම්, නම් අපට අන්‍ය ජාතින්ගේ ආහාර රටාවන්ට හා ඔවුන්ගේ ජීවන රටාවන්ට විරුද්ධ වීමට කිසිම අයිතියක් නැත. ගව ඝාතනය නවතනු යනුවෙන් මේ ක්‍රියාකරන්නේ, මුස්ලිම් විරෝධි ක්‍රියාවක් මිස වෙන කිසිවක් නොවන බව ඉතා පැහැදිලිය.

රාවණා හා උක්දඬුමොණරය..
කිසිදා ජීවත් නොවු, වාල්මිකිගේ හිතේ උපන්, රාවණා පෙරටු කොට ගෙන, සිවුරු දරා, "ගව ඝාතනය වලකනු" යන පාඨය පෙරට ගෙන, කතරගම සිට අරලිය ගහ මැදුර දක්වා පැමිනෙන්නේ, සුපෙක්ෂාශීලි දැහැමි භික්ෂුන් පිරිසක් හා ශාන්ත දාන්ත උපාසකයින් පිරිසක් නොව, ගව මස් වෙනුවෙන්, මිනී මස් බුදීමට උවද ප්‍රිය කරන, මරි මෝඩ හරක් රැලක් බව දැන් ඔප්පුවී අවසානය. ගව මස් කඩ වලට ප්‍රහාර එල්ල කිරීමෙන් නොනැවති, මුස්ලිම් ජනයාටත් හිරිහැර කරමින් පැමිණෙන මේ ගව රැල වහාම නැවත් විය යුතුය.

එසේ නොමැති නම්, මුස්ලිම් ජනයා බහුලව වෙසෙන, මුහුදුබඩ මාර්ගය ඔස්සේ පැමිණෙන මේ පෙරහර අවසානය... බුදු රැස් විහිදීම කෙසේ වෙතත්, නැවතත් අප රටේ, ලේ ගංඟා ගලන කාළය වැඩි ඈතක නැත. මාතර, ගාල්ල, බලපිටිය, අළුත්ගම, බේරුවල, කළුතර වැනි, මුස්ලිම ජනයා බහුල වශයෙන් ජීවත්වන ප්‍රදේශවලදී, මොවුන්ගේ ක්‍රියාකාරකම් කෙසේ වේදයි, අපට කිව නොහැක. එමෙන්ම, මුස්ලිම් ජනතාවද නිහඬව සිටීයයි, අපට කිසිසේතම බලාපොරොත්තු විය නොහැක.

කළු ජූලීයක් නැවත ඇතිවීම ..
ළබෙන්නේ ජූලී මාසයයි. එම නිසා නැවත කලු ජූලීයක් ඇති නොවීමට වග බලාගැනීම, ගරු නාහිමිවරුන්, ජනාධිපති තුමා මෙන්ම ආරක්ෂක ලේඛම් තුමාගේද වගකීමයි. අප රට තුල ළෝක නායකයන් සහභාගි වන පොදු රාජ්‍ය මණ්ඩළ සමුළුව පැවත්වීමට ඇත්තේ, නොවැම්බර් මාසයේයි, මුළු ළොවම බලා සිටින උතුරේ ඡන්දය සැප්තැම්බර් මාසයේ පැවත්වීමට බොහෝ දුරට ඉඩ ඇත. නවනීදන් පිල්ලේ නෝනා මහත්මයා,  මානුෂික අයිතිවාසිකම් සොයන්නට පැමිණෙන බවකුත් දැන ගැණීමට ඇත.

දෙමළ ජනයාගේ මානුෂික අයිතිවාසිකම් කඩ කලැයි ජිනීවා වලදි එල්ලවන චෝදනාවන්ට පිළිතුරු ලෙස, ඔවුන්ගේ මානුෂික අයිතිවාසිකම් දෑසින්ම බලා සාක්ෂාත් කරගන්නා ලෙස ඉල්ලන අප, ගව ඝාතනයට එරෙහිව ගිනි තියාගන්නා මෝඩ ජාතියක් ලෙස ගසාගත් හංවඩුව, තව දුරටත් සනාත කිරීමට, ගව මස් කෑමේ අයිතියට එරෙහිව පෙලපාලි ගොස්, රටත් ගිනි තියන අමන ජාතියක් ලෙස, ලොව පුරා ප්‍රවෘත්ති නාලිකාවලට, ප්‍රවෘත්ති සපයන රටක් බවට පත්වනවාද යන්න තීරණය කළ යුතු වන්නේ ඉහත සඳහන් කළ අප රටේ සියළුම නායකයන්ය.


දේශප්‍රේමියකුගේ කාරුණික ඉල්ලීම..
නැවත වරක් දේශප්‍රේමියකු ලෙස ඉතා කරුණාවෙන් මේ ඉල්ලීම දෙක කරමි. එයින් එකක් හෝ ඉටුකර අප රට නැවතත් ළෝකයා ඉදිරියේ අවමානයට ලක් කිරීමෙන් වලකින මෙන් ඉල්ල සිටිමි.

1. කරුණාකර මේ ගව ඝාතන විරෝධි පෙලපාලිය වහාම නවත්වන්න...
2. නැතිනම්, මුස්ලිම් ජනතාව වෙසෙන ප්‍රදේශවල, පෙලපාලිය ගමන් කරන අවස්ථාවලදි, ඔවුනගේ ආරක්ෂාව උපරිම ලෙස සපයන්න..

හරක්, ගව ගාලෙන් පැන මිනිසුන්ට ඇනීමෙන්, පසු ගව ගාල වැසීමෙන් පලක් නැත. (අප රට නායකයන්, එදා සිට අද දක්වා, ප්‍රසිද්ධව ඇත්තේ, ගාල කඩාගෙන ගොස් විනාශය සිඳුවූ පසුව, ගාල වසා දැමීමටයි.)

ඔබ සැමට සුබ අනාගතයක්..
තෙරුවන් සරණයි....!!!