ආයෙත් පරිප්පු කන්න වෙයිද....? - Indian Warning

මේ ගැන අපේ W3Lanka ලියා තිබෙන්නේය. ඔහු කියන්නේ, රාජපක්ෂ පාළණයේ වසන්තය නිමාවෙමින් පවතින බවයි. රටේ එවන් මතයක් පතුරුවන්නට තැත් කලද ඇත්ත එයද.....? නැත. ඔවුන් කෙලිනා පිස්සු එකසිය ගානට කෙලි. බඩු වැඩි කිරීමේත් නිමක් නැත. තෙල් බාලා, නඩු බලවා අවසානයේ, පැස්ටෝල් වලටත් කෙලියේය. කොළඹ ලස්සන වෙයි. ගහන්න යන බිල්ඩින් වල තට්ටු ගනන් කරන්න වෙනෙම ඇමතියෙක් දාන්න වෙයිය. නයිට් රේස් යයි. ඉඳගෙන බලනවානම් 5000 ය. 50 ටිකට් ගත්තොත් සද්දේ විතරක් අහගෙන ඉන්න පුළුවන්ය. හැබයි අපරාදේ කියන්නේ රටේ තත්වයට ගැලපෙන්න සයිකල් රෙසුත් යනවාය. ත්‍රී වීල් රේසුත් යනවාය. ලැම්බෝගිනි බලන්න උන්නාට, ගල් ෂොට් එකේ පවර් එකට එහෙමම නින්ද ගිහිල්ලාය.


ඒ කියන්නේ 5000 වියදම් කරන්න පුළුවන් එකාටත් 50 ක් වියදම් කරන්න පුළුවන් එකාටත් ආතල් ඕන නම් ඇස්ටි හැලෙන්න දෙනවාය. පුළුවන් එකා මගුල් ගෙදරට ගෙන්නනවාය. බැරි එකා පන්සලට ආවම ලඟටම ගිහින් වඳිනවාය, ඉඹිනවාය, අත වනනවාය, හිනා වෙනවාය, බුරි මිරිකගන්නවාය. පොඩි එකා විසිකරනවාය එක කෙලියක්ය. ඕවාට අපේ ගමේ කියන්නේ පින පලදෙනවා කියාය. බලපන්කෝ පින් පාට කියාය. ඉතින් අපි මේ හිත් අමනාප කර ගත්තාට. හෙට ඡන්දයක් තිබ්බොත් ආයෙත් ගිහින් පැන්සලෙන් කෙලලා එනවාය.

පිරබාහරන්ට දීපූ නිසා එකෙකුටවත් බය නැතිය. ආන්ඩුවේ ඉන්නා මහා වාමංශිකයෝ, පරණ ශ්‍රී ලංකා කාරයෝ ඉතරක් නොව විපස්සේ උන්ගේද ඇට තියෙන්නේ උන්නාන්සේ ලඟය. ජෙප්පෝ ටිකත් නැත්නම් කටක් අරින්න එකෙක් නැත්තේය. හැබයි, ඔය බය නැති කේස් එක උනත් හරියට කරගන්න උන්නැහේගේ කාන්ඩේ දන්නේ නැතිය. උන් වැඩ නාගන්නවාය. නඩුවක් අහන්න චාන්ස එකක් දුන්නාම. ඒ නෝනාට කින්ඩිය දානවාය. ඒ ළකුණු වැඩි කර ගන්නය. හැබයි ඒකෙන් උනේ ඊටත් ඉහලින් කොමිසමක් දාන්නය. එතකොට අර බලවපු නඩුවෙන් පලක් නැත. (කොහොමත් ඒක නම් පට්ට ජෝක් එකකී)

හැබයි ඉතින් ඔය සෙල්ලම් දාන කොට ගමේ ප්‍රාදේශීය සභාවේ ඉන්න එකාත් ෆෝම් වෙනවාය. ඌත් ගිහින් ටුවරිස්ට් හොටෙල් බලෙන් අල්ල ගන්නවාය. එතකොට නීතීයක් කියලා දෙයක් නැත්තේය. අන්තිමට සුද්දෝ එන එකත් නවතිනවාය. හෝටල් වලට වෙන්නේ, අර පිරබාහරන්ගේ කාළේ වගේ වෙඩින් වලින් විතරක් ජීවත් වෙන්නය. පාතාලේ මර්ධනය කරාය කිව්වාට දැන් ගේම දෙන්නේ ගමේ උන්ගේ ඡන්දෙන් ආපූ ලයිසන් පාතාල කාරයෝය. කිසිම තැනක වැදගත් මිනිහෙක් නැත. පහලම තැනින් ආවයි කී ප්‍රේමදාස මහත්තයා ළඟ මීට වඩා වැදගත් මිනිසුන් සිටියේය.

උපදෙස් දෙන උන්ගෙන් මෙන්ම ආර්ථිකය හසුරුවන එකාගෙනුත් වැඩක් නෑ කියා තේරෙන්නේ කොකු වැටෙන විටය. ආර්ථිකය හොම්බෙන් යන්නේ ඒ නිසාය. ඔන්න ආයෙත් ඉන්දියාවෙන් පොඩි වෝනින් එකක් දීලාය. ලැම්බෝගිනිවලට ටැස් ගැහුවේ නැති උනාට. ඉන්දියාවෙන් එන පොඩි කාර් වලටයි, ත්‍රී වල් වලටයි බද්ද වැඩි කලේය. මෙහේ ඒ ගැන කතා කරන්න එකෙක්වත් නැතු උනාට. ඉන්දියාව ඒ ගැන කතා කර ඇත. ඔවුන් කියන්නේ මේ ටැස් ගැහිල්ලේ සාධාරණත්වයක් නැත කියාය. දැන් ඉතින් ආයෙත් ඉන්දියන් විරෝධි වෙන සෙට් එකට කෑ ගහන්න මාත්තුරුකාවක් තියෙන්නේය.

ඒ උනාට එහෙම කෑ ගහන එක ඩේන්ජරස්ය. ඒ කාළේ එයා කියන ඒවා අහන්නේ නැතුව ගේම් දෙන්න ගිහින් ඉස්සෙල්ලාම පරිප්පු දැම්මේය. ඊට පස්සෙ පලා බබා දුන්නේය. විමල් සහෝ පලා බබා අපිට එපා කිව්වාට, ලොක්කා බබාව ආයෙත් එහේට දෙන පාටක් නැත. මොකෝ ලොකු අයියා තරහ වෙන්න ඉඩ තියෙනවාය. ඊට පස්සේ කියන දේ අහන්නේ නැති උනාම ජිනීවා වලදි අපිට විරුද්ධව ගේම දුන්නේය. ඉතින් මේ වෝනින් එකත් එන්නේ මාර්තු කිට්ටුවත් එක්ක නිසා දෙසරයක් හිතා බලන්න වෙනවාය.

ඕන නම් චීනේ ඉන්නවා කියා ගේමක් ඉල්ලිය හැක. එහෙම නැත්නම් ෂේප් න්‍යාය අනුගමනය කරන්න වෙනවාය. හැබයි ඉතින් ඉන්දියාව ඇමරිකාවත් එක්ක සෙට් වෙලා අපිට අංචිය අදින කොට. චීනේ අඳ ගොළු බිහිරි නියාමය අනුගමනය කරනා එක නම් කනගාටුවට කාරනයක්මය. මේවා ඔය ඉන්න විදේස් විසේසඥ්ඥයෝ කියන උන්ට තේරෙන්නේ නැති නිසා අපවත් පෙන්වා දිය යුතුය. ඒ මොකා මොනදේ කලත් අපේ රටට අප ආදරේ නිසාය. වසන්තය නිමා වෙනවා කිව්වාට, ආයෙත් ඡන්දයක් එනකන් ඉන්න වෙනවාය.....

ඒ වගත් මෙසේය.