ජනපති සිරිසේන මයා. වෙත ආදරයෙන් - To Mr. President with Love

සෙත් වේවා...!!!

ගරු ජනාධිපති තුමා වෙත,

ඔබගේ සැපදුක් කෙසේද? මාතලන් නම් කවදත් ඉන්නේ, ආතල් එකේය. ඔබ තුමාත් සැපෙන් ඉන්න බව මුහුණෙන් පෙනුනත්, ඉන්නේ දත් තිස් දෙකක් මැද්දේ ඉන්නා දිව වගේ කියා, සිරි ලංකා නිදහස් පක්ෂෙන් එන නිව්ස් වලින් පේනවාය. ඔබතුමාට උපදෙස් දෙන්න අපි දන්නා තරමින්, ඕනෑ තරම් කස්ටිය ඉන්නවාය. මේ බ්ලොග් පඩංගුවක් ලියාගෙන ඉන්නා හාල් පාරුවෙක්ගෙ උපදෙස්, පයිසයක් වටින්නේ නැති වෙන්නත් පුළුවන්ය. එහෙත් අපි ඉන්නේ ජනතාව සමගය, ඒ ජනතාවත් බොහෝ සමාජ පන්තීන් නියෝජනය කරනා පිරිසකි.


ඔබ තුමා බලයට පත් නොවූයේ නම්, ඔබට අත් වන ඉරණම ගැන, ඔබම අපට කියා දුන්නේය. ඇත්තටම සිඳු වන්නේ එයයි. සමහර විට අපේ බ්ලොග් කෙරුවාව මෙන්ම, සමාජ ජාලාද අහිමි වන්නට ඉඩ තිබිනි. නැවතත් බලයට පත් වූයේ නම්, ළොව මේ තාක් බිහි වූ කුරීරුම පාළකයාගේ හා මිනීමරු මැති අමතිවරුන්ගේ මෙන්ම, මිනීමරු ජනතාවකගේ බලයට මේ රට නතු වන්නට තිබූ බව, හිටපු ජනපති මැදමුලනේ මෙගා පෝන් එකකින් ආතල් දෙන වෙලාවේ, එතන උන් එකා කියූ දෙයින් බොහෝම පැහැදිලිය.

අප ඔබ තුමාට බලය ලබා දුන්නේ, සාමුහිකව ලැබු යුධ ජය තම මුක්තියට සරි කර ගත්, ඉතිහාසයේ කිසිඳු හෝ පාළකයකු රටට නොකළ තරමේ විනාශයකට මේ රට ගෙන ගිය පාළකයාව ගෙදර යැවීමට පමණක්ම නොවේ. ඔහු වටා එකතුව සිටි කටු කන බල්ලන්ද බලයෙන් එලවා දැමීමටය. ඔබ බලයට පත් වූ වහාම, රනිල් වික්‍රමසිංහ අගමැති කරනවා කියූවේ ඔබමය. ඔහු එය කුමන්ත්‍රණයක් මගින් හෝ අසාධාරණ අයුරින් ලබා ගත්තේ නැත. ඔහු ඉටු කළේ ඔබගේ බලාපොරොත්තුවක් පමණි.

එහෙත් දින් 50 ක් යෑමටත් ප්‍රථම, පොදු හතුරා වී ඇත්තේ මිස්ට ක්ලීන් ලෙස නමක් දිනා සිටිනා, රනිල් වික්‍රමසිංහයන්ය. ඔහුට විරුද්ධව සෑම අතින්ම විරෝධතා මතු වෙද්දි, ඔබ නිහඬව සිටීමෙන් කරනුයේ එම මතවලට ශක්තියක් ලබා දීමය. එය අසාධාරන ක්‍රියාවක් හා සිඳු නොවිය යුත්තක් බව අපගේ මතයයි. අඩුම ගනනේ මේ පිළිබඳව ඔබේ මතය ජනතාවට ප්‍රකාෂ කරන්නේ නම්, ඔබේ අවංකභාවය පිළිබඳව මේ රටේ යහ පාළණයක් බලාපොරොත්තු වන පිරිසට පෙන්වා සිටීමකි. එසේ නොමැතිව ඔබේ හැසිරීමෙන් පෙනෙනුයේ, ඔබ රැවුලත් කැඳත් දෙකම අවශ්‍ය කශේරුකාවක් නැති නායකයකු බවය.

ඔබ ජනාධිපති වූයේත්, අද ලෝකයේ සියළුම රාජ‍යයන්හී නායකත්වයෙන් ඔබ වීරයකු ලෙස සලකන්නේත්, විදෙස් සංචාරයන් සඳහා ආරාධනා ලැබෙන්නේත්, එහිදි ඉහළම පිළිගැනීමට ලක් වන්නේත්, ඔබ සිරි ලංකා නිදහස් පක්ෂයේ නායකයා නිසා නොවේ. එජාපයේ අති බහුතරයක් සිටිනා එජාප ආන්ඩුවක් පවතින හේතුවෙන්මය. එම පක්ෂය ඉතිහාසයේ පටන් පවත්වාගෙන යන විදෙස් සබඳතා නිසාමය. ඔබ ජනාධිපති වී, නැවතත් පොදු පෙරමුණේ කාළකන්නි හොරුන් සමඟ එක පෙලට සිට ගත්තේ නම්, මේ කිසිම ගෞරවක් හා ආධාර, උපකාර, උපහාර ලැබෙන්නේ නැත.

එකා දෙන්නා හෝ එක්ව ඔබේ ප්‍රතිපත්ති ප්‍රකාශය මෙන්ම, දින 100 යේ පොරොන්දු ප්‍රකාශය නිවසක් ඇර නිවසක් කරා බෙදා ගියේ, සිරි ලංකා නිදහස් පක්ෂයේ උන්වත්, පොදු පෙරමුණේ උන්වත් නොවේ. පොදු පෙරමුණේ උන් සියල්ලන්ම ඔබව උපමා කළේ කැඳයෙක් ලෙසටය. එකියක් කිව්වේ, ඔබ ඉතිහාසයේ උන් අසාර්ථකම සෞඛ්‍ය ඇමතිවරයා කියාය, එස් බී කිව්වේ, ඔබ පොන්නයෙක් කියලාය. තවත් උන් කිව්වේ හාල්පාරුවෙක් කියලාය.

කරන්නට හැකි සියළුම පරිභවයන් කල උන්, අද ඔබ පසු පස "සෑර්" ගාමින්, නැවතත් උන්ගේ නීතී විරෝධි ගණුදෙණු හා ව්‍යාපාර කර ගෙන යාමට එයි. එපමණක් නොව, හැම එකාම දත කන්නේ මහින්ද මහත්තයා නැවත පාර්ලිමේන්තුවට ගෙනවිත්, ඔබගෙන් මෙන්ම එජාපයෙන් පලි ගැනීමටය.

හිටපු ජනපතිට නොව, මේ රටේ ඕනෑම එකෙකුට දේශපාළණය කිරිමේ නිදහසක් තිබිය යුතුය. එහෙත් සිර ගෙවල් වල සිටිය යුතු උන් පාර්ලිමේන්තුවට ගෙන ඒම හා ඊට ආවැඩීමද ජාතියේ කරුමයක් මිස වෙන කිසිවකුත් නොවේ. මේ හොර නඩය හිස් මුදුනින් පිලිගන්නා 46% ක හරක් රැලක් අම්මට සිරි ලංකාවේ ජීවත් වන බවද අමතක කළ යුතු නොවේ.

මේ රට තුල යහපාළණයක් ඇති කිරීමට ප්‍රථම, ඔබ තුමා සභාපතීත්වය දරණ පක්ෂයේ යහ පාළණයක් ඇති කළ යුතුය. ලැබෙන ආරංචි වලින් පෙනෙනුයේ පොදු පෙරමුණේ බහුතරයකට මෙන්ම හිටපු ජනපතිටද නාම යෝජනා නොලැබෙන බවකි. එය සතුටට කරුණකි. එහෙත් ඔබ තුමාගේ නිහතමානි බව සම හරක් උන් අදටත් පිලි අරගෙන තියෙනුයේ නිවට කමක් ලෙස බව, පක්ෂයේ සමහර හාල්පාරුවන්ගේ ප්‍රකාෂ වලින් මනාව ගම්‍ය වේ. මෙයට එක හේතුවක් වන්නේ ඔබම කල කට වරද්දා ගැනීමකි. එනම් ඔබ වසර පහකින් විශ්‍රාම යන බවට කළ ප්‍රකාශයයි. එය නැවතත් නිවැරදි කිරීමට ගියයොත් පච වන්නේද ඔබයි.

දැනට පෙනෙන ආකාරයට ඔබ වන් නායකයකුට විශ්‍රාම ගැනීමට ජනතාව සමහර විට ඉඩ නොදී සිටීමටද පුළුවන. ඒ ඔබේ සරළ බව හා නිහතමානී කම නිසාමය. එහෙත් ඒ නිහතමානි කම එජාපයේ මැති ඇමතිවරුන්ගෙන් මෙන්ම, ඔබේ පක්ෂයෙන්ද ලැබිය යුතුමය. ඕනෑවට වඩා උඩ පනිනා මැති ඇමතිවරුන්ට බලපෑම කිරීමට කිරි සේත් බිය විය විය යුතු නැත. ඔවුනට ඒ බව සැලකිරීමට අකමැති නම්, අඩුම තරමේ අගමැතිට හෝ අවවාද මෙන්ම අනතුරු ඇඟවීම් කළ යුතුමය. මන්ද තවමත් ඔබ මේ රටේ විධායක ජනපති වීම නිසාය.

එජාපයේ ප්‍රොබේෂන් පාළණය තුල, කම්බ හොරුන්ට එරෙහිව නීතිය ක්‍රියාත්මක බවක් නොපෙනේ. එහි අගෞරවය හිමිවන්නේද ඔබටමය. ඇවන් ගාඩ් සිද්ධිය සමඟ එලියට එන, තිලක් මාරපන හා විජේදාස රාජපක්ෂ ඩීල් ගැහීම නිසා, උන් හොරු අල්ලන්නේ නැති බව ඉතාමත් පැහැදිලිය. විජේදාස රාජපක්ෂ කියනුයේ එම සමාගම නීතියට අනුව පවත්වාගෙන යන්නක් බවයි. එහෙත් පර්යේෂන මගින් ඔප්පු වූයේ ඇවන් ගාඩ් පමණක් නොව, රක්නා ලංකා ආයතනය පවා පෞදගලික ආරක්ෂක සේවාවලට භාවිත කළ නොහැකි අවි ගණුදෙනු වල යෙදුනු බවයි.

එමෙන්ම වෙලේ සුදාගේ කට උත්තර අනුව අත් අඩංගුවට පත් වූ එකෙක් හෝ නැතිය.  මන්ද, ප්‍රශ්ණ කිරීම අවසානයේ එජාපයේ නායකයන්ගේද නම් ගම එලියට එන බැවිනි. මේ රටේ නීති ගරුක ජනතාවට අවශ්‍ය වන්නේ පක්ෂ බේදයෙන් තොරව සැමට එක සමාන ලෙස නීතිය ක්‍රියාත්මක කිරීමය. දින 100 යේ පොරොන්දු මෙන්ම සතියක් තුල ඔබතුමා විසින් ආරම්බ කිරීමට පොරොන්දු වූ විශේෂ කොමිසමද අද වන තෙක් නැත.

මාතලන්ගේ මතය, පාර්ලිමේන්තු මැතිවරණයක් පැවැත්වීමට ප්‍රථමයෙන් ව්‍යවස්ථාව වෙනස් කිරීම නුවණක්කාර ක්‍රියාවක් නම් නොවනා බවයි. මන්ද? මේ රටේ තිබූ කාළකන්නි දේශපාළණ ක්‍රමය තුල හැදි වඩුනු පක්ෂ විපක්ෂ සියළුම දේශපාළඥ්ඥයන් තඹ දොයිතුවකට විශ්වාස කළ නොහැකි නිසා වෙන්මය.

එජාපයේ උන්ද, පොදු පෙරමුණේ උන්ද, ඔබ පතනා ජාතික ආන්ඩු සංකල්පයකට කැමති නැත. එමෙන්ම මේ රටට එය කිසි සේත්ම ගැලපෙන්නේත් නැත. එවිට සිඳු වන්නේ, දෙපිරසම එකතුව, කිසි අවුලක් නැතිව මේ රට විනාශ කිරීමයි. අනෙක පක්ෂ දෙකම ව්‍යවස්ථාව වෙනස් කිරීමට වලි කන්නේ, ඔබේ විධායක බලයට කෙළවීමටයි. 

මේ රටේ ඔබතුමා බලාපොරොත්තු වන පරිදි, එක රැයකින් යහ පාළණයක් ඇති කළ හැකි රටක් නොවේ. ඒ බව නව එජාප පාළණය තුලද පැහැදිලිවම පෙනේ. එබැවින් අඩුම තරමින් මී ළඟ මැතිවරණය තෙක් විධායක බලය භාවිතා කිරීම තුලින්, ජනතාව බලාපොරොත්තු වූ සැබෑ වෙනස අත් කිරීමට කටයුතු කරන්නේ නම්, එය ජනතාව ලබනා ජයග්‍රහණයයි.

දින 100 ක් බැරි නම් 500ක් හෝ අරගෙන මෙම පොරොන්දු වැඩි ප්‍රමාණයක් ඉටුකිරීමට හැකි කාළය හා ශක්තිය ඔබට ඇති බව අප විශ්වාස කරන අතරම, ඒ සඳහා සියළු ධෛර්යය හා ශක්තියද ඔබ තුමාට ලැබේවා යන්න අපේ පැතුමයි.

දිණූ ජය කිසිවකුටත් පැහැර ගැනීමට ඉඩ දෙන්න එපා...

මීට,
කවදත්, රාජ්‍ය නායකයාට හිතැති...
මාතලන්.