ලෙඩට බෙහෙත් නැති, බෙහෙත් වට්ටෝරූ - Prescriptions without proper medicine

මෛත්‍රිපාල මහත්තයාගේ මැනිෆැස්ටෝ එක එලි දක්වලාය. ඕක, කී දෙනෙක් කියවයිද කියා කියන්න දන්නේ නැතිය. මාතලන්ගේ ජීවිත කාලය තුරා, මේ වාගේ ලස්සන පොත් කන්දරාවක් දැකලා තියෙනවාය. සමහර ඒවා කියවලා තියෙනවාය, සමහර ඒවා විසිකරලා තියෙනවාය. මාතලන් ඒ කාළේ පටන් මේවාට කියන්නේ බබල් ගම් කියලාය. 

බබල් ගම් තියෙන්නේ, ලස්සන කොළේක ඔතලාය. නැත්නම් අපූරු පෙට්ටියක දාලාය, ලස්සනය, සුවඳය, බොහෝම රසය. එහෙත් කිසිම ගුණයක් නැත. ඕනෑ නම්, චුයිං ගම් එකක් වගේ හප ඉඳලා විසි කොරන්න පුළුවන්ය. ඕන නම්, බැළුම් වගේ බෝල පුම්බලා, අනික් උන් කොර කරන්නත් පුළුවන්ය. ඔය පිම්බිල්ලත් හැම එකාටම කොරන්න බැරිය. ඒකටත් කළාවක් තියෙනවාය. එහෙම පිම්බුවත්, පස්සේ ඉතිරි වෙන්නේ, හපේ විතරය. වෙන මක්කා හරි කන්න වෙන කොට හපේ විසිකරලා, කන්න ඕන දේ කනවාය.

70 දී, අම්මා ඇවිල්ලා තියෙන්නේ හඳෙන් හරි ගෙනත් හාල් දෙන්නම් කියලාය. ඒ කාළේ හාල් ටිකක් හොයාගෙන බත් ඩිංගක් කන්න තිබුන අමාරුව දන්නේ, අම්මට සිරි ලංකාවේ පට්ට ආර්ථිකේ තුල ජීවත් වෙච්චි උන් විතරය. අනික් උන් හිතන්නේ අම්මට හැමිනෙන සිස්ටම් එකක් තිබුනා කියලාය. ඊ ළඟට පප්පා ආවේ ඇට අටක් දෙනවා කියලාය. මිනිස්සු හිතුවේ හාල් පොතට හාල් බින්දුවක් දෙනවා වාගේ, ඇට ජාති අටක් දෙයි කියලාය. ඇට අට කෙසේ වෙතත් උන්දෑ පෙන්සොන් ගියේ, ඉන්දිය සාගර මුතු ඇටේ, ලේ ගලන සැරව පිරි කුණු ගඳගහන ඇටයක් කොරලාය.

ඔය ආකාරයට බෙද බෙදා ගිය එක එක ජාතියේ බබල් ගම්, 94 ඉඳලා එන්නේ විධායකෙට කෙලින බබල් ගම් කියලාය. විධායකේ ඒ තරම්ම කරුමයක්ය. හැබයි ඉතින් එකෙක්වත් විධායකේ නම් අහෝසි කලේ නැතිය. සෝභිත හාන්දුරුවන් ප්‍රමුඛ සාධාරණ සමාජයක් උදෙසා ජාතික ව්‍යාපාරය ගේමක් අරගෙන ගියේ, විධායකේට කෙලිනවාමයි පුතෝ කියලාය. ඔය අව් අස්සේ, ඒ ගේමට පිවිතුරු හෙටක් උදා කරන්න ආපූ රතන හාන්දුරුවෝත් සෙට් උන නිසා, ඔක්කෝම බලාගෙන උන්නේ, මොකාද යකෝ මේක කුඩු කරන්න එන පොද්දා කියාය. අන්තීමේදි පොද්දා හෙවිල්ල ගමේ අවුරුදු උත්සවේ සැඟවුන අමුත්තා සොයන ගේමටත් වඩා නැගලා ගියේ, සීන් එකට බය වෙච්චි මහ රජාගෙන් පටන්ගෙන, වාසලේ ඔක්කෝම උන් ටික හොල්මන්ද බේරේ පොල්කොල උන නිසාමය.

අන්තිමේදි හොය හොයා ගිය "නිර්පාක්ෂිකයා" වෙනුවට ආවේ, වාසලේ උන්න "නිල්පාක්ෂික" පොරක්මය. විධායක බබල් ගම් එක, පතුරු යනකන් හප හපා උන්නු පොරක්ය. උන්නැහේ විධායකේ රහ දන්න නිසා, දැන් විධායකේ අහෝසි කිරිල්ල යට ගිහිල්ලාය. හාන්දුරුවන් වහන්සේ දෙදෙනාත්, රහත් වෙලාද කොහේදය. රතන හාන්දුරුවන් නම් කිව්වේ, දැන් නම් මට වනගත් වෙන්න හිතිලා තියෙන්නේ කියලාය. හැබයි මෙතැන එක හොඳක් තියෙනවාය. සිරිසේන උන්නැහේ, සැටලයිට් නෝනා වගේ, පච විදින මහින්ද මහත්තයා වගේ, බොරු කියලා නම් නැතිය. උන්නැහේ කියන්නේ විධායක ක්‍රොමේ වෙනස් කරනවා කියලාය. අහෝසි කිරිල්ලක් ගැන මැනිෆැස්ටෝ එකේ කිසිම සඳහනක් නැතිය.

මාතලන්ට නම් ඔය විධායකේ එච්චර අවුලක් නැතිය, මොකෝ සිරිමා කෙලපු පිස්සුව හොඳට දැකලා තිබුන නිසාය. එයා කලෙත් මේ ටිකමය. ඒ කියන්නේ එයාට හිතෙන එකය. ඔතන කේස් එක තියෙන්නේ තනතුරේ නෙමේය. නමෙත් නෙමේය, මළ ජරා ව්‍යවස්ථාවේ හා මේ කුණුවී ඕජස් ගලන සිස්ටම් එකේය. සිරිසේනලා දින්නත් මහ චන්දයකට යන එක 2015 අප්‍රේල් වෙනෙකන් කල් දමා තියෙන්නේ ඇයි කියා එකෙක්වත් අහන්නේ නැතිය. දිනපු ගමන් පාර්ලිමේන්තුව විසුරුවා හැරලා මහ චන්දයකට යන්නේ නැත්තේ ඇයි කියලා එකෙක්වත් අහන්නේ නැතිය. එහෙම යන්න, පක්ෂ විපක්ෂ එකෙකුටවත් ඕනා කමකුත් නැතිය. 

උන්නැහේ දින්නොත්, දැන් ආන්ඩුවේ ඉන්නා ඔක්කෝම උන්, උන්නැහේගේ රෙද්ද අස්සේ රිංගනවාමය. අද චන්ද්‍රිකා පට්ට පතුරු ගහන උන් ඔක්කෝම, මහින්දගේ පතුරු අරින්නේ 9 වනදා ඉඳලාමය. මේ කාළකන්නි කිසිවෙක්, පාල්ලිමේන්තුව විසිරුවා හරින්නේ නැත්තේ, සම හරක් උන් පැන්සොන් එකට එන්ටයිටල් වෙන්නේ නැතිව යන නිසාය. අවුරුදු පහෙන ජීවිත කාලයටම පැනසොන් හම්බ වෙන ජොබ් එකක් මේ ළොවෙත් නැතිය, ලොවි ගහෙත් නැතිය. ඕවා ගැන අඩු ගානේ ජෙප්පො වත් කටක් හොල්ලන්නේ නැතිය. ඒ වෙලාවට උන්ගේ කටෙත් පිට්ටු හිරවෙලාය.

අනෙක උන්ට හුරු පුරුදු කරන හා සිස්ටම් එක තුලින්ම ලබා දී තිබෙන අධි සුඛෝපභෝගී ජීවන රටාවයි. මෙතරම් විශාල දීමණා මහජන මුදලින් ලබා දීම වහාම නවතා දැමිය යුතුය. දේශපාළණය බිස්නස් එකක් බවට පත්කර ඇති ක්‍රමය සම්පූර්ණයෙන්ම ඉවත් කල යුතුය. දේශපාළකයා සමාන්‍ය ජනතාවගේ නියෝජිතයකු මිස, ප්‍රභූවරයකු කිරීමේ සියළු පහසුකම් අත් හිටවිය  යුතුය. එවිට දේශපාළණයට පැමිනෙන්නේ, අවංක, රටට සේවය කිරීමේ අවංක චේතනාවක් ඇති පිරිස පමණි. අධි සුඛෝපභෝගී වාහන ලබා දීම වහාම අත් හිටවිය යුතුය. අපේ රටේ නාස්තිකාර පරිභෝජන රටාවේ හා ජීවන රටාවේ මූලාරම්බය මෙය බව, මාතලන්ගේ මතයයි. ඔවුනට සාමාන්‍ය මෝටර් රථයක් ලබා දුන්නාම හොඳටෝම ප්‍රමානවත්ය. ළෝකයේ කිසිම රටක මහජන නියෝජිතයන් වෙනුවෙන් මෙතරම් මුදලක් කාබාසිනියා කරන්නේ නැතිය.

අද මහජන මුදලින් නඩත්තු වන්නේ පාර්ලිමේන්තුවේ සිටිනා පිරිස පමණක් නොවේ. මාතලන් සිතනා ආකාරයට, රාජපක්ෂ පරපුර හැරුන විට, අනෙක් සැම එකාගේම පවුල් පිටින් කන්නේ අහිංසක මහජනතාවගෙන් ගසා කන අසාධාරණ බදු මුදල් වලිනි. මේ කාළකන්නි වියදම් අහෝසි කිරීමෙන්ම. ජනතාවට අති විශාල සහනයක් ලබා දිය හැකිය.

සිරාගේ මිනිස්ට්‍රියේ, එයාගේ අය කී දෙනෙක් උන්නාද කියා හරියටම දන්නේ නැතිය. හැබයි කල් මාක්ස්ගේ එක කුස උපන් සහෝදරයෙක් වෙන, දූෂණය වංචා ගැන පෝප් වගේ ටෝක් දෙන, කෝප් කමිටුවේ සභාපති තැන්පත්, ඩීව් සහෝදරයාගේ අමාත්‍යංශේ ඉන්න උන්ගේ පැටිකිරිය නම් ළඟදි පත්තරේක දැක්කේය. ඔක්කෝම ඉන්නේ පක්ෂයේ කාළකන්නිය. මේ රටේ උගත් උන් හිඟන පඩියට ගස් යට වේලෙන වෙලාවට, ප්‍රගතිශීලී බාප්පලා ගරාගෙන කන්නේ එහෙමය.

උන් මේවා දමලා යන්නෙ නැත්තේ මහින්ද ප්‍රගතිශීලි හින්දා නෙමේය. පවුල්වල උන්ට විතරක් නොව, වටේ ඉන්න ඔක්කෝටම නොමිළේ රජ සැප ලැබෙන නිසාය. යාන වාහන ලැබෙන නිසාය. පින් පඩි ලැබෙනා නිසාය. මෛත්‍රිපාලගේ මැනිෆැස්ටෝ එකේ ඇමති මණ්ඩලේ කීයකට සීමා කරනවාද, කාර්ය මණ්ඩලයේ ඉන්නේ කීයද, උන් පත් කරන්නේ කොහොමද කියා, කිසිවක් කියලා නැතිය. කියලා තියෙන්නේ විද්‍යාත්මක ක්‍රමයකට ඇමතිවරු පත් කරනවා කියලාය. විද්‍යාත්මක ක්‍රමේ කෙසේ වෙතත්, මේ විජ්ජාවම් ඉදිරියටත් වන බවට ආයේ කතා දෙකක් නැතිය.

උන් පවුල් පිටින්ම නිවන් යන ගේමක් කියලා පේන්නේ, උන්ට අමාත්‍යශයක ලැබුනාම එක බාරගන්න යන ගේම දැක්කාමය. මාතලනුත් දැනට රැකියා කීපයක්ම කර ඇතත්, ප්‍රමෝසොන් කප්පරක ලබලා ඇතත්. ඒ එකකටවත්, පිරිත් කියන්න හාන්දුරුවරුවත්, අම්මා තාත්තලාවත්, මාතලි හා පොඩි මාතලන්වත් වඩම්මාගෙන ගිහිල්ලා නම් නැතිය. ඒ තියා ප්‍රමෝසන් ලැබිච්ච කොක්ටේල් පාටියකටවත් ඔය එකෙක්වත් ගිහිල්ලා නැතිය. මොකෝ පවුලේ උන් රස්සාවට අදාල නැති නිසාය.

පෝට් සිටි නවත්තනවා කිව්වාට, පාර්ලිමේන්තු මන්ත්‍රිවරුන්ට හදන දිවිය ළෝකේ ගැන, වචනයක් වත් එකෙක්වත් කියන්නේ නැතිය. පාරේ යන මිනිස්සුන්ට මළ වදයක් වෙලා තියෙන, පිස්සන්ගේ රථ ගාය සහ බොඩි ගාඩ් පිස්සුව ගැන වචනයක් නැත. මහජන නියෝජිතයන්ට මොන බොඩි ගාඩ්ලාද? එහෙම බොඩි ගාඩ් ඕන නම් උන් මහජන නියෝජිතයෝ වෙන්නේ කොහොමද? යුද්දෙට කලින් ඔහොම මළ විකාරයක් තිබුනද? ඒ කියන්නේ යුද්දේ ඉවර කරලත් නැතිද? 

මාතලන් නම් කියන්නේ, ආරක්ෂාව දිය යුත්තේ තුන් දෙනෙකුට පමණක්ම බවයි. එනම් මහින්ද මහත්තයා, ගෝඨා සහ ජෙනරාල්ට පමණක්ම බවයි. ඒකත් මේ දාස් ගනනින් ඕනෑ වන්නේ නැත. දුමින්ද සිල්වාට, තොන්ඩමන්ට ඇමරිකාවේ ජනාධිපතිටත් වඩා අංගම්පොර කාරයෝ ඉන්නවාය. මේවා ඇත්තටම මළ විකාරය. මිනිස්සුන්ගේ සල්ලි අමු අමුවේ විනාශ කිරීමය. එහෙම ගාඩ් නැතිව දේශපාළණේ කොරන්න බැරිනම් කරන්න තියෙන්නේ, තමන්ගේ සල්ලි වලින්, සිකුරුටි ගාඩ්ලා එකෙක් බැරිනම් තිස් තුන් කෝටියක් හරි තියාගෙන අපිට පව් නොදි, තමන්ගේ වැඩක් බලාගෙන ඉන්න එකය.

අර දූෂණ හා අක්‍රමිකතාද මක්කද එකේ තියෙන ෆයිල් 35 කාගෙද කියලා එකෙක්වත් කියන්නේ නැතිය. ඒ හූණු බෙටිත් බෙහෙත් වලට ඕනා වෙන හේතුව නිසා මිස වෙන එකක්වත් නිසා නෙමේය. සිරිසේනට සහාය දෙනවානම් කප්පරක් හොරකම් කල හොරුන්ට, උපාසකවරුන් වෙන්න යන්නේ තප්පරයටත් අඩු කාළයක්ය.

කෙසේ වෙතත් හැත්තෑ හතට කලින් තිබුනේ දේශපාළණයක් බව ඕනෑම එකෙක් දන්නවාය. ඒ නිසා අවශ්‍ය කරන්නේ ගූ බෙට්ටේ කෑළි අයින් කර, තව ගූ බෙට්ටක් ඒ උඩින් දමා අයිසින් වලින් කවර් කර ජනතාවට පෙන්වා බොරු කිරීම නොවේ. ගූ බෙට්ට විසිකර දමා, මනුෂ්‍යත්වයට තැනක් ඇති, හොරකම වංචාවට හා දූෂණයට ඉඩක් නොමැති, මිනිස් අයිතිවාසිකම් ආරක්ෂා කරණා, සෑමටම එක නීතීයක් ක්‍රියාත්මක වන, සියළු ජාතින්ට එක සේ සළකන ආන්ඩු ක්‍රම ව්‍යවස්ථාවකි. ඒ වෙනුවෙන් ඉදිරිපත් වූ සෝභිත හිමි, රතන හිමි හා නිර්මාල් දේවසිරි, ජයදේව උයනගොඩ වැනි පිරිස්ද, පුද්ගලයා පමණක් වෙනස් කිරීමෙන් සෑහීමකට පත්වන ආකාරයක් පෙනී යාම, මේ රටේ, නීතිගරුක, බුද්ධිමත් පුරවැසියාට කරනා විශාල අසාධාරණයකි.

හඬක් ඇති මිනිසුන් නිහඬව සිටීම, තම රටට කරනා පට්ට අසාධාරණයකි.